اليوم جبتلكم وصفة ساهلة تخرج كيما لي يتباع لالا احسن ان شاء الله
قلب اللوز
المقادير:
6 كيسان تشيشة متوسطة
3كيسان سكر
خلطيهم مليح بيدك
زيديلهم
باكي خميرة الحلويات
كاس زيت
كاس لبن وليس رايب وليس حليب اكرر لبن
وكاس ماء الزهر
واعجني مليح بين صباعتيك باش يذوب السكر ويجي معسلة من داخل
فرغي الخليط في سنيوة وتسفيها بظهر المغرفة بلا ما تعبزيها وخليها ترتاح 20د
في هاد الوقت حضري الشاربات
6 كيسان ماء و3 سكر وعود قرفة وكاس تاي ماء الزهر
حطيها فوق النار وحركي حتى يذوب السكر ولما تبدا تغلي خليها 15 د وطفيلها وزيديلها نصف كاس تاي ماء الزهر
نشعلو الفور تاعنا لما تكون تطيب الشاربات ونخليه يسخن مليح على درجة 170د ندخلوه يطيب من تحت 20دقيقة ومن بعد من فوق حتى يتحمر وطفيلو وبمجرد ما يخرج اسقيه بالشاربات على ثلاث مراحل وخليها ترتاح من 6 ساعات فما فوق واذا باتت يكون احسن
وهادو ليكم حبيباتي
جربوه ومتندموش راه بزاف بنين
شكرا لكن اخواتي على الثقة وان شاء الله ينجح معاكم كيما نجح معايا
جزاك الله كل خير