التصنيف: الحلويات – الكيك

السلام عليكم و رحمة الله

المقـــــــــــادير :
3 حبات بيض .
كاس زيت .
كاس سكر عادي .
مغرف صغيرة فاني ، 1 خمارة كميائية ، مبشور القارص .
كاس و نصف مايزينة أو نشاء .
فرينة .

التحضيـــــــــــــــر:
في صحن نخلط كل المقادير مع بعض ثم نلم بالمايزينة و الفرينة حتى نتحصل على عجينة طرية نخليها ترتاح شويا ثم نصنعها كورات صغار بنفس الحجم .
نأخذ كورة ونحط فوقها السيار و نضغط عليها شويا باش تأخذ شكل الثقوب كي نكمل نستفهم في سنيوة و ندخلهم للفرن ميدوش وقت بزاف حوالي 10 دقائق .
كي تطيب و تبرد نلسق كل 2 حبات بالمعجون و نرمد الأطراف في نواد كوكو أو قوفريت مفتت .
نتمنى تجربيها هاااايلة ,

أنا فالحقيقة تلقيت صعوبة في خدمتهاهي ان الضغط بغربال كبير يضيع شويا الوقت على عكس الحلويات الاخرى ولكن و الحمد لله ربي جابلي واحد التسهيل رايحة نحكيلك التجربة ههههه كنت نخدم فيها وطولت لانو ياخذ وقت مين كل كويرة تضغطي عليها بالغربال نظرا لحجمه الكبير فاضطررت لحمل كل وحدة وضغط عليها اسفل الغربال حتى قالي ولد اختي لي عندو 8 سنوات ( خالتي علاش ماديريش بهادي أحسن ؟؟؟؟
تخيلي واش هي ؟؟

هادي لي نحطو فيها التيليكوموند

فرحت ودعيتلو من قلبي يسهل امورو وقرايتو كيما سهلها عليا وكان العمل اسرع وكمل في ظرف 5 دقائق بديت غير رافدتها ونضغط على الكويرات لي وجدتهم واحدة تلو الاخرى و الحمد لله
واذا لاحظتي فالصحن راح تلقاي النص الاول بالغربال خدمتهم قبل مايقترح عليا الفكرة و النص الثاني بطابع التيليكوموند ههههههههه حتى انه شكل طابع التيليكوموند اعجبني حتى اكثر من الشكل الطبيعي للحلوى اي أحسن من خدمتها بالغربال وبشهادة الجميع