قطر الندى . تحتاجكم

السلام عليكم اخواتي….. انشالله تكونوا بخير

اخواتي العزيزات ابنتي قطر الندى راني حابة ندخللها الماكلة و معرفتش باش نبدا
و شعال نوكلها من خطرة في النهار و شعال نمدلها
ادا ممكن تساعدوني ……..
و شكرا مسبقاالجيريا

المتزوجات انشاءالله يفيدوك ربي يشدلك قطر الندى
ﻻ اعلم اختي
ان شاء الله يفيدوك اصحاب الخبرة
شكرا حبيبتي
والله من جيهتي بديت لاولادي بالبطاطة وجزرع وقرعة لكن من قبلهم الفرينة اييه هي الاولى مرة للفطور ومرة للعشا والخظرة نفورها نرحيها ونزيدلها حبة فرماج تكفي وغير بشوية ونساعفها خاااطرش في الاول ترفضها وتقيسها فهمتي ومنبعد دخلت الياوووووووغت ”جاغفي” وهكذا اختي

شكرا اختي نورهان
اولا اللي يكون يرضع الصدر حتى ل6 اشهر عاد تدخلي له الماكة اما اللي يرضع القرعة على4 اشهر
تبداي بالبطاطا و الجزر و القرعة فوري و طحني بالفرشيطة ماشي بالميكسور باش تتعود ليسطومة تطحن وحدها و تانيك في المساء فوري ليها حبة تفاح و طحنيها
اما شحال من خطرة فطور و مساء
ان شاء الله نكون افدتك
اييييييه يا لحبيبة ابداي بالفرينة كيما قالت نور فرينة* فيقور*نتاع الذرى هي الاولى بالتدريج مرة في النهار تحبي تخلطيها في الماء ديري زوج ملاعق فرينة وملعقة حليب وخلطيها في طبسي وتكون وتكون شوية جارية واكليها بالملعقة او تحبي في البيبرون ديري تسعين حليب وملعقة الى ملعقة ونصف فرينة وخلطي وتكون جارية واثقبي التيتين نتاع البيبرونة ثقبة كيبرة على خاطر راهي تتبوشا راني عطيتك غير كمية صغيرة حتى توالفها وزيدي في الكمية وكي تتعود على الاكل والملعقة انا نفضلكي اديري المرقة تلوحي فيها على جال بنتك حبة جريوات وحبة جزر وحبة بطاطا يجوا بنااااااااااان خير من المفور يجي سامط وعبزيه بالفرشيطة ووكليها واذا رفضت ما تغصبيهاش عليها بالرحمة وكي تتعود مليح عل الاكل عودي غديها واش قلتلك بطاطا ووو وعشيها فرينة والياغورت خليها حتى تعود في تسعة اصلا جاية السخانة والاولاد ما ياكلوش كثريلها العصائر خاصة عصير الطماطم و البطيخ وبلاكي من الفقوس والخيار و البرقوقة والموز حتى تعود في الشهر التاسع المهم انت ابدئي بالتدريج كل مرة ذوقيها حاجة حتى تتعود وما تغصبيهاش باه ما تكرهش الماكلة وما تنسايش تشربيها شوية مااااااااااااااااااء على جال الامساك ولعقة زيت زيتون مع البيون نتاع الخضرة وفي العشية وقت العصر تقدري تديريه دائما للفواكة المطبوخة كيما قالت الاخت فايزة تفاح او اجاص مفووووووور ربي يحفظلك البنوتة

كيما قالوا الاخوات بداي بالخضار هي الاولى يلا بديتي بالفاكهة تتعود على الحلاوة وترفض المالح،لكن لازم تكون بكمية قليلة فالبداية حوالي ملعقتين كبار وكل يوم زيدي فالكمية حتى تتعود مع الوقت .تقدري تديري كل أنواع الخضار تفوريها ،زديلها شوية زبدة و حبة فرماج وعتهالها فالفطور ،وفالعشاء عطيها فرينة فصحن أو فالببرون بعد مدة اعطيها فاكهة .طايبة ومطحونة تفاح أو اجاص أو موز بلام طيبيه تمرسيه برك ودخلي يوورت جارفي مع لعشية أو مع 9 يلا كانت تنوض بكري يعني وقت بعد ما تشرب حليبها.المهم يلا كانت ترضع قرعة على 4 شهور تبدا الاكل والفرينة الاحسن تكون سائلة ديريها فالببرون أما يلا كانت ترضع طبيعي 5 شهور بداي بالخضر.نتمنى نكون فدتك هاد المعلومات تلقيتها من أطباء مختصين هنا وربي يوفقك
والله حبيت نحط تعقيب للخت سطيف الباهية كي تكون أقل من8 أشهر الأحسن الخضر ما تكونش طايبة فالمرقة حنا نستعمل بهارات هي يديرولها وجع والمعدة تاعها خصها تتعود

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.