بسم الله الرحمن الرحيم و السلام عليكم و رحمة الله تعالى و بركاته
واش راكم سيداتي الكريمات ان شاء الله الصحة بخير و على خير
بلا مانطول عليكم اليكم المقادير و الطريقة المرفوقة بالصور
– 2حبات ليمون متوسطين الحجم+ ½ كاس حليب
– اول شي نحضر المقادير كلها في ليان نخدم الزبدة مع السكر حتى تولي كيما الكريمة من بعد نبدا نضيف البيض بالتدريج و نخلط مليح ثم نضيف لفاني و نخلط و في الاخير نضيف الفرينة المخلوطة مع الخميرة و نجمع العجينة حتى تولي طرية كيما نتاع الصابلي نديرها في كيس بلاستيكي و نخليها تريح مدة 20د او اكثر في مكان عادي
– ملاحظة: هنا السيدة تشوف على حساب نوعية الفرينة وحجم البيض اذا استعملنا الفرينة كلها و شفنا ان العجينة طرية نزيد 2مغارف كبار فرينة مانكثرش قيس ماتتلم فقط و لازم مانعجنهاش
– نروح نحضر الحشو هنا عندنا 3 مراحل :
1/ في كسرونة ندير الحليب + سكر نخليها على نار هادية و نبقى نخلط دون توقف مدة3د لا اكثر حتى نحس بلي السكر ذاب والحليب اصبح دافي نطفي عليه و نخليه بجهة
2/ في اناء صغير ندير حبة البيض+الصفارو نخلط مليح من بعد نضيف المايزينة+لفاني و نخلط و نخليه بجهة
3/ نغسل حبات الليمون مليح في ميكسور نقطعهم مربعات بلا ماننزع القشرة فقط ننزع العلف + الحليب و نميكسي الكل حتى نتحصل على خليط خاثر نصيحة : بالنسبة لليمون مرات جي القشرة خشينة بزاف و بتالي تعطي ذوق مر في الكريمة لذلك اذا كانت القشرة رقيقة أي الليمون نوعية جيدة نستعملها كلية و اذا كانت العكس نستعمل فقط المبشور و اللب و نتخلص من القشرة البيضاء السميكة هذه عن تجربة
4/ نضيف خليط الحليب على خليط البيض و نزيد عليهم خليط الليمون و نخلط الكل
– ندي قالب مبرج( هذه الكمية تعطيك تورتة كبيرة و اخرى متوسطة) على طاولة العمل مرشوشة بالفرينة نحل العجينة و نحطها على القالب غير مدهون و نضغط على الجوانب مليح من بعد نفرغ الكريمة مباشرة على العجينة نقدر نستعمل قوالب فردية
ندخل القالبين للفرن يكون ساخن من قبل 180درجة/مدة 25دقيقة حتى تجمد الكريمة و تدي لون ذهبي مع الاطراف
– نحضر المورينغ انا هنا زدت 2 بياض بيض على البياض نتاع الحبة اللي بقاتنا من الكريمة و لك الاختيار تحبي تستعملي 5 بياض هكدا باش تغطي كامل وجه التارت نضرب البياض مع قرصة ملح و نبدا نطلع بالباتور و مرة على مرة نرمي عليه كمية من السكر العادي من الاحسن نطلع المورنيغ على حمام مائي من بعد في كيس حلواني نزين حسب الرغبة
و نعاود ندخلوه للفرن مدة 5 د باش يحمر نخلي تارت تبرد من بعد تقدم ذوقها يجي روعة و العجينة طرية
اي سؤال انا في خدمتكن حبيباتي
و عليكم السلام و رحمة الله تعالى وبركاته ….
الله يبارك حنونتي …
راهي تشهي …
تسلم الايادي ..
احلى تقييم ++++++
امووووووووورة توحشتك حنونة والله خليتي بلاصتك فارغة مسرورة لرؤية مواضيعك الله لايحرمنا منك
تبان هايلة نجربها بادن الله ونقولك
احلى تقييم
يبارك فيك حبيبتي سمية نور الاروع مشاركتك المشجعة لي منورة بالرد تحياتي
شكرا لك حبيبتي روح العسل و نشكرك على التقييم راكي فرحتيني بالمشاركة القيمة لك تحياتي
اهلا بيك حبيبتي hananour نورتيني بالمشاركة العطرة في انتظار تطبيقك لك تحياتي
ربي يخليك حبيبتي همسة قلب منورة بالرد العطر تحياتي لك
العفو حبيبتي غ وهيبة نشكرك على المرور العطر تحياتي
تعرفي مانحبش لحموضة لكن شوقتيني في الوصفة هادي راهي تبان تشهي يممممممم الف شكر على الخطوات