انا فتاة تزوجت من حوالي سنة و نص ما عنديش اولاد تزوجت زواج تقليدي من واحد ما نعرفوش كنت ساكنة مع اهله و حاليا راني في بيتي وحدي الحقيقة اني لا اطيقه ابدا ما نحملوش خلاص صاير بينا مشاكل هو راجل يحوس غير على الفراش اناني جدا غير مسؤول على بيته كتن يشتغل بمؤسسة و طلع منها و هو طول النهار راقد في الدار البيت كله انا جهزته من باب مساعدة زوجي لكن هو مادار والو في داره مين نقله وعلاه ما تخدمش يقلي ما لقيتش و دايما راقد في الدار وين راح يلقى شغل واش يهمه الفراش و الجماع فقط و يغصبني على هذا ياخد مني بالغصب حتى لو كنت مريضة او تعبانة بصراحة تعبت نفسيتي
مرة رفضت نام معه طلقني بالفظ و جيت عند اهلي من بعد جا يطلب السماح و رجعتله
لكن ما حبش يتغير بصراحة وصلت لدرجة اني اكره و نكره نقعد معاه اليوم راني في دارنا جيت على اساس زيارة لكني قررت مانرجعش ليه لاني من كثر المشاكل صرت اعاني من وجع في راسي و رقبتي طلعت لي كتلة صغيرة لحد الان ما عرفتش واش هي ربي يشفيني و استخرت كثيرا و صلت لاخد قرار الانفصال اليوم احسن من يوم اخر ربما يكون اولاد ساعدوني و سامحوني اني طولت عليكم ربي يهنيكم و يسعدكم و يخليلكم ازواجكم
اختكم رهف تحياتي
ان شاء الله المتزوجات ذوات الخبرة يعاونوك
ماحبيش نخرج بدون رد اسمحيلي
عن تجربة راني حننصحك على حساب واش قلتي راجلك مالنوع لي معندوش روح المسؤولية وسمحيلي نعاتبك على خاطر انت تاني شجعتيه ومادامك راح تكملي معاه بهاد العقلية انا نضمنلك بلي مراحش يتسقم
يعني هدا النوع ميستهلش مساعدة كيما قلتي جهزت البيت على اساس مساعدة زوجي العكس هو مادا بيه يرقد ويمونجي ويلقا لي يخدم عليه
اول نصيحة الدعاء ثم الدعاء اكثري من الدعاء والاستغفار
والحاجا الثانية مادا بيك ترجعي لدارك وما تخليش الشيطان يغلبك العكس انت اغلبيه بالصبر والدعاء
ومادا بيك تاني متزيديش تعاونيه نهائيا مام تلقايه ميت بالجوع ميغدكش كي يقلك قوليلو معنديش
وبداي انت دوموني قوليلو خصتني هادي وخصتني هادي
وفيما يخص حقو الله يعيشك متحرميه منو هادا حقو الشرعي ومازالكو عرسان جدد
نوصيك استمتعي بحياتك وعيشي كل لحضة فيها اخرجي وفرحي وقنعي بواش عطاك ربي
مانقلكش بلي راني مع راجلك في واش راهو يدير الله غالب هو تربى هاكدا مي انقلك انت
ادا كنت فحلا انت تبدليه والله غير تقدري ترجعيه كيما تحبي ماشي بالدواس والكره العكس بالحب ولحنانة
كيما يقولو لاحنانة دوب الحجر سيسه وبلعقل برك
وماتنسايش واش قتلك اصبري هادا هوا مفتاح الفرج
وحمدي ربي على واش عطالك كاين رجال والله ياختي الله لا يشوفك الشراب ولاقمار والنسا ووووووو
و وتلقاي مرتو صابرة
يكدب عليك لي يقلك مكانش دار مفيهاش ماشكل لوكان تشوفي واش راهم يعانو الناس تنساي همك
وراني نقلك هاكدا باش نصبرك برك
ومادا بيا متهدميش دارك بيدك
وادا حبيتي اي حاجة راني هنا
والله غير واش راني نقلك عن تجربة وراني حاسة بيك
ربي ينورلك طريقك نشاله
والله مالقيت مانقولك اصبري ولا روحي لداركم؟؟؟؟؟؟؟؟
صعيبة الراجل كي يعود عديم المسؤولية، وكيما قالتلك الاخت حنان انت عاونتيه على هذا الشيء ، لكن انا مانلومكش انت حبيتي توقفي معاه وهو ماعرفش قدرو، (صراتلي انا ثاني)
انت وحدك تعرفي مليح زوجك اذا شفتي قادر يتبدل اصبري وصلي واكثري الدعاء وساعة سايسيه ساعة هدديه حتى يفرج ربي خطراه الطلاق ماشي ساهل وتكون امراة مطلقة في مجتمعنا تبانلي عند ك فكرة؟؟؟؟؟؟
من المهم ثاني تشاوري والديك هما يعرفوا خير مني وخير منك
وربي يشفيك ويهديك الى الرأي الصواب