السلام عليكم و رحمة الله و بركاته
ليووووووم مرانيش مليحة طول 
حابة نحكيلكم و نفرغ قلبي و نتمنى تجاوبوني و متبخلونيش بردودك .. انا استعمل هذا القسم حتى تتمكنوا من التعرف على صاحبة الموضوع فقد كان بامكاني استخدام قسم العضوية لاخفاء نفسي و لكن اريد طرح مشكلتي على الهواء مباشرة لعلني اجد يد المساعدة لعلني اجد ام ثانية تنصحني لعلني اتخطى مشكلتي بدعاءكم لي لعلني استرجع قواي بردودكم و تفاعلكم و تأثركم بقصتي ..
اسمحولي طولت عليكم ضرك ندخل ي صلب الموضوع مباشرة و بليييييييييييز حسو بيا و جاوبوني …
عندي عام و نصف و انا مخطوبة من واحد كبير عليا بــ 11 سنة و عايش في فرنسا بصح لعقلية نتاعو نتاع عربي حرررر
لي جا خطبيني قبلت به باسكو لباس عليه و قادر يتحمل المسؤولية و الله ربي ليعلم قبلت بنية اكمال ديني و لاغير -والله ثلا ث- ماشي علجال فرنسا المهم مطولناش و درنا العقد الشرعي و بعد شهرين درنا العقد المدني بصح في هاذ الترة الاخيرة لاحظت فيه حاجة و معجبتنيش حاولت نتفهم و نفهم منو بصح والووووو بدون جدوى ميحبش يناقشني يحب رايووو و ميحبنيش نهدرلو على المستقبل نتاعنا باختصار ميحبني نهدرلو لا على مستقبل و لا حاضر و لا ماضي مرانيش فاهمة هاذي العقلية و لي زاد قلقني اكثر انو يعيطلي و يحكي معايا ب ساعتين ب 3 ساعات والله راني كرهت منلقا واش ندر و نبقا نعس في روحي كشما نغلط نجبدلو على المستقبل يتقلق و و يقولي نارفتيني …
كيما اليوم قالي نزيد ايامات و نشري شومبرا كوشي … انا من نيتي والله خممت فيه هوا باسكو عايش في دار وحدو و بعيد على والديه يطيب وحدو و يدير الميناج و…و..و… قتلو قرب للعرس و اشريها باسكو تعبك لي تكون دير في الميناج و لاشومبغ لازملها عناية و ليموبل يحكمو الغبار اااااااااايه طلعلو لينار و قالي دايرتني مسخ ولا !!!!! واش رايكم فهمتو فيها بصح كي والوووو… و من بعد في سياق الكلام جبدتلو على حبوب منع الحمل la pilul قتلو لانشربها ولا لا حابة يشاركني و يعطيني رايو منقدرش نتخذ قرار كيما هذا وحدي و خاصة انو العرس مبقلوش بزاااف لواحد يبدا يخمم في هاذ لي سوجي … هاذي لي غاضتني و خلاتني نندم حتى على زواجي بيه قالي اااااااايه منا لذاك الوقت و ربي يفرج لاه راكي تشوفي لبعيد و …. منكملش واش قال باسكو الدمعة راهي في عينيا …و الله كرهت نكون نورمال المورال طالع و لي نحكي معاه يتقلب نهار من الهدرة نتاعو ميحبش يحكي على لافونيغ ميعيطليش و منهدروش الهدرة التافهة لبلا فايدة …والله العظيم لراه في قلبي مقدرتش نعبر عليهه و ربي لي راه عالم واش راه صاري ..
كرهت وليت نشوف في زواجي زواج الندامة … نورمالمو راني فرحانة باسكو مبقاليش بزاف لعرسي مي انا طعم السعادة مذقتوش و لو لنهار واحد من الهدرة المملة …. نتمنى نكون خفيفة و تعاونوني و لو بكلمة انا اختكم في الله و انتضر ردودكم
دمتم في رعاية الله و حفظة و لا تنسوني بدعائكم
ربي يقدر الخير
يا اختي قلتي فرق السن 11 عام بيناتكم يعني هو في الثلاثينات عموما اللي يتزوجوا و فارق السن بيناتهم كبير يعملو فجوة في الحوار يا إما المرأة تعملها يا إما الرجل.. و هذا لا علاقة له بالذكاء و فهم الامور و كيما يقولو " شاربة من عقلها"
هو على حساب وش فهمت من روايتك هاذي انو ما يحبش يناقش في الامور الجدية لانه "الأعلم بها" حسب رايو أو ممكن ما يعرفش و يدي الغضب وسيلة للتهرب
و انصحك بكتاب بالبوصلة الشخصية و كتاب الرجال من المريخ و النساء من الزهرة و محاضرات الدكتور الشعال في الدورة التأهيلية للحياة الزوجية هاذ الثلاثة قمة و روعة
طلعيهم من النت و اسقطي عليه المعطيات حتى تتعرفي اكثر على شخصيتو و طريقة تفكيرو و ما يحب و يكره
و للمعلومة الهدرة الكثيرة قلتي بساعتين ثلاث .. تملل و تصبح دون جدوى و الاغلب تتحول لجدال و دواس
حاولي "تدربيه" تدريجيا على نقل الحوار و التقليل من الحكايات غير مفيدة لانو جايكم الوقت اللي تحكو فيه
و فوق كل هذا عليك بالاستخارة ليوم العرس و انتي تستخيري ياما بنات لقاو انهم مش مرتاحين و اكتشفوا امور ما يحبوها ليلة قبل العرس و بطلوا
احنا مانا باغيين توصلي لتلك المرحلة لا قدر الله لكن وازني بين ايجابياتو و سلبياتو و ادرسيها بغقل
كيما قال احد المحاضرين" البسي نظارة كبييييييييرة و دققي في امرك لما يتم الزواج ارميها و البسي اخرى سوداء"
الله يوفقك
و اي شيء انا في الخدمة ان شاء الله يبقى الموضوع مفتوح للحوار
هو العقلية نتاعو يحب يعيش ليوم لرانا فيه ميشوفش لبعيد و هاذ الشئ قلقني بزااااااااااااف و كرهت الهدرة معاه و كرهت حتى نسمع صوتو مالقري مغلطش معايا و يديرلي لي نحب بصح العقلية نتاعو مخرجتنيش الله غالب و مارانيش حابة نتخذ قرار يغضب والديا عليا ولا نكون ظلمتو .. المهم عاونوي بدعاءكم و متنساونيش والله كل ميفوت عليا يوووم نزيد نخاف كثر و كثر رايحة لبلاد الغربة لا اهل و لا اقارب كاين غير ربي سبحانو في ذيك البلاد خايفة نروح و يردمني و يتبدل عليا … وليت نوسوس ومرانيش مرتاحة باسكو عقليتو لوصلتني لهاذ الحالة ………
حابة نحبس الهدرة معاه حابة نقعد هاذ الاشهر لبقاولي وحدي نقعد الالالالاز نرتاح من الضغطوات و تكسار الراس …. لا حولى ولا قوة الا بالله
ربي يكون معاااااااك والله ما عرفت واش نقول
اكثري من الاستغفار مادامنا هاد الايام ايام زينة كثري من الدعاء و الصدقة
واستخيري
ان شاء الله ربي يريحك و يقدم اللي فيه الخير
اخيتي ملاك ربي يريح بالك
انتي مقلقة لانو ما بقاش على العرس و رايحة بعيد و تبداي تشوفي في سلبيات الراجل و تقولي " هذا هو خلاص الراجلي اللي نعيش معاه طول؟" تجي هاذ الفترة طبيعي لكن ما تخليهاش تطغي عليك
مدة 3 سنوات كفيلة بانك تعرفي زينتو من شينتو و رأي الاقرباء اللي يعرفوه ايضا ديري عليه خصوصا الوالد الكريم ما يعرف الرجال غير الرجال..
اما عقليتو اعرفي قبل وش ما يعجبكش اكتبيه في ورقة و شوفيها .. وش تقدري تتغاضاي وش لازم تحطيه عن الحد..
و ابدا ما تتصوري انك رايحة تحكمي ممحاة و تمحي وش ما تحبي و تخلي اللي تحبيه هاك و هاك و الناس عقليات..
تقدري مرة تسقسيه وش يتعبو في الهدرة معاك ثم ارمي السؤال عليه علاه ما تحبش نهدرو على مستقبلنا .. اعطيني صورة واضحة..
القاي بداية الخيط و واصلي
ربي يعاونك و يريح يالك و راني ندعيلك ان شاء الله
انتي برك ما تتقلقيش لانها فترة و تعدي
سلام
على كل حال اشكر الله الذي اعطاني قوة الصبر و التحمل و عدم العصيان لوالدي و لزوجي رغم معاناتي معه و اشكر كل من ردت ولو بحرف واحد على موضوعي و ادعو الله ان يجازيه كل خير و ييسر لها كل ما في قلبها و يرزقها الزوج الصالح ان كانت غير متزوجة … اليوم انا في مزاج حسن لانني اكثرت من الدعاء فرتاح قلبي و الحمد لله
دمتن في رعاية الله و حفظه
