اخواتي في الله اليوم موضوعي على الغيبةو النميمة و البهتان
بزاف فينا مايفرقش بينهم و يقع فيهم بلا مايعرف واش راه يدير و انو في مصيبة الله يعافينا منها
طبعا الاحاديث و الادلة راح تجي بعد في الفيديو اللي في الرابط ادناه
الغيبة هي انك تهدري على واحد او وحدة في غيابو بحاجة تكون فيه ويكره انك تهدريها عليه
البهتان راه اكبر خاطر تهدري على واحد بحاجة هو مافيهش من اصلو ..يعني تكذبي عليه
و النميمة هو انو تمشي بين الناس بالغيبة..يعني وحدة تهدرلك على عيوب وحدة يعني غيبة ..تروحي انت لهاذيك الوحدة
وتقوليلها شوفي واش قالت فيك ..وهاذي راهي فتنة عظيمة
يا بنات بزاف فينا توقع في حاجة من هاذو الثلاثة و العياذ بالله و ربي يلطف بينا و ب اللي توقع بيهم فيهم في ثلاثة
نسأل الله العفو و العافية
علابالكم يا بنات تبان ساهلة نهدرو في وحدة و نقولو ماكذبتش عليها ..فيها صح وش قلت
او تحسي باللي راكي تفرغي في قلبك برك ..تقولي الله غالب عليك و كنتي لازم تهدري
وكاين اللي تحس المتعة وهي تهدر على الناس
وكاين وين ماتحلاش القعدة تاع النساء او الرجال غير كون يمنشرو في فلان و فلانة
وين ولات الغيبة يسموها فاكهة المجالس
لازم نلحقو انفسنا و نتوبو ..والله ما راهي حاجة ساهلة..الشيطان عليه لعنة الله
راهو مبسطها و يشجعك انك تهدري و يقولك نورمال راكي تقصري برك ..
بصح في الحقيقة الغيبة و النميمة راهم اسباب ثلثي عذاب القبر نسأل الله العافية
شفتو شحال صعيبة ؟؟علاه الواحد فينا يشري في عذاب القبر بلسانو و هو قادر يحكم فيه و يخزي الشيطان
خير الواحد فينا ييتعلم يرطب لسانو بذكر الله عز و جل
سمعت على زوج حالات على خاتمة 2 نساء و علينا ان نختار اي وحدة فيهم نحبو نكونو مثلها
وحدة عجوزة توفاها الله وقصتها في الفيديو ادناه …توفت في المستشفى قال ابنها انو رائحة طيبة قعدت
تخرج من فمها اثناء الاحتضار لانها كانت تكره الغيبة و ترفضها
و شابة قريت عليها في كتاب اللحظة الاخيرة توفت و بعد تحكي السيدة اللي غسلتها ..للعبرة حكات و ليس لافشاء الاسرار..انو
كان يخرج من فمها الغائط و العياذ بالله اثناء اغتسالها..وقالو انها كانت تمشي بين الناس بالنميمة و تفتن بيناتهم
يعني حتى ولو القصص تكون غير حقيقة علينا فقط اخذ العبرة
يجب التوبة قبل فوات الاوان و تجي اللحظة الاخيرة
ونقولكم راهي مسألة اعتياد برك
بالاك اللي موالفة تغتاب تجيها صعيبة في الاول انها تبطل ..خاطر اي حاجة في اولها صعيبة ..الريجيم مثلا
وزيد الشيطان عليه لعنة الله راح يكون متربص و جاهز باش يخليك تتراجعي على قرار التوبة ..بصح مع التوكل على الله
عز و جل كلشي ساهل
هاذا رابط الفيديو
https://www.youtube.com/watch?v=cQFgzANo3bY
نسأل الله العفو و العافية
الله يهدينا
ربي يهديتا و يحسن خواتمنا
