طلب مساعدة من شاطرات المنتدى 2024.

صباح الخير عليكم حبيت تساعدوني بافكاركم فيما يخص الحلويات الجافة عندي عرس طفلتي في جوان ان شاء الله و يمى راح ديرلها حلويات جافة للقهوة حبيت تقتارحوا عليا كاش انواع عندكم و شكرا مسبقاالجيريا

واش رايك اختي اديري قاطو الجلجلانية قاطو بنين وشكلو متحوف انا درتو لخالتي في عمرتها واذا تحبي ديري صابلي وبشكل اللي يعجبك
لي عودة انشاء الله
ام لوجين حبوبة مبروك عرسكم

شوفي كيما قاتلك الجنجلانيات شكلو متحوف يهبل و شوفي تاع ام اماني ربي يحفظها شكلو يحمر الوجه

وكاين صابلي البيمو بصح في بلاصة البيمو سامبل ديري هاذاك تاع الشوكولا اللي فيه عينين و فم يضحك تاع الاولاد يخرج تحفة واللي ذاقوه الكل عشقوه

والديكور غطسيه في الشوكولا و زينيه بوريدات تاع عجينة اللوز الاصطناعية

شوفي القطيفة ثاني راااااااااااائع بالرغم ماهوش جديد بصح مازال حاكم مرتبة متقدمة ههههههههه

وكاين براسليات بالسكر الناعم داراتو ياسمين 177 ربي يخليها و صاحبتي جرباتو قاتلي يذوب في الفم يهبل

وكاين المقلش يعني المفشش هههههههه بالكاوكاو و الجنجلان و مغبر في السكر الناعم انا نموووووووت عليه و مايخطانيش في الاعياد

يعني حتى شكلو محترم في الاعراس خاكر يجي معين ابيض بالسكر الناعم

…كاين ثاني كحلوشي قلبو ابيض تجي عجينتو قهوية و الحشوة بيضاء خاطر بالنوا دكوكو ماجربتوش بصح صحبتي تقولي خفيف يهبل و انا نتخيل

القاطو اللي فيه نوادكوكو يجي متحوف و يجي بنين

على العموم زيدي شوفي كتب تاع حلويات الجافة او البنات هنا ماشاء الله شاطرين

عندي هاذ الانواع نتمنى يعجبوك وكلها وصفات ناجحة وبزاف بنينة
نبداو بالتميرات
الجيريا
وهذي حلوى النيسلي
الجيريا
وهذو هليلات الكوكاو
الجيريا
وهذا مقروط الطويسات
الجيريا
وكاين تان قلوب الشكولاطة تاع صليحة بسكري من قناة سميرة تان يخرجو يهبلو
اذا عجباتك كاش وصفة قوليلي نبعتهالك ونتمنى نكون فدتك
يعطيكم الصحة كامل و اختي ميرال اغطيني وصفة الهليلات بالكاوكاو و اختي سالي ممكن وصفة المفشش
ربي ايفرحكم
اختي ميرال. اعطينا ﻻروسات تاع التميرات اتبان هايلة
اختي ديري التشاراك العريان
و لا الغريبية
و لا الصابلي و يكون ديكور شباب
هليلات بحلوة الترك سهلة و اقتصادية
و هاد الهليلات هايلين
صح التشاراك العريان يهبل و انيق

ميرال حبوبة وصفاتك يهبلو اعطينا الوصفات

ام لوجين تفضلي وصفة المقلش

500 غ مرغرين طرية

كاس سكر عادي

نص باكي خميرة قاطو

غرفية اللي ناكلو فيها الشوربة كل واحد وحدو ماشي الكبيرة يعني 1 bol كوكاو محمص و مرحي

نص غرفية جنجلان محمص

نص كاس ماء الزهر

فانيلا

تخلطي الكل ..مارغرين و السكر وفاني و بعد تزيدي الكاوكاو و الجنجلان و اخيرا الخميرة و ماء الزهر و الفرينة

ماتعجنيش خلطي برك و تتحصلي على عجينة طرية شكليها كيما حبيتي

حبيتي في المول تاع المعمول او مربعات او هنا درتهم هلالات

الجيريا

وبصحتكم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.