كيما قلتلكم ابارح راني درت محجوبه نتاع الكسرة .ومع اني كنت ذارحه بصح قدرني ربي والحمد لله المهم نرجعو للكيفيه
اولا بصل تقطعيه شوي شوي كي العاده والتوم تاني وتطيهم على شوي شحمه ذايبه مع الزيت يتقلاو حتى تذوب البصله والتوم انا عندي مدايرة طريقه امي نشدو الشحمه الكاينه عندنا نذوبوها على نار قليله وتقعد بالسوايع وهي تذوب ومن بعد نصفيوها في كسكاس وهي سائله ونحطوها في طنجرة خاصه ونغطوها ونخبوها وراني مصورة الشحمه كي جامده .بعد ماتذوب البصله نقطعو فلفل اخضر ونضيفهم لبصل ونضيفو التوابل من ملح وفلفل اكحل وراس الحانوت اللي هو دواء الرقيق وفلفل احمر مهرس يتباع وطماطم انا نكثر من الطماطم باش تجي بنينه .بعد مانخلو كل هذا نضيف الدبشه في الاخير باش تعطينا ريحتها وبنتها
نرجعو ذرك للعجين عادي دقيق وملح وتعجني مليح اذا حبيتي تعجنيها كي المسمن او تعجنيها اقل منو انا بصراحه كنت تعبانه ماعجنتهاش بزاف كي تكملي خليها ترتاح ومن بعد ديريها لوزات كيما الصورة ومن بعد راكي رايحه تفهمي بالصور احسن
يعطيك الصحة حنونة
بصح قوليلي
تقعدي غير تزيدي ف الحشوة و تقلبي و لا غير هكا و خلاص
يعني دير حشوة و عجينة و تقلبي و هكا..
و ما قفلتيش من الاطراف زعمة ما تبقاش الحشوة تتسرب من الاطراف؟؟
و الحشوة باينة بينينة
خسارة جيتي تسكني بعيدة عليا
كون جتيني قريبة منين نشم ريحتها نعرض روحي عندك هههه
تاكلو بالصحة