ان شاء الله الصحة بخير
اليوم جيتكم بحلوى القطايف او ماتعرف بالكنافة و هي حلوى محبوبة كثيرا في رمضان سهلة في تحضيرها و تعمل بعدة حشوات و انا عملتكم كيفيتين الاولى بحشوة المكسرات و الثانية بحشوة الكريمة و لك سيدتي الكريمة الاختيار في شكل الكنافة سواء تعمليها سيقارات او كريات او تعمليها في قوالب مختلفة الاشكال
بلا مانطول نخليكم مع المقادير و طريقة التحضير
الكنافة بحشوة المكسرات
المقادير
– كنافة او قطايف
– ليدام ( ½ سمن +1/2 زبدة ) يكون ذائب و دافي
– للحشو ( كمية من المكسرات انا استعملت جوز + لوز يكونو محمصين و مرحيين خشان / سكر / سمن ذائب / شوية لفاني / ماء الزهر )
– اول حاجة نحمص المكسرات اللي عندنا حتى يدو اللون الذهبي من بعد نطحنها خشينة و نحضر الحشو ندير 2 ملاعق كبار الى ملعقة و نصف كبيرة من السكر العادي و هذا حسب كمية المكسرات اللي عندنا + رشة فانيلا+ ملعقة كبيرة سمن او زبدة ذائبة و نخلط الكل من بعد نبدا نرش بالماء الزهر حتى تتلم الحشوة و تولي متماسكة
نشكلها اصابع تقدري تشكليها كريات و هذا حسب الذوق انا هنا عملتها اصابع باش نشكلها سيقارات
– على طاولة العمل نفتح الكنافة على شكل شريط طويل و ندهنها من الجهتين مليح
من بعد نحط الحشو نلف مرتين و هكذا حتى نكمل مع باقي الكمية
نستفهم في صينية مدهونة بالزبدة و نعاود ندهن وجه كل حبة بليدام ندخلها للفرن ساخن من قبل و نخليها لمدة 15د الى 20 د حتى تدي اللون الذهبي
من بعد كي تحمر مباشرة و هي ساخنة نسقي كل حبة بالعسل يكون متوسط الكثافة أي مايكون جاري ولا ثقيل بزاف متوسط انا اخترت هذا النوع من العسل كثافة ديالو مضبوطة
كنــــــافة بالـــــكريمة
المقادير نحتاج
250 غ قطايف ( كنافة) / 125 غ زبدة ذائبة / 80 غ سكر عادي ( اختياري و حسب الذوق انا استغنيت عليه في المقادير لاني جربتو مرة و جاتني الكنافة حلوة بزاف )
للكريمة
400 ملل او غ حليب / 35 غ مايزينة ( م.ك مملوؤة )/ 30 غ زبدة تقريبا م.ك / لفاني / 4 م.ك مملوئين سكر عادي
للشاربات عسل يكون خفيف شوية ماشي ثقيل
الطريقة
– ادي اناء حطي القطايف نتاوعك لازم تكوني قطعتيهم شوية لانهم يجو طوال من بعد ديري عليهم الزبدة او سمن و خلطي الكل حتى تدخل الزبدة فيهم مليح من بعد زيدي السكر و خلطي بيديك تقدري تستغناي على السكر و خليها على جهة
حضري الكريمة نتاعك في كسرونة خلطي كل المقادير مع بعض على نار هادئة حتى تثقل
ادي صينية او قوالب صغيرة تكون مدهونة اقسمي القطايف على 2 حطي النصف الاول على سطح الصينية من بعد فرغي عليه الكريمة بعدما تكون بردت مليح و غطي بكمية القطايف اللي بقات دخليها لفرن يكون ساخن على درجة حرارة 180
كي تشوفي بلي القطايف تحمرو من الجوانب طفي على الفرن و اشعلي من الفوق حتى تتحمر مليح على السطح و هكدا تضمني ان الكريمة نتاعك ماتنشفش بل تبقى طرية خرجيها من الفرن وهي ساخنة اسقيها بالعسل
بالكريمة المتبقية عندي زينت بها وجه الحلوى مع رشة بيستاش و هذا هو شكلهم النهائي
يعطيك الف صحة
وصفات جديدة واشكال جميلة جدا
سؤال من اين تشترينها
يعطيك الصحة هايلين يبانو بنااااااان.
الله يبارك مااااشاء الله جاوك روووووووووووعة
بارك الله فيك على الوصفات الرائعة
