حبيباتي حبيت نستفسر على سر في البقلاوة ماهو السر الذي يجعلها مقرمشة
وياريت تعطوني مقادير عجينة البقلاوة باختصار كل وحدة تقول طريقتها
وهل ديرولها الخميرة الكميائية والبيض ؟؟؟؟؟؟؟؟
وكم من طبقة من الفوق ومن التحت
أختي انا ندير 3 طبقات من التحت و 3 من الفوق لأني نحلها بيدي أما بالمشينة تقدري تزيدي الطبقات لكن انا تعودت نحلها بيدي
هذي هي طريقتي و معتمدتها دايما تعملتها من عند يما ربي يحفظها
ـ 4 كيلات فرينة.
ـ كيلة مارغرين.
ـ قرصة ملح.
ـ بيضة.
ـ شوي فاني (ملعقة صغيرة أو 2)
ـ الماء.
طريقة التحضير:
غربلي الفرينة تاعك مليح و ضيفيلها المارغرين و دخليها في مليح و من بعد الملح و البيضة و تلمي بيديك و تلميها بالماء حتى تتحصلي على عجينة طرية و متماسكة خليها ترتاح ساعة و من بعد بونيها و من بعد حلي بالوحدة و حطي في الصينية و بين كل طبقة و أخرى ديري المارغرين المذابة و وزعيها مليح على كل طبقة كي تكملي و من بعد ديري الحشو (شوي قرفة و ماء الزهر و قرفة) و من بعد البونيات اللي قعدوا كملي ديريهم فوق الحشو و تعتمدي نفس الطريقة بين كل طبقة و أخرى المارغرين و هكذا حتى تكملي و الطبقة الأخيرة ثان ديريلها المارغرين و بعدها قطعيها و لازم توصلي حتى للقاع و من بعد يدريها في الفرن و كي طيب و هي سخونة تعسليها (العسل مع شوي ماء الزهر) و هذي هي و كي نديرها في العيد راني نحط موضوع تاعها
بالتوفيق
و كانت الاخت بسمة دارت موضوع بهذا الخصوص و هذا الرابط يقدر يفيدك
https://www.dzhawaa.com/vb/dzhawaa47824/
نعرف كل الطريقة لي قولتيها في صنعها الى لمقادير وراني قريت كل الردوود وستفدت بزاااف
انا ندير 3 كلات فرينة ونص كيلة مارغرين وملح ومغرف صغيرة خميرة كميائية و1 فاني 1 بيض وماء وماء زهر لعام لي فات درتها غير با فرينة وزبدة ومغرف خميرة وماء زهر وماء وخرجتلي روعة بصح هذي المرة درت الطريقة الاولى لي شرحتهالك خرجتلي طرية
قولي لي شحال وهي طيب في الفرن ؟
أختي انا ما عنديش مدة معينة كي نكون نطيبها نشوفها كي تتحمر في الجوانب نشعللها من الفوق و كي تتحمر من الفوق نطفي عليها
و نقولك كاين سر و هو الفرينة إذا مليحة و لالا اانا درتها هاذ الخطرة بفرينة سيم جات هايلة
تاخدي عبار ماء دافئ وبنفس عبار زبدة دائبة وخلطيها وضيفي الفرينة حتى تجمع
وحليها بالميزينة عملي 6 ورقات التحت و6 من الفوق تجي تهبل
ربي مايحرمني منكم
بارك الله فيك على ردك ياغالية
البنات كفوا و وفوا في اجاباتهم و كل وحدة و تجربتها في البقلاوة
و العسل كيما قالت مليكة صح عندو دور
و كاينةحاجة ايضا مهمة و تخليها تقرمس و تخشخش نقول لك عليها و خبيها على سلفتك 
العجينة و انتي تحلي فيها بالماشينة كي توصلي للرقم الاخير طبقيها على 3 بهاذ الطريقة و عاودي حليها طبعا رشي قليل من المايزينة و انتي تحلي في العجينة ما تكثري حتى ما تنشف
و كل طبقة تعملي لها هاك تدي صح وقت مضاعف مبصح تجيك خير من عجينة الفيلو في تقرميشتها و طبعا السمن الذائب بين الطبقات الا الخيرة من فوق ما تعملي فيها.
.
[/URL
