مطلوع الفرينة من كوزينتي 2024.

اليوم جربت مطلوع الفرينة جا خفيف و بنين حبيتكم تشوفوه و اذا عجبكم نعطيكم طريقة التحضير

اممممممممممممممم خصوصا كي كون سخون نموت عليه
يعطيك الصحة

يعطيك الصحة ليل الله يبارك راه يبان خفيف بزاف ماشاء الله عليك
انا ماكنتش نديروا كانو جيراني من الجلفة عطاوهلي مرة ولقيته خفيف ايا سقسيتهم بديت معتمداته

الله يبارك زيدينا في العطاء وخبرينا كي راكي ديري تصوري

شكرا لكن حبيباتي على الردود المشجعة

اما عن كيفية تحضير مطلوع الفرينة فهي سهلة

المقادير :

فرينة حسب الحاجة

خميرة خبز مخمرة في ماء دافي و نزيدلها شوية سكر

ملح و شوية زيت و ماء دافي للعجن

الطريقة

في جفنة او قصعة نحط الفرينة و نعمل تجويف في الوسط و نحط فيه باقي المكونات و ندلكها مليه و لكن ننتبه نزيد الماء بشوية باه ما تجينيش جارية

نتركها ترتاح و تخمر مدة 1/2 ساعة تقريبا ثم نعاود ندلكها مليح و نديرها خبزات و نخليهم يرتاحو في هذا الوقت نسخن الطاجين و كي يخمرو نطيبهم

و بالصحة و الهنا

اه زيت انا المطلوع مانديرش فيه زيت شحال ديري ليل
انا كنت نعمل مطلوع السميد الرقيق بصح نتاع الفرينة احسن بصح قوليلي شحال زيت
زاهانا عمري راح نسقسيلك راجلي كيفاه تصوري ياخي عندك لاب توب ولا كميرا عادي نتاع ميكروا

ماشاء الله ياليل يعطيك الصحة

يعطيك الصحة، أنا جداتي دير المطلوع نتاع الفرينة يجي يهبل، كي نروحو عندها هي طيب و تحط و حنا ناكلو كي تكمل ما تلقاش بزاف………
بصح أنا عندي ميكل في المقادير، يعني باش ندير 2 خبزات برك في النهار شخال لازملي مقادير؟ جاوبوني الله يحفظكم

يشهي ماشاء الله
لكن انا نديرو بالسميد و جامي جربت الفرينة يستاهل التجربة

شكرا لردودكم
بالنسبة لأختي هناء ديري مقدار ملعقة كبيرة زيت برك لتكسبه اللون الذهبي الجميل
اما اختي مون لايت ايه عندك الحق يجي خفيف لدرجة قد ماتاكلي مايشبعش و المقادير ديري كيما انا
انا ثاني ندير 2 خبزات في النهار و يلزمني 2 بول تاع فرينة مع 1 ملعقة كبيرة خميرة و ملعقة كبيرة زيت
و نعاود نوصيكم الماء ديرو بشوية باه تتحكمو في العجينة و تجريش
بصحتكم