مثقبة بالغرس (لبراج مبرجة) من مطبخي 2024.

بعد ما شهاوني الاخوات ام عبد الرحمان و ميس قلت هاد اليامات ندير المثقبة بالغرس (تمر مطحون) او كما يقولو البعض البراج المبرجة و تختلف التسمية حسب المناطق…

المهم جبت اللوازم و درتها و الحمد لله جات راااائعة ماشاء الله تذوب فالفم

* 3 كيلات سميد متوسط مخلطين بحفنة صغيرة سميد حرش.
* كيلة مرغرين ذائبة + 2 م ك سمن ذايب.
* ملح.
* ماء.
* غرس (تمر مطحون للحشو)

تخلطي السميد و المرغرين و الملح و تحكي ملييييييح بيدك (تبسسيها).
ابداي تشمخي بالماء لكن دون عجن كشغل راكي تشمخي الطعام و تلمي.
فوري التمر و زيديلو 1 م ك زبدة و خليه يبرد.
اقسمي العجين على2 شكلي دائرة صغيرة فوقها التمر و فوقها بقية العجين و حلي.
قطعي معينات و طيبي فمقلاة و لا طاجين.

تفضلن…

بصحتكم