على غير عادتي، جبتلكم اليوم غراتان الجاج، ساهل و بنين و خفيف، ما تضحكوش عليا
و شجعوني
المقادير موضحة في الصورة
و هي كالتالي:
صدر جاج مغلي في شوية ملح و مقطع
2 أنواع نتاع فرماج: أنا كان عندي غرويار و شيدار
حبة أة حبتين بيض على حساب الجاج
قطع فرماج لافاش كيري أو أي نوع تفضليه
و كلما كثرتي كلما أحسن (ماشي شرط العلبة كامل)
شوية معدنوس
فلفل اسود و شوية برك كمون
الحليب، الزبدة و الفرينة للبيشاميل
أول حاجة نحطو الجاج مع المعدنوس في الروبو و نرحوه
نضيفولو التوابل و البيض و شوية ملح إذا جاك مسوس
و مبعد تضيفي الفرماج بورصيو و الفرماج رابي (خلي شوية فرماج رابي من النوعين باش ديريه في البيشاميل و باش تحطيه من الفوق كامل)
خلطي مليح و خليهم
حضري البيشاميل كاعادة و ما تثقليهاش خليها جارية شوية و زيديلها الفرماج الرابي من النوعين
ادي كمية كبيرة من البيشاميل و خلطيها بعقدة الجاج و خلي كمية أخرى من البيشاميل وحدها
حطي شوية بيشاميل من التحت في الطبق كيما في الصورة
و حطي فوقها عقدة الجاج المخلطة بالبيشاميل و فرغي فوقها البيشاميل اللي بقات و ذري الفرماج رابي
دخليها في الفور اللي يكون سخنتيه قبل بدقائق و خليها حتى تتحمر و هذا الشكل النهائي
و بقالي شوية درتو في الكيسات ماكنش عندي ليبوات أليمنيوم صغار و حطيتهم في السنيوة يتحمرو
إن شاء الله تعجبكم الوصفة، و رأيكم يهمني
مممممممم فور بزاف أختي يعطيك الصحة و في أقرب فرصة نطبقو ان شاء الله ربي يحفظك
ننتظر جديدك
كيفاش نضحكو عليك يا نجمتنا
جاك فور بزاف
يعطيك الصحة
يعني كنت مخبيا علينا بلي راك فنانا فالطبخ
تسلم الايادي يشهي في انتظار جديدك
إن شاء الله طبقيه، شكرا اختي نور
نورتي
يعطيك الصحة
احلى تقيم لعيونك
