هههه موضوع الكيكوطة تاع السيدة المحترمة هنا نور خلاني نغير ونعرض عليكم حاجاتي الجديدة وخلاني نكتشف احد اقسام المنتدى الرائع لي هو قسم التجارب والحلول المنزلية .
المهم بارك الله فيكم على المجهودات القيمة وصدقوني نحن نعرض اشيائنا فقط للإستفادة من بعضنا وتبادل الخبرات وأيضا باش تورولنا لحوايج لي مانعرفوهمش
وأنا فالحقيقة حابة نستفسر على كثير من الامور من خلال موضوعي هذا
المهم رايحة نزدم ديركت فالموضوع
من حوالي شهراشترى لي زوجي مقلات أسمها
قال لي بما انك رجعتي غير نتاع سوفلي وبيزا وتطبيق من الانترنت وعجباتو والحمد لله كل اطباقكم الناجحة كافاني بيها .. وأعود و اكرر الفضل يعود لكن طبعا (( علاخاطرش صدقوني البيزا كنت بمجرد مانسهع واحد يهدر عليها ولا نشوف اشهار فالتلفاز نتشهاها بزاف ونموت على البيزا تاع ليبيزيريا وكل مانشوفها نقول لعبودي جيبلي بيزا يقولي اطلبي كلش الا البيزا مانظلش واقف 15 دقيقة نستناها تجهز .. غير كي يدخل مع صحابو ياكل لي يكومونديها وتجهزلو اثناء فترة الاكل لي يجيبها ههه ))
و الآن و الحمد لله وليت غير نتوحشها نديرها وماعدتش نتشهاها كيما زمان وتخرجلي تهبل ماشاء الله عليا
هذا فالفرن الكهربائي العادي كيما لي عندكم اغلبيتكم .علابالي طولت بزاف واعدروني مشتاقة هدرة (( ماعنديش لمن نفضفض ))
هما دايرين فالكرطونة بلي يطيب فيها كلشي حتى الاسماك و الارز ومصورين حتى الكسكس ياعاجبا وولكن ونظرا لشروطها الكثيرة تخوفت منها شويا .. وراني حابة تفيدوني لي عندها اي معلومة
طيبت فيها المرة الاولى البيزا وتبعت كيما فالكاتالوق بلي للبيزا دير درجة الحرارة هي 05 درجة لكن تحرقتلي فالجوانب 
لكن صدقوني ذوق بيزا تاع بيزيريا ومختلف تماما عن الفرن العادي ..
المهم التجربة الاخيرة تاعي فيها طيبت فيها المطلوع وخرجتلي شااااابة وكبيرة كبرتها بحجم المقلات ودرت درجة الحرارة 3 والحمد لله طابت بسرعة وبدوووون حرق ..
والتجربة الثالثة راني نستناها من عندكم 
صور من مقلاة البيزا الكهربائية
الحاجة الثانية هي وأخيرا شرالي ميكروويف 
من أسبوع تقريبا منو فرن ومنو ميكروويف ..
يعني يطيب ويسخن
لكن مادخلتش في راسي انو يطيب ويشوي اللحوم
..
أمالا لي عندها معلومات تضيفهالنا وخصوصا تجارب شخصية من فضلكن .. لأني حاليا استعمله للتسخين وفقط وللتذويب اي ديكونجلي المجمدات بما انه فيه خاصية أو قفلة ديكونجلي المجمدات وهو رااااائع للتسحين والتذويب ..ولكن جزيل الشكر .
اترككم مع صور من الميكروويف
لونه
Grenat فقط بما اني صورته فالصباح الباكر جاو مظلمينتحياتي للجميع .
وثانيا
اهدري براحتك وطولي كيما حبيتي انا والله نستمتع بزاف كنقرالك
وثالثا حوايجك هايلين
رابعا ربي يخليلك عبودي ولا عبودك باش متزعفيش وبيقى يجيبلك كل غير المخير لانك انت المخير تاع المخير ههههههه
حامسا
ربي يفرحكم لما تتمناو
خامسا بزاف درك تقولي محبتش تسكت المرا هذي
والا عندك وقت راح نرجع
عندي سادسا و …….حتى لعاشرا
العنوان فوووووووووووووووووووووووور
والف الف مبروك على المقلاة والميكرويف
المقلاة هاديك كنت نشوفها بصح والله ماكنت نعرف لواه تستعمل حتى دورك راكي تقولي حاجة مليحة والله بصح بقداه تعمل خوخيتا ههههههههههه راني خارجة من دزة نخاف نقوله شريهالي يبعتني نضيف لدار بابا ههههههههههههههههه
والميكرويف فعلا شي رائع انا شريت العام الي فات ماركة كوندور وكنت حطيت موضوع ماعرفتلوش وقتها بصح دورك مانستغناش عليه
ايه والروبو نتاعك الي راه محطو فوق الميكروييف خوه نتاعي حي مكتف خوه باباه ههههههههههههه
شريته من اربع سنوات وقتها 7000 دج
بصح نستعمله قليل لان عندي واحد اخر سهل لانه ينرفزني كي نروح نقفله يقلق
والله انا استعمالي له تسخين فق ولا ديكونجلي فيه اما طياب جربت وجربت ولا حاجة تنجح
وغير اهدري على روحك انا نموت على الهدرة والشياخة سورتو لي تظحكني وتفيدني . راني نستناك حتى لعشرة مرات كيما قلتِ هههه
هههه شفتي خوخة الغيارة هههه ..
شعارنا (( لا للطياب فالميكروويف )) هههه
هذا شعارنا .
تحياتي حبيبتي
المهم رح انفيداك : المقلاة هاديك تع البيتزا طيبي فيها تقريبا كلشي وتصلح لحوايج بزاف جربت فيها البيتزا الكسرة الروز فوريه او غالبيه وكي تولي راح تسقه بلاصوص حطيه تم في الداخل وحركي يجي بنين
طيبي فيه المحاجب المسمن البراج المطلوع الحوت يجي مشوي فيه روعة مع انك تكوني تباتيه من قبل مع شوي زيت وتحركيه
اديري فيها الشواء اي تحبي تشوي اللحم او الكبدة يجي روعة
– استناي نتفكر ؟؟؟؟
البغرير ثاني المهم هي متعددة الطياب
الميكرووند معروف اعليه انا ما نستعملوش بزاف ندوب فيه الزبدة وندوب الشيكولا نحط الباطا تع الشيكو نفرغها في صحن ونصب فوقها الماء ونحط حتى تدوب تجي تهبل وما تتحرقش
ونديكونجيلي فيه
المهم الا تفكرت اني نقولك
ضحكتيني كي قلتيلها استناي نتفكر
