الوسم: الشربة

السلام عليكم
مانيش عارفة واش راهو صاريلي يا ناس
ما قدرتش ننجح في الشربة أو الحريرة كيما عييت نتبع في الوصفات تخرج صامطة و ما تعجبش ما فهمتش المشكل نتاعي راهو في الطوماطيش ولا الما راني في حالة و متبهدلة
عاونوني ربي يعطيكم ما تتمناو
حنا 6 عباد في الدار

شوفي احبيبة ان شاء الله انعاونوك اول حاجة انا من الشرق او منعرفش اندير لحريرة يعني احنا انديرو شربة افريك
المقادير
لحم كيما اتحبي لبصل ديري 2 مغلرف كبار سنة ثوم مغرف اكبيرة سمن اذا ما عندكش ديري 2 مغارف زيت حسب اللحم اذا امشحم نقصي الزيت ديري مغرف دبشة قصيها ارقيقة و الكرافس غير اشوي موش بزاف قصيهم ارقاق حتى هوما فلفل لكحل ملح كسبر فلف عكري جمبو دجاج اتخلطي المقادير اكل امع بعض انا امالفة ننصب اقبل بساعتين انخلي اللحم يشرب الدواوات و ادا مزروبة معليش المهم اتقلي هاد لحوايج امليح على نار هادية حتى يدبالو راهو الرسمي فالتقلاي من بعد اتضيفي حبة طماطم اتكوني ارحيتيها فالميكسور ولا حاجة اخرى و اتزيدي ملعقة و نصف طماطم انتاع لبات او فنجان ماء و اتحركي امليح حتى تتقلى الطماطم يعني اتشوفي الزيت ابدات تطلع فوق الطماطم راني نرجع و انقول ارسمي فالتقلاي
بعدها تمرقي بلتر و نصف ماء كي تغلي البرمة انتاعك اتضيفي فنجان فريك اتكوني سومتيه من قبل باه يتنحى منو كانش اغبار اتعسيه كي يغلي اتنقصي اعليه اخلاص يعني على نار هادية و اتخليه ايطيب ساعة ساعة طلي اعليه او راني قلتلك كي يغلي نقصي عليه خلاص انار اتكون اخفيفة باه ايجي ابنين خليه مدة ساعتين هكاك المهم وين طاب اللحم انتاعك و امبعد ديري 2 قرون فلفل حار او طفي اعليه كي اتقدميه ديري فوقو اشوي دبشة او رجعيلي لخبر الشربة انتاعي راهي اتجي اتهبل ايموت اعليها الناس كامل ا ن شاء الله اتكوني افهمتي و ادا خصك حاجة راني اهنا بالتوفيق او صح افطورك بعد لفطور او بعد لفطور خبرينا واش درتي فيها انسيت انقولك ادا عندك المرمز. ضيفي مغرف اكبيرة امع لفريك او فالاخير خليه يخثار امليح

وعليك السلام اختي شوفي هذا الجاري فريك: تحكمي القدرة او الببوطة تقطعي بصلة متوسطة + سنينة ثوم صغيرة وتقدري تستغناي عنها+ طرف لحم واذا عندك طرف دجاج حطيها على النار وزيدي ملعقة صغيرة ونص ملح شوية فلفل اسود غصن كرفس غصن معدنوس ربع حبة طماطم وخليها تتقلى في نفس الوقت سخني الماء لما يتقلى اللحم امرقي غطي اللحم انا نحط الماء حتى يوصل للدرعين تاع الببوطة زيدي النار باش تغلي وزيدي ملعقة كبيرة طماطم مصبرة كي تغلي نقصي وخليها طيب بالعقل.
لما يطيب اللحم نحيه صفي المرق وذوبي مقدار كاس شاي ونص فريك في ماء بارد كيما نذوب النشاء وحطيه في المرق وسخني شوية ماء وزيديه على المرق حتى يوصل مثل المرة الاولى وحركي مرة على مرة باش ما يلصقش الفريك التحت وخليه يطيب ساعة او حتى يلبى يولي المرق ثقيل شوية مش ماوي اذا لاحظتي انو ناقص حمورة زيدي نص ملعقة كبيرة طماطم وممكن تحطي حبة فلفل حار تنسم الجاري لما يبدا الفريك يطيب فتتي اللحم والدجاج وحركي وخلي يطيب وخلاص يجي على الكيف. جربي وقوليلي.

ربي يحفظكم أخواتي نجرب و نردلكم الخبر
صح فطوركم و الله راني نعاني

مافهمتش أختي أطياف المحبة واش هوما المكونات اللي ما طيشيهمش

نعم حبيبتي كما قالت اطياف السر هو كي يتقلي مليح لازم
تصفيه
فقط ملاحظة
كي تبداي طيبي اول حاجة
اللخم نتاعي نقليه وحدو ساع في شويييييي زيت بعني ملعقتين او اكثر علي حياب اللحم نتاعك اذا مشحم نقصي في الزيت
كي يتقلي اللحم حطي عليه البصلة و الثوم بعد ما ميكسيتيهم

اطياف انا كي نصفي الشربة من الطناطم والبصلة نطيشها

الشربة فريك ياخي تحطي اول شي بصل ثوم كرافس طماطم حبة صغيرة باش مايجيش الجاري حامض
حبة سنارية والتوابل زيت لحم ودجاج
تخليهم على نار هادية خلاص
كي يذبلو امرقي بماء مغلي وخليها لماتغلي طفي النار وصفي المرق بالكسكاس
هدوك البصل والثوم والباقي ارحيهم ورديهم باللبرمة نتاعك
ديري شوي طماطم نتاع الباط
وحطي الفريك وحركي
غطيها وخليها على نار متوسطة
في نصف الطياب زيدي واحد فلفل حار ماتحليهش خليه برك يطلق البنة
خليهم يطيبوا على نار متوسطة الى ضعيفة لمل يطيب اللحم طفي
رايح تجي بنينة بالسيف عليها هههه
جربي الطريقة
كي

[

فكرة مليحة ام اياد وانا مجربتها
وفقتلها وحدي وهذا كيما رحلت لداري الحالية وكانت عندي غير طابونة ومعنديش كويزنيار هذاك الوقت
كوصل رمضان كنت نحاول نطيب اكبر كم بسرع وقت امالا كنت نتبع هذي الطريقة وصح تجي الخضرة طعمتها هايلة
هذا طبعا فالعصر الحجري هههههه درك
اطورت شوية بصح هذي الفكرة مزالت عاجبتتي

اااام تشهي لازم نجربوها بارك الله فيك اختي و لصاحبة الوصفة

ما شاء الله فكرؤة هايلة يا عبقرية شكرا على النقل الرائع افكارك رائعة يا رائعة

بــــــــــــــــــارك الله فيك عزيزتى
فكرة رائعة

وانار الله قلبك بنور الايمان

دمت ب حفظ الرحمن

تعيشو حبيباتي.جاب ربي جربتها حبيبتي ام سرين درك نجربها و عينيا مغمضين هههههههههه.

فكرة هايلة اختي

اطلب من اخواتي ان يعطيوني طريقتهم في عمل الشربة وسر الون الاحمر بلا ما جي حامضة يعني في حبة بصل واحدة قداش ديرو طماطم حب ومصبرة مع انتطار مشاركتكن

شوربة فريك بكرات اللحم

المكونات

نصف كيلو لحم قطع

٣ ملاعق كبيره زيت زيتون

٢ حبة بصل مفروم

٢ فص ثوم

كوب حمص منقوع

نصف كوب كرفس (الورق اكثر)

ربطة كزبرة طازجة مفروم

ملعقه صغيره ملح

فلفل اسود

١ كوب مرق دجاج

١ ملعقة فلفل احمر حلو

٤ حبات طماطم مفرومه

ملعقة معجون طماطم

فلفل اخضر حار

من ٢ الى ٣ ملاعق فريك

١ ليتر ماء

كرات اللحم:

٣٠٠ جم لحمة مفرومة

بصلة مفرومة + فص ثوم

ملعقة بقدونس

ملعقة خبز مطحون (بقسماط)

١حبة بيض

ملح – فلفل اسود

نصف ملعقة قرفة

رشة جوزة الطيب

تخلط كل المكوّنات وتشكّل كويرات وتترك جانبا

طريقة التحضير

يوضع الزيت مع قطع اللحم، البصل والثوم ويقلى جيدا
ثمّ يضاف الحمص، ورق الكرفس، الكزبرة والبهارات وتضاف اليها الطماطم المفرومة وكرات اللحم
يضاف بعدها الماء ومعجون الطماطم ومرق الدجاج
تترك على النار لتنضج ثم يضاف الفريك ويطبخ لمدة ١٥ دقيقة
تضاف الكزبرة وحبات الفلفل الحار والنعناع اليابس (اختياري)
ويقدم

السلام عليكم ورحمة الله وبركاته

انا هذي هي طريقتي في عمل الشربة فريك راهي تجي بنينة ياااسر

شربة بطريقتي الخاصة

وبالنسبة للون الاحمر ماعليك غير على الفلفل الاحمر المطحون " التابل "

كل وحدة و طريقتها ….
ممكن طريقة مريم أو زهور ….فقط عندنا لا نضيف الحمص أو الجلبانة
يا إما الفريك أو الشعيرية …-لا إضافات –
بالتوفيق

شكرااا لكم اخواتي

حبيت نعرف كي نشوفها ناقصة حمورية نزيدلها طماطم حب ام مركزة

اختي احنا في قسنطينة ما نديروهاش بالحمص ندير حبة بصل حبة طماطم مربية الملح والتوابل كرافص نقصو رقيق الثوم واللحم ومغرف طماطم ماركة تركية مافيهاش الحموضة ابدا ونقلي مليح في الزيت وكي يتقلي امرقيه وكي يغلي ارمي الفريك حسب افراد العائلة وخليه يطيب ولكان جاءك نا حمورة زيديلو طماطم المصبرة كما قلت لك انا نستعمل الطماطم التركية رائعة جدا اتمنى ان اكون قد افدتك و شهية طيبة هههه وماتنسايش الدبشة في الاخير

لك الشكراختي ايمانو

كيما قاتلك اخت ايمان مقادير سهلة وبسيطة أكدي غير على لفريك وتلبية الشربة وشهية طيبة

ا

ختي احنا في الجنوب و خاصة منطقة بسكرة مختلفة عليكم في حاجة برك تفضلي الوصفة
شوربة فريك : قطع لحم او دجاج و الشوربة ليها اللحم افضل +فصوص ثوم مهروس+حبتين طماطم متوسطة مرابية + ملعقة ك طماطم مصبرة او حسب الكمية نتاع الشربة تقدري متكثريش من بعد تذوقي+ ملح + فلفل اسود + راس الحانوت +فلفل احمر احنا نستعملو الحار و انتوما تستعملوا البارد نظن + تخليهم يتقلاو مليييييح ثم تضيفي الماء حسب راي عينك واش يكفيك و تخلي اللحم يطيب كي يلحق قريب يطيب ديري قدر فنجان نتاع فريك احنا نحبوه يكون لونوا اخضر هداك هو لفريك الزين و نديرولو ربطة نتاع كرافص باه تترك رائحة باهية و طعم و تخليها تطيب حتى يطيب لفريك و كي تبداء تتخثر معاناها راهو بدا يطيب لانوا هو لي يخليها تخثار و زيديلها حبة فلفل اخضر و انت تذوقي اذا لازم تزيديلو الطماطم او لا على حسب واش تحبوا و زيدي نحي الربطة نتاع الكرافص و بعد ما طفي عليه افركي في يدك قليل من النعناع اليابس و اضيفيه يعطيه مذاق رائع
اختي فيما يخص لحمورية هو بطبيعتوا يجي احمر و لكن متقدريش تزيدي الحماضة اكثر من اللازم و ذوقي
الاختلاف في انوا حنا ننصبوه بالثوم و ليس بالبصل و جربي الوصفة

حباباتي واخواتي وكل الاحبة في منتدانا الغالي نرحب بيكم
ونحطلكم الفطور باش تشاركوني فيه ويولي الماء والملح بيناتنا كيما يقولوا ونعرف كي تاكلوها معايا تخلفولي البركة
مرحبا بيكمبالشفاء والهناء

مشكورة حبيبتي ع عزومة الافطار
سلمت يداك
دمت بخير

سلام عليكم ورحمة الله وبركاته
ماتلعبيليش الغولة انا انجي انتاع الصح ولا ماناكلش بعينيا
تنويع رائع. اللهم بارك
ربي ايدوم نعمته عليكم
بصحتكم اختي

مممم راني كليت حتى شبعت ديت حق ليلى خطراه راهي روطوار
كلاك بوبي هههه شكرا حبيلتي فطور يشهي

ما شاء الله خير و بركة

وحتى انا يا منافستييييييييييييييييي ما عندي ما نقووووول تبااااارك الرحماااان وكلينا الملح صحييييييتي على الدعوة

ماشاء الله
بالف هنا وشفاء

ربي يبارك فيك عرضتينا واشركتينا

اممممم ذكرتيني بلمة العائلة
ربي يدوم النعمة