السلام على الجميع و ان شاء الله الكل راه بخير
اليوم جبتلكم وصفة او طريقة لعمل معجون او مربى السفرجل كيما يعرفوه الاغلبية بمعجون الطباسا + طريقة عمل لا جيلي اللي ممكن نستعملها في حشوات مختلف الحلويات او نستعملها في الصابلي او نطلي بيها فاكهة اذا عملناه تارت بالفواكه
نتركم مع المقادير المرفوقة بالصور المفصلة و نبدا اولا بالمربى ثم لاجيلي
المقادير لم احدد كمية السفرجل مع السكر و الليمون انت تتحكمي في المقادير حسب الكمية كيما رانا رايحين نشوفو في طريقة التحضير
– فاكهة السفرجل من Kg1 الى 2 kg
– سكر عادي
– ليمون من 4 الى 5 حبات ( حسب كمية السفرجل )
الطريقة
اولا للمربى
– نغسل حبات السفرجل مليح و نشفهم
– نقشر حبات السفرجل و ننزع منهم اللب نترك القشور و اللب على جهة و حبات السفرجل المنظفة على جهة بحيث كل مرة و هذا ضروري كي نقشر حبة السفرجل نمسحها مليح بنصف حبة ليمون باش ماتكحالش
– ندي قدر و كسكاس بحيث ندير كمية من الماء في القدر و نخليه يغلي كي يبدا يغلي نضيف عليه القشور و اللب و هو ساخن و هذا لصناعة جيلي و ندير قطع السفرجل اللي نقيناهم في الكسكاس و نغطي عليهم و نوضعهم فوق القدر اللي بيه القشورو العلوف و نخليهم يفورو مدة 20 د حتى يولي طري
– من بعد ندي رحيوة و نرحي قطع السفرجل
و هنا تتحكمي في كمية السكر حسب كمية السفرجل اللي تحصلنا عليها بحيث عبر سفرجل يعطينا 2 عبار سكر ماشي معمرين أي كمية السكر تكون دايما ضعف كمية السفرجل
– ندي صحن من الاحسن يكون من الفخار و ليس حديد ندير فيه كمية السفرجل و السكر + عصير الليمون تقريبا كاس و نخليه يبات ليلة كاملة قبل الطهو و نروح نحضر الجيلي عادي
– في اليوم الموالي نضع خليط السفرجل في كسرونة و على نار هادئة نبدا نحرك دون انقطاع لان لو خليناه راه رايح يلسق في القاع و يشكل كراميل لازم نحرك حتى نشوف بلي السكر ذاب او مالصقش في قاع الكسرونةو تحول لونه الى الذهبي
– ندي مول ندهنوه بالزيت و هنا كيما نحب اذا حبيتي سمك السفرجل يجي سميك ندي مول صغير و اذا حبينا سمك رقيق ندي مول شوية كبير نفرغ المربى و نخليه يبرد من بعد نغطي عليه بورق المنيوم و نخليه في مكان عادي حتى يتماسك و لا يقطع الا بعد مرور 4 ايام على الاقل
– بعد مرور هذه المدة يقطع السفرجل مقروطات وهنا لكي الاختيار تحبي تخليه هكدا او ترمديه في سكر عاديى المخلوط مع سكر فانيلا لاعطاء الذوق و يولي كيما الحلقومة
2 للجيلي
– الماء اللي غلا فيه القشور + العلوف نصفيه من بعد نعبر كمية نتاع هداك الماء هي نفسها كمية السكر + شوية عصير القارص ندير الكل في كسرونة و على نار هادئة نحرك مرة ولا زوج مانحركش بزاف حتى يعطي نتيجة افضل و نخليه حتى يولي عاقد
ملاحظة
– بالنسبة لاجيلي نتاع السفرجل كي نعملها باش تعرفي بلي جهزت نرفد بالملعقة و نلاحظ الا ماقطرتش نعرف بلي لا جيلي وجدت
– لا جيلي نتاع السفرجل كي توجد نقدر نوضع طبقة من السفرجل + طبقة من لاجيلي + طبقة من السفرجل او نشكل كريات و نحشيها بلاجيلي
– الا استعملنا لا جيلي في الحشوات او استعمالها كنباج نسخنها شوية حتى يسهل لينا استعمالها
– بعدما تقطعي حبات السفرجل نقدر نوضعوه في الثلاجة
– و هذه هي الصور
صور المربى
صور لاجيلي
فكرة لاستعمال المربى مع لاجيلي
– ان شاء الله نكون وفقت في الشرح أي استفسار انا في الخدمة
ماشاء الله … مرره يشهي
يعطيكي العافية يارب
كلمة رائع قليلة بحقك والله
شهيتيني عليه ولا مرة جربته بالبيت
لكن وقته بان الله ندير القلب ونجربه جزاك الله خيرا اختي
احلة تقييم لك