بالنسبة للقاطو الأول :قاطو الجوزة معروف جدا
العجينة:250 غ مرغرين +125غ سكر نخفقهم جييدا+2بيضات+فانيلا ونجمع بالفرينة دون عجن باش متجيش يابسة ونحاول منكثرش الفرينة
ونشكلوهم عادي في القوالب الخاصة اللي تجي فوق الغاز او نجيبو ليمول اللي يعجبونا ونطيبوهم فيهم في الفرن
وبعد مايطيبو في فرن ساخن 200 درجة نخلوهم يبردو
ونحشيوهم إما بالنستله أو بمزيج من شوكولا تاع نوتيلا وكوكاو محمص ومرحي وشوي حليب ومن بعد نلصقو حبة فوق حبة بالمعجون
وهاذوك الحبات اللي فوقهم الجوز راهم بالنستله
[COLOR="rgb(139, 0, 0)"]بالنسبة للقاطو الثاني[/COLOR]:
هاذيك البيضة اللي في النص هي مخبز البيضة لازم يكون عندك المول نتاعو
مقادير المخبز:3 كيلات لوز أو أي مكسرات تحبي+كيلة ماشي معمرة سكر +زاست القارص+رشة فانيلا ونجمعو مرة ببيضة كاملة ومرة بالصفار باش تجي كمية الصفار اكبر من البياض وهذا يخليه طري
ومن بعد تطيبيه فليمول نتاع البيضة باش يجو كامل قدقد ولازم ميحمارش في الفرن جيست ينشف خرجيه وعسليه وخليه يقطر(وهاذي سر من اسرار طراوة المخبز)
وكي يبرد حضري القلاصاج:باش يجيك طري لازم كمية من الفوندون اللي يتباع
المقادير :2 بياض بيض جديد
الشاربات وطريقتها في الاخير نقول عليها بالتفصيل
حوالي فنجان سكر ناعم منخول
فانيليا
وفوندون مذاب
[COLOR="rgb(139, 0, 0)"]الطريقة:[/COLOR] 4 خطوات سهلة جدا
1/ لازم نخفقو البيض بالباتور حتى يطلع كالثلج
2/ومن بعد نزيدو القطر بالشوي برك والباتور راه يخلط كيما نديرو الزيت في المايونيز غير بالشوي حتى نكملو وتكون الباتور مسرعة وبعدي باش ميطيرلكش السكر ويحرقك
رح تلاحظي بلي البيض هذاك ساخن وثقيل شوي كملي اخفقي حتى يبرد ملييييح
3/ومن بعد زيديلو السكر الناعم مرة وحدة
4/ومن بعد ذوبي الفوندون وعاودي شغلي الباتور وكبيه كامل بويسك راهو سخون لازم نخلطو باش ميطيبش البيض
وخلاص كملنا القلاصاج يجي طري ويطول بفضل الفوندون
واذا حبيتي تلونيه حللي الملون في ماء زهر مليييح اولا ومن بعد ضيفيه
وقلاصي القاطو وخليه ينشف مليح ومن بعد ديريلو الناكخي الذهبي نورمال بالبانسو او البونجة باش يجيك هذاك الكولار الباهي
اما طريقة صنع الاعشاش
هاذيك اللي في الفوتو اذا دققتي مليح مجرد ورق فوتناه في ماشينة البقلاوة في جيهة الرشتة ومن بعد لفيناه على بعضاه غير ديكور برك
بصح اذا حبيتيه ديكور ويتكل في نفس الوقت
♥♥♥♥
ديري كمية من القطايف بنفس الطريقة وطيبيها وعسليها غير شوي وكي تقطر مليح حطي فيها البيضات تاع المخبز
واسمحولي على التأخير كنت رح نعملهم بالصور من مطبخنا بصح الكاميرا خسرتلي الله غالب
عندي وصفات بزااااف حابة نفيدكم بيهم بصح لازم صور توضيحية على طرق التشكيل باش تفهمو اكثر
♥♥
♥♥
اه نسيت طريقة القطر:
كاس ماء + كاس ونصف سكر على نار متوسطة بلا مانحركوهم نخلوهم حتى يذوب السكر ومن بعد يغلي حوالي 10 دقائق ولازم يوصل لدرجة حرارة معينة تعرفيها بهاذ الطريقة
كي تشوفيه ثقال جيبي مغرف وهزي بيها شوي من القطر ومباشرة كبيه في كاس ماء باااااااارد ومن بعد دخلي صبعك واذا قدرتي تشكلي كرة صغيرة من هذاك القطر اللي كبيتيه في الكاس معناتها راهو واجد
اما اللي ميخافوش من الحرارة : اجبدي شوي من القطر بملعقة ودخلي صبعك في ماء بارد جدا ثم حاولي تسحبي كمية من القطر من الملعقة بين صباعك السبابة والابهام واذا تشكلتلك كويرة راهو واجد
وهنا طفي عليه وازربي اخدمي بيه قبل ماييبس ويولي حجرة وحدة
2/بالنسبة للفوندون يذوب على حمام مائي
ان شاء الله تكونو فهمتوني
لبنات كاش حاجة مفهمتوهاش او اي استفسار راني حاضرة ان شاء الله
هذا المول تاع البيضة يشبهلو بصح مفيهش هاذيك النقوش اللي من فوق مخدوم بالسيليكون
وطريقة تشكيل العش كيما هاذي ولكن تكبريها شوي
وطيبيهم ومن بعد عسليهم نورمال بعسل ثقييل
تستاهلي احلى تقييم على مجهودك
