اخواتي الكريمات انا في حيرة من امري في موضوع يمكن ان يكون تافها عند البعض ولانه اول عقبة تعترضني فهو يبدو لي مشكلا كبيرا وانا اطلب نصائحكن القيمة
مشكلتي هي اني خطبت منذ مدة بسيطة لشاب فيه من الصفات مايجعل اي فتاة عاقلة تتمناه زوجا لها
وكانت الامور تسير بصفة جيدة مثلما ينص الشرع والقانون من نصائح وارشادات والحمد لله تفاهمنا الى ابعد الحدود.
الا انه في الايام الماضية بدات احس انه يتدخل في دخلي بما انني موظفة قلت له لا تتدخل في مصاريفي مثلما افعل انا.
هنا ثارت ثائرته فغضب مني كثيرا ولم يعد يتواصل معي رغم انني طلبت السماح منه اكثر من مرة.
اعرف انني مذنبة في هذا الامر ولكني وجدته يتمادى في بعض الامور البسيطة واكثرها هذا الذي رويته.
الان انا اطلب منكن كيف لي ان اتفادى مثل هذه المشاكل.
ولكن مني جزيل الشكر مسبقا.
اختي اكبر عقبة لازم تحسبيلها الف حساب هو الراتب حاولي بلباقة وصبر ان تضعي الننقاط على الحروف قبل الزواج
فان كان اختياره لشخصك فسوف يترك لك حرية التصرف وان كان لامور مادية هنا يجب ان تكوني واضحة معه
وهذا يعود لك في كيفية تسيير مرتبك بعد الزواج طبعا
ولكن نصيحتي لا تتركي الحبل على الغارب ولابد ان تكون لك رؤيتك الخصة منذ البداية لانه اذا وقع الفاس فالراس تفرت وراح الحال فقط انصحك لا تتنازلي كثيرا وصوني كرامتك
وان شاء الله خير
انت بحكم معرفتك لخطيبك تستطيعين الحكم على نيته
استخيري فما خاب من استخار
سلامي
نيتي من نهره كانت ان ابقيه في مكانه قبل ان اصبح رهينة لديه وهو يقول لي راكي تحكمي في روحك من ضروك "انا الراجل وانت المرة" فعلا انا لا انكر ذلك ولكن "نهار كنت نحوس على الخدمة حتى واحد ماقاسى معايا"
بالاضافة الى ان ابي لايتدخل او يسالني كيف اصرف مرتبي . لانه يعرف انني فتاة راشدة.
إليك رأيي بكل صراحة، غلطت كي طلبتي السماح…..الراتب تاعك ما عندو ما دخلو فيه و هذا حقك الشرعي و تتصرفي فيه كيما تحبي……….إدا وليتي تطلبي السماح و تعتذري و انتي ما غلطتيش، مالا كيفاه كي تغلطي صح.؟
لازم تتأكدي إذا راهو يحوس علك ولا علا دراهم؟ خاصة كي زعف……حتى هو غلط و لازم يعتذر….عزي روحك يديرلك قيمة، ماشي علا أي حاجة يا لوكان حقك تعتذري…..و آسفة على الصراحة القاسية نوعا ما…
يقول المثل اللي أوله شرط أخره نور..
عادة معظم النساء العاملات يتخوفن من هذا الأمر قبل الزواج (و يديرولو الف حساب و حساب), هل الإنسان هذا باغيني ولا باغي دراهمي..من المفروض كاين أمور تبينلك هذا الأمر..أول حاجة عائلتو لأنه الاصل يغلب , يعني إذا كان ولد عائلة متدينة ومن أصل طيب و خاطيهم الطمع..
ناس شبعانين في قلوبهم قبل كروشهم و -اسمحولي على هذا التعبير-
الحالة المادية تاع هذا الإنسان.. و اهم حاجة الاحساس ..كيما يقولوا دليلك ملك..و المرأة الذكية هي اللي تقدر تفهم الرجل وين حاب يوصل فقط من طريقة هدرتوا..حاولي تسمعي أكثر من اللي تهدري, شوفي لنبرات صوتو كي يعود يحكي في موضوع الدراهم, و تعابير وجهه- اذا كان قدامك-اذا يتلعثم, يحمار ,يرعش..*ما تضحكيش عليا*صدقيني كاين رجال على جال الدراهم..مستعدين يقبلوا قدم المرأة..
و لازمنا قبل هذا- ودايما- نحسنوا الظن..بلاك راهو إنسان صالح و باغيك ..و امورو المادية مهلهلة وحاب تتعاونوا..و ماهوش حابك تخسري دراهمك في أمور تافهة -بحسب نظرية الرجال- و في الأخير راح تولي دراهمك دراهمو و دراهمو دراهمك..ماشي الكل بالطبع.
إحساسك وحدوا هو اللي يخبرك…و أكيد عن طريق صلاة الاستخارة و الدعاء..راح تحسي براحة كبيرة و تتيسر أمورك إن شاء لله إذا كان إنسان صالح و يستاهلك و إلا راح يهنيك منو ربي.
من بعد تجي الشروط..مثلا أنا شرطت على راجلي انو مبلغ من الشهرية راح نخصصو لوالديا على خاطر تعبوا عليا و هوما اللي قروني باش وصلت لهاذي لخدمة..يعني راني قررت مارانيش نشاور فيه ( و اكيد لازم تقوليها طريقة لبقة و بظرافة)..و ثاني ما كانش عندو الدار biensure لازمني نعاونوا..أنا ثاني حابة نرتاح من الكراء..بكريكنت نشرط في الدار بصح كي لقيت انسان يخاف ربي,توكلت على لله و قلت الدار جاية جاية..و أمور اخرى انت تشوفيها تساعدك لازمك تبينيهالو من الاول….و ما لازمش تعتذري الا اذاكنت هدرتي بطريق فظة و جرحتي من مشاعروا .
والإنسان ما يكونش أناني..يعني لو كان تتوفر المواصفات الأساسية..نحاولوا نتغاضوا عن بعض المواصفات الثانوية..
صدقيني.. أهم صفة مطلوبة في الطرف الثاني هو التدين و الأخلاق الحميدة ومخافة الله سبحانه و تعالى..و اللي يخاف ربي ماتخافيش منوا..
نتمنى إني نكون وضحت ليك بعض النقاط و إذا عندك رأي مخالف أنت أو البنات نحاولوا نتناقشوا بلاك راني غالطة..
وفقك الله و سدد خطــــــــاك.
الصح الصح هو عمرو ما تسبب لي في اي ازعاج ولكن هاذي المرة زعفني صح
ومن كثرة المقاقية تاعو الكونترا رايحة تكمل
مالا ابكي متخليهاش في قلبك
