حبيباتي الغاليات
يوم الجمعة
عيدنا نحن المسلمين
فهو اليوم الذي يجتمع فيه الأحباب و الأهل و سائر المسلمين و المسلمات
و يلتقون فيه على المحبة و الطهر و الطاعة في الله عز و جل
لكن الله كرم يوم الجمعة بفضائل
خاصة به عن سائر أيام الأسبوع
فهو يوم عيد متكرر كل سبعة أيام،
وهو يوم عبادة،
وهو في الأيام كشهر رمضان في الشهور،
وساعة الإجابة فيه كليلة القدر في رمضان،
والصدقة فيه خير من الصدقة في غيره من الأيام،
وهو يوم تكفير السيِّئات،
فعن أبي هريرة رضي الله عنه أن رسول الله صلى الله عليه وسلم قال:
(خير يوم طلعت فيه الشمس يوم الجمعة: فيه خلق آدم عليه السلام، وفيه أدخل الجنة وفيه أخرج منها، ولا تقوم الساعة إلا في يوم الجمعة)
لكنه أيضا يوم عطلة مفتوحة رسمية لنا
نحن ربات البيوت
فالعاملات الموظفات
يعتبر يوم الجمعة يوم هلاكها
مع أشغال البيت
المتراكمة عليها طيلة الاسبوع
و هو يوم تعب ربة البيت الماكثة في البيت
التي تركض و تجري و تلهث وراء أبنائها و أشغالها
دون أن تلحظ أنه يوم عطلتها فتخصه بالراحة و الاستجمام
فكيف تقضين حبيباتي
يوم الجمعة في بيوتكن
كيف توازن بين أعمال البيت
و أداء العبادات التي
لا تعوض بثمن في هذا اليوم
و بين الراحة و الاستجمام
و بين زيارة الاهل و العناية بأنفسكن و بالأسرة ووووو
أفتح لكن المجال لتفدن
و تستفدن
و تصنعن لنا برنامجا متكاملا خاصا بعيدنا الأسبوعي
يوم الجمعة
من رحيق خبراتكن و أفكاركن
أنا يوم الجمعة أسعذ الأيام لقلبي نجتمع فيه مع حباب قلبي زوجي و ابنتي إلي يكونوا غايبين عليا كامل الأسبوع
يعني نبدا نحكي من ليلة الجمعة نكون محضرة العشا مسبقا يبقى غير القلي و السلاطة
ندخل الدار متأخرة بحكم نجيب بنتي ندخل على السابعة
و تبدا الساعات الجميلة في البيت و تنبض روح الاسعادة في أركانه
ضحك و لعب مع ماريا و حكايات، بنتي عمرها عامين لكنها فصيحة اللسان ربي يسترها من العين
تبدأ تذكر كامل واش دارت و تحكيلي كل حاجة تفكرتها زعفتها أو فرحتها لكن على مراحل متباعدة
يعني كل ما تتفكر تقول و أنا فرحتي لا توصف بسماعها و هي تحكي و تحاول تفهمني بمفرداتها البسيطة المتلعثمة كلمة نفهما و كلمة لا.
المهم نتعشاو كامل العائلة
نغسل الماعن علىالسريع و نحضر واش ندير غذا الجمعة لازم يكون حاجة يحبها زوجي
نغير ملابسي و نلبس أحلى ما عندي و نقعد نتسامر مع زوجي في كثير من الأحيان على صينية لتاي مع مكسرات
في صباح الجمعة نوض نحضر القهوة للحباب تكون معاها رشة دلال
نعملهم واش يحب قلبهم الفطيرة ، المبسس…
من بعد زوجي يذهب إلى السوق ثم إلى الحمام و أنا نستحم في الدار
عادة نستحموا يوم الجمعة اتباع سنة نبينا
نحضلا الغذا و نقي الدار مع حركات ماريا الشقية تهبلني تحب تعاوني
لما يجي زوجي نستف المشتريات و نحط الغذا
هو يروح المسجد يصلي
أنا نصلي في الدار
نغسل الماعن نحرص باش نهار الجمعة ما نغسلش القش باش ما يشدنيش على حبابي.
في المساء إلا كان الجو مليح نخرجوا مرة لحديقة التسلية مرة للغابة مرة عند الأهل
و مرات نبقاو في الدار على صينية القهوة بالحلويات و أكديلي على حلويات يوم الجمعة
قيل المغرب نقرا جزء من القرآن
و يمضي اليوم في جو لا مثيل له طوال الأسبوع
نقارع يوم الجمعة من بداية يوم السبت بفارغ الصبر
الله لا يفرقني على حباب قلبي
من افل الايام الى قلبي يوم الجمعة
مع اني نتعب فيه بزاف
كالعادة نو الباح نوجدلهم القهوة ونسجي الغدا
وكينوض زوجي والاولاد لازم يلقاو الغدا تقريبا طاب على خاطر لازم نخرجو نروحو للسوق
نشرو مستلزمات الاسبوع
هذا طبعا كيكون الجو مناسب
لكن مع الشتا وليت منخرجش
ونكتفي بكتابة ليستا طويلة وعرية وفيها كل التفاصيل
وزوجي يتولى مهمة قراءة الورقة واحضار مافيها
والله ماعلابالي وعلاه نكتب بالدارجة ومن بعد ندخل جملة ولا كلمة بالفصحى هههه
المهم
يخرج زوجي وانا نرجع لشغل الدار
ندير الاعما اليومية
يعني منحبش نكثر باش كيرجع زوجي مايصيبش الدار مبعثرة
غير كتكون عندي حاجة ضرورية ولازم نديرها
وكيرجع انظم واش جاب
وكالعادة تبدا ماساتي في تنظيف الحوت الجاج ولي زابا هههههههه
نتحمم عالسريع ونحط الغدا
وبعدها يروح زوجي للمسجد وانا نصلي فالدار
كيرجع نخرج كييكون الجو مليح نروحو عادة لحديقة التسلية
ووكنرجعو نسجي العشا ونسهرو مع التيلي
وانتهى يومي باذن الله
إذا حبيت نهدر على روحي
يوم الجمعة هو يوم ميلاد جديد ليا
في كامل المجالات
على خاطر أنا نحس أنه كل يوم لما نوض الصباح
نحس كلي زدت من جديد على خاطر ربي رزقني برد روحي إلي
نعتبرها فرصة جديدة
باش نعيش اليوم أحسن من البارح
و نحل اليوم اللي ما قدرتش نحله من مشاكل البارح
(أو ماغفلت عن حله)
فيوم الجمعة بالنسبة لي فجر جديد في حياتي
عيد مولدي و عيد المسلمين
عنده وقع خاص و معزة خاصة في قلبي
نبداه بتفاؤل و فرح ملحوظين
سبحان الله
مباشرة للشبابيك
نفتحها
نحب نشم ريحة الصباح
(ههه زعمة الصباح عنده ريحة)
نسيم الصباح يشرح نفسي و يعطيني دفعة و سعادة و تفاؤل
و رغبة باش نفوت هاد النهار أحسن من أي يوم معا أحبابي
نفتح التلفاز على قناة القرآن
و نروح نشرب الخمارة و العسل الحر
و نوجد القهوة
بيلاما ما جاوا والديا يتقهووا
أنا نروح نسيق الفيراندا و الدروج و الحوش و المدخل
إضغط هنا لرؤية الصورة بحجمها الطبيعي.
من بعد نطلع نحط الصينية نتاع القهوة
و نتابع آيات القرآن
بعد القهوة
نروح مباشرة للكوزينة
(على فكرة كوزينتنا نشبه لهادي الى حد كبير
بصح تقول راكم تشوفوها فالمراية
كلشي بالعكس
و الكويزينيير بيضا و الطاولة مستطيلة)
نغسل الفرن و البوتاجي
و نبدا ندير فالفطور
طبعا الطعام هادا شي مؤكد
و نخلي اختي تكمله و نروح نكمل باقي الميناج
يكون خفيف لأنه ماكاينش برنامج
نمسح الأرضيات
إضغط هنا لرؤية الصورة بحجمها الطبيعي.
و من بعد نروح نوجد قش الصلاة لبابا
نحدده و نعطره
نفطروا و بابا يروح للصلاة
و ماننساش نعطيه مال الصدقة اللي مخصصاته ليوم الجمعة
(دايرة فنجال كبير في الرف العلوي للبلاكار في الكوزينة
ندير فيه باقي المصروف اليومي نتاع الدار
ولا أي صرافة نلقاها في طريقي لما نكون نخمل في بيتي ولا بيت خوتي ولا والديا
و نهار الجمعة نرفد هم و بلاما نحسبهم نديرهم لبابا في جيبه و نقوله يديرهم في صندوق الزكاة في الجامع)
أنا نصلي الظهر معا ماما و اختي
خاوتي ماينوضوش بكري عادة يوم الجمعة
بعد الصلاة
قيلولة قصيرة
و نوض نوجد شي حاجة تقليدية للقهوة
كيما المدربل ولا المبسس ولا مسمن
أو بغرير
كيما يحب خاطرهم
ولا أحيانا نشروا السفنج رائع
و من بعد القهوة مرات نروحوا عند دار عمي نزوروهم
ماشي دايمن
لكن مرات
لأن في الغالب الأهل هوما اللي يجوا لعندنا
و المرات الأخرى
بعد صلاة العصر و التسبيح
نحاول نقرا سورة الكهف
و جزء من سورة البقرة
إذا ماجاوش عندنا ضياف
و نروح نريح شوية على النت
قبل آذان المغرب بربع ساعة
نبدأ بالدعاء و الأذكار
لأنها ساعة إجابة
نصلي المغرب و نسبح
نروح نوجد العشا معا اختي
على خاطر كل واحد يحب يتعشا حاجة
بابا عشاه وحده على حساب الريجيم نتاعه و ماما عشاها مرات كيفنا و مرات كيما يكون في خاطرها
و خاوتي حكايتهم قاع وحدخرة
عشاهم دايمن قلاش
و غالبا يحبوا يشروا العشا من برة
و مرات نوجدوهلهم فالدار
المهم يكثروا علينا الخدمة على هاداك الشي نتقاسموا الخدمة انا و اختي
من بعد
نروح نتفرج بعض البرامج
تكون مبرمجة يوم الجمعة
نصلوا العيشا
و نتعشوا و صلى الله و بارك
نكون فوت أجمل يوم يمر عليا
بكل فرح و هنا و سعادة
الحمد و الشكر لله
و نروح نجهز روحي للنوم لأستقبل في الغد فجر يوم جديد
شكرا لك حبيبتي أم سرين
دايما مرورك مشرفني
