الوسم: الفرشيطة

بسم الله الرحمن الرحيم
الحمد لله و الصلاة و السلام على رسول الله
السلام عليكم و رحمة الله تعالى و بركاته
كنت حابة نحطلكم الطريقة بالصور المفصلة لكن للأسف صورت كامل الخطوات و من بعد ردت الحلوى طيب و قلت نروح نشوف ليفوتو اللي درت كي رحت قالولي الميموار مراهيش في لاباري قريب بكييييييييت ههههههههه المهم هي طريقة ساهلة و كامل نعرفوها
المقادير:
ـ 5 بيض.
ـ كأس سكر.
ـ كاس زيت.
ـ 2 مغارف كبار مايزينة.

ـ فاني.
ـ فرينة.
ـ 2 خميرة.
خليط الكاكاو:
ـ كاكاو.
ـ سكر قلاص.
ـ حليب.
طريقة التحضير:
أول الحاجة نفقسوا البيض في إناء و نضيفوا عليه كاس سكر و الخميرة (ديما نديروا الخميرة مع السكر باش تذوبوا ) و نحركوا مليح حتى نتحصلوا على خليط متجانس نضيفوا الزيت و نخلطوا من بعد المايزينة و الفرينة نضيفوها تدريجيا حتى الحصول على عجينة متماسكة و طرية (الفرينة الأحسن نغربلوها).
و من بعد نأخذوا قطعة من العجينة و نديروها كي شغل حربوش صغير و نحطوه في الصينية تكون مدهونة بالزيت و هكذا كي نكملوا نفوتوا عليهم كامل بالفرشيطة بحيث نضغطوا على كل حربوش صغير(الأحسن بعد كلما نضغط على حربوش نديروا الفرشيطة في الفرينة باش ما تلصقش) من بعد نحطوها في الفرن 160 درجة و هي ما طولش في الفرن كي تتحمر من التحت خلاص

و من بعد كي تبرد نلصقوا كل زوج بالمعجون و من بعد نأخذوا الخليط تاع الكاكاو بحيث نديروا شوي حليب مع شوي كاكاو و نضيفوا سكر قلاص

و ماشي شرط يكون عاقد
لأنو رايحين نرمدوه في نواة كوكو أما إذا كان تحبوا تغمسوه في الخليط تاع الكاكاو فقط فلازم يكون ثقيل

نديروا نص الحبة داخل خليط الكاكاو

و من بعد في نواة كوكو

و هذي هي النتيجة

ممكن تعوضوا الزيت بالمارغرين و كذلك تعوضو خليط الكاكاو بالشوكولا كل واحد و ذوقو
نتمنى تعجبكم

الله يسلمك أختي
وي أختي انا أصلا راني دايراتو للعيد لأنو هاذ الحلوة تبقى مدة ما تفسدش لكن المهم إذا درتي منها لازم ديريها في بورت مونجي و تغلقي عليها و إلاّ تيبس

مرورك الأروع اختي
ربي يسترك

ربي يحفظك أختي
شرفتيني بمرورك

امممممممم تسخف
يعطيك الصحة

رائع أنا دايما نديروا