اللهم صلً و سلًم على سيًدنا محمد و على آل سيًدنا محمد
يا الغاليات,
نراعي دوما في طيابي اصحاب الريجيم عندي والدي ربي يحفظه عندو نسبة الكولسترول عالية في الدم حتى وانو يتناول الدواء لكن لازم الريجيم..
و مع رمضان الواحد يحب المقليات و البوراك و الحلويات لكن يحاول ينقص منها و يرجع للاكل الصحي
البارح كان عليَ الفطور درت:
خبز القمح و اللي ما يخطيش مائدتنا
و باش يجيك مفشفش اعجنيه ملييييييح و اطلقيه شوي بالماء زيادة على الخبز العادي لانو القمح صلب بطبعه
تشيشة فريك بدون نقطة زيت بلحم بقري اقل في المادة الدسمة
درت خضار مفورة و مطهوة في الفرن بشرائح اسكالوب داند المشوية
و اسكالوب هو من اقل اللحوم نسبة دهون
استعملت في الخضار بكمية و حجم متساويين:
جلبانة _ جزر _ بطاطا _ كورجيت ( الكورجيت الغنية بالبوتاسيوم و مفيدة للقلب ناهيك عن ان الرسول صلى الله عليه و سلم كان يحبها )
بعد ما فارت حطيتها في صينية الفرن و قطعت فيها زيتون اخضر
اسكالوب حطيتها تتنقع في ماريناد مدة ساعتين
1 م ص موتارد
1 م ك كريمة طازجة
3 فصوص ثوم مهرس
نصف ليمونة
1 م ص توابل خاصة للدجاج
1 م ص فلفل احمر
1 كوب شاي حليب كونديا منزوع الدسم
(مش كل المكونات في الصورة)
بعدها شويتها على النار في مقلاة ساخنة جدا مدة 10 د
و الماريناد رميتها في المقلاة مع حبة بصل متوسطة مفرومة و عملت بيها صوص + فلفل اسود + سكنجبير مرقت بيه الخضر المفورة
تعطيها بنة
و دخلت صينية الخضر للفرن 15 د
بادنجال مشوي بالفلفل الاخضر و الاحمر و البادنجال في مواد مضادة للاكسدة و يقي من تصلب الشرايين اللي سببه الاول الكوليسترول
سمقتو بملعقة زيت و شوي ملح
و طبق السلطة هذا ما علباليش اذا تعرفو هاذ النوع من السلطة يسمى عندنا "البندراق" او " البلكازيط" و هو ورق صغير يجي في اغصان عملتو سلطة بالطماطم و الجبن و الزيتون و يجي رائع بالخيار ايضا
و هي تقلل من امتصاص الدهون في الامعاء
و طبعا مع شربات الليمون و نعرفو كلنا ان الليمون حارق للدهون
و بالصحة و العافية
يعطيك الصحة و العافية
الواحد لازم يتفكر معدتو بالخير ههه
الله يعطيك الصحة
فطور صحي لذيذ
لاشتا حنا نديرو هكا لازم درك الواحد مايستهينش بصحتو
الوقايه خير من العلاج
بصحتك اختي الحبيبه
اللهم اشفي جميع المرضى يارب
فطور رائع
يعطيك الصحة فطور رائع ومتكامل و صحي
لكي مني احلى تقييم
