خويا راح ضيف مع صاحبو و تعشاو في الجلفة و مللي رجع و هو يشكر فيهم، و هادي المرة 3 نظن
قالنا الله يبارك أطباق رائعة و ضيافة و كرم
المهم، ديو تمر فيه زبدة ولا مانيش عارفة، يا الله فهموني…ههههه
و إذا ممكن تقولونا على أطباقكم التقليدية و الخاصة بالمنطقةو اللي معروفة بالجلفة فقط
شكرا حبيباتي
عندك صح التمر بزبدة البقر و اللوز
عندهم الشنين او اللبن الممخض بنين بزاف
و ايضا جابدين لتقاليد بوسعادة الشخشوخة و السفيطي كاين الرفيس المفور بالكسرة
ارجو انني قد افدتك
انا يا اختي من الاغواط و عوايدنا قريبة حنا و ناس الجلفة
التمر و الزبدة ناكلوه بخبز مطلوع
تمر يكون على شكل معجون و ما يسمى في منطقتنا بصم الراء "الرَب" و نضيفلو زبدة عرب اللي نتحصلو عليها من اللبن و ناكلوه بالمطلوع السخون
عندنا البادنجال المشوي بالفلفل و الطوماطيش المشويين و مسمق بالزيت
عندنا الشخشوخة و الفتات الاولى مالحة و الثاني حلو مسمق بالعسل و الدهان
عندنا المردود الي يجي بالبركوكس مبصح مرقة حمرا بالدجاج و الاعشاب البرية الخاصة بمنطقتنا و يكون حلو بالتمر و الهرماس و الفول
عندنا تشيشة فريك و تشيشة مرمز ( بالشعير المفتت)
المحمر و المصوَر : المحمَر هو جنب او فخذ من اللحم محمر بالثوم و المصوَر خروف كامل محمَر ايضا بالثوم علىى الشواء في الهواء الطلق او في الفرن و مؤخرا اصبحنا نحمروه اكثر في الفرن و هذا خصوصي للضياف
عندنا الكليلة و اللبا و الجبن (بالسكون فوق حرف الجيم) و هو من مشتقات الحليب و اللبن (الشنين)
الرفيس البسيسة و الكعبوش تصنع من التمر و الدقيق و ليدام كلا و وصقتو
القهوة رمز من رموز الجلفة تبنن بالشيح او الحبة الخضرا او الخرجلان او القرفة و ماء الزهر..تووووب
لو تشربي منها ابريق ما تشبعي
هذا اللي تفكرتو و كاش حاجة باينة نمدلك وصفتها انا في الخدمة
و زورونا مرحبا بيكم
