السلام عليكم ورحمة الله وبركاته انا دايما نحاول نطيب اللوبيا والعدس و ما يجونيش حلوين وزوجي قالي عليهم نموت طيبيهم ولا نجيب وحدة هههههه
عاونوني الله يخليكم.
شوفي اختي ديريها على حسب واش يحب زوجك
يعني كاين لي يديرهم بمرقة عاقدة كاين لي يكثر لهم المرقة
كاين لي يسلقو الوبيا قبل فالماء ومن بعد يدرولها المرقة كاين لي يدير الثوم فيهم كاين لي يدير القصبر كاين لي يدير نوع واحد من التوابل
فيه اختلاف كبير في كل عائله تقريبا..كاين لي يطحنو العدس بعد ما توجد يطحنوها كيما لبوري..كاين لي يديرها مرقة حمرا بزاف وكاين العكس وكاين لي يديرهم بالحضرا ..الخ
نتي شوفي ذوق زوجك
نتي كيفاش طيبيها ؟؟ قوليلنا نعطوك نصائح وان شا الله تتوفقي
انا مثال عائلة زوجي العدس يقتلووووووها بالثوم ويكثرو الحشيش فيها ومرقتها ما تجيش عاقدة تجي ممرقة بزاااااف زوجي ما يحبش ياكله..لكن انا نديره عاقد
وندير معاه بطاطا وكروطة نقطعهم رقاق ..وندير راس الحانوت عائلة زوجي يديرو غير الكمون فيه..راجلي يقول لي على العدس تقتلييييييه بالقدر ههههههه
يحب عدس لي نطيبه
المهم نتي كيفاش راكي تديريه ؟؟
السلام عليكم ورحمة الله وبركاته
على حسب رايي و تجربتي فان اللوبيا و العدس يحبوا الكمون بزاف…
كيما قالت ام هالة شهرزاد طيبيهم كيما تحبي عاقدين و لا مرقة خفيفة
كي يطيبوا و قبل التقديم و جدي الخلطة التالية
ملعقة صغيرة كمون+ ملعقة كبيرة او 2 زيت زيتون + 3 او 4 ملاعق معدنوس+فص كبير ثوم
و يمكن الاستغناء على الثوم لمن لا يحبه
خلطي المقادير جيدا و اضيفها الى القدرة او كل حد يضيف الخلطة للصحن حسب الرغبة
صدقيني المذاق لا يقاوم و كل من اكل طبخي للوبيا او العدس يشهد بلذتها…احم احم
اتمنى ان يوفقك الله لارضاء زوجك…
السلام عليكم ورحمة الله وبركاته كيما قالتك ام هالة كل واحد وكيفاش يطيبو انا مثلا ندير اللوبيا في الماء تتغلى مع شوية زيت وملح(طبعا تكوني نقيتيها وغسلتيها مليح) و نوجد الدرسة(ثوم و حار الاحمر و شوية كمون وملح )ترحيهم مع بعض من بعد كي تطيب اللوبيا تخليها في الماء تاعها وتضيفيلها الدرسة مع شوية طماطم مصبرة وتخليهم يغلو حتى تعقد شويةوطفيلها.اما الطريقة الثانية ديري اللوبيا تغلي في الماء كيما الطريقة الاولى لكن كي يدخلها الطياب ديريلها البصل مقطع و الجزر مقطع وملح وفلفل اسود وخليها تكمل تطيب كي يطيب كلشي خليها تعقد كيما تحبي و طفي عليها.نتمنى نكون ساعدتك شوية.
عفوا نسيت نقولك في الطريقة الثانية لازم طماطم مصبرة ديريها مع البصل والجزر بعدما تذوبيها في شوية ماء
شفي ختي انا نعطيلك طريقة طيابي للعدس اولا
قبل كل شيء نطيب العدس في كوكوت مينوت
في الكوكوت مينوت
قطعي و لا ربي كما تحبي حبة بصل
ديري زيت قليه مليح(كاين يدير اللحم كاين لالا)
زيدي شوية فلفل لكحل +ملح ربي 2ولا 3 سنات ثوم
وراكي تقلي في نفس الوقت زيدي غصن او2 كرافص مقطعين صغار
ربي حبة طوماطيش ثم ديري العدس الي كنت نقتيه و غسلتيه و درتيه يشمخ في ماء سخون كي يتقلى العدس مرقي و دير 2 حبات زرودية + 1لفت +2حبات بطاطا مقطعين مربعات و غلقي الكوكوت مينوت خليه اليطيب
و انت تعرفي الكوكوت نتاعك شحال الوقت
انشاء الله يعجبكم
و انا مع راي الاخوات الي قالو كل واحد كفاه يستبن
العدس لازم دايما يكون شوية عاقد ماشي عوم يا براك ههههههههه
السلام عليكم اخواتي انا لديا وصفة لطبخ اللوبيا مممممممممممممممممممممممم نموت عليها انا و راجلي وهيى الكرشة و المصارن نقصهم رقاق و نغليهم 2مرات ــــــــــــــــ نقلي البصل مع الثوم و القصبر مليح +الفلفل اكحل +الكمون ملييييح + معجون الطماطم نستمر في القلي 2د ثم نحط الكرشة لي غليناها من قبل و + الجزر قطع دوائر و نمرق بالماء و كي يطيب نحط لها القصبر جربوها و متندموووووووووووووووش ان شاء الله اختكم في الله
السلام عليكم ورحمة الله وبركاته اليك اختي طريقة جيدة ومضمونة لطبخ كل من اللوبيا والعدس اولا :للوبيا شمخيها ليلة كاملة في الماء وحدو وفي الصباح غيري الماء واغلقي عليها الكوكوت وخليها تنضج جيدا (كمية الماء تكون وافية) ولما تنضج قطريها في كسكاس وخليها بجهة ثم اعملي مرقة حمراء :قطعي بصلة و3سنينات ثوم وغصن معدنوس وملعقة صغيرة راس الحانوت ونصف ملعقة صغيرة كصبر مرحي وشوي زيت وملح وطماطم مصبرة ونصف حبة طماطم مرحية واذا كان عندك عظم او جناح دجاج او اي بقايا لحم ضفيه انا دايما انخبي بقايا اللحم ولو بقدر حبة حمص انبنن بيهم هذه الاطباق او زيدي فلفلة خضراء حارة وقلي امليح على نا ر قليلة ثم مرقي وانزعي الفليفلة واغلقي الكوكوت خلي كل شيئ ينضج وفي الاخير لوحي اللوبيا والفليفلة اللي نحيتيها واغلقي الكوكوت ورجعيها على النار حوالي 10 او15 دقيقة واطفي النار واذا كان زوجك ايحب زيت الزيتون والثوم كي اتحطي في الصحن اللوبيا لوحي مغرف زيت زيتون وسنة ثوم مرحية اوواش ايحب حطيلو اما العدس نقيه واعملي نفس المقادير السابقة لوحي امعاهم العدس وقلي امليح ثم مرقي ونحي الفليفلة واغلقي الكوكوت وخليها على نار متوسطة وكل مرة تفقدي الماء حتى ينضج وزيدي الفليفلةوسنة ثوم و خليه يغلي حوالي 5 ذقائق واطفي النار واذاردت اضافة زيت الزيتون ضيفيها عند التقديم وانشالله يرضى عليك زوجك وشهية طيبة للجميع
السلام عليكم ورحمة الله وبركاته
ماشاء الله عليك صبحتي مبكرة على اللوبيا وان دل ذلك على شيء فانما يدل على تضامن العضوات ووقوفهم مع بعضهم وقفة اخوية ومحبة في الله ماشاء الله ربي يدومها
حتى انا حبيت نرد على موضوعها لبارح ولما رايت الردود التي سبقتني وجدتها نفس طريقتنا في تحظيرها تقريبا ولاضافة معلوماتي فاللوبيا تطيب مع راس ثوم كامل وليس مع البصل .. وفي الاخير وقبل مانطفو عليها بخمس دقائق تقطعيلها 2 او 3 سنينات ثوم رقيقة مع قسبر رقيق وحبة جومبو وكمون وشوفي الذوق كيفاش داير…
حظ موفق ونتمنى التجربة القادمة تكون موفقة وترديلنا لخبر ونحيي كل اخواتي لي ردو على الموضوع سابقا والاخت المحترمة الشقراء على تخصيص موضوع لأم آلاء عبد الرحمن
تحياتي للجميع في انتظار دخول المعنية بالأمر
السلام عليكم ورحمة الله وبركاته .انا تاني نطيب العدس كيما زهرة القرنفل مي ساعات الخضار نرحيها ونرجعها للمرق لانو ولادي ما يحبوش الخضار بزاف ويجي العدس عاقد جربيه وما تندميش بزاف بنين.
