والله لا اعرف حتى انها مشكلة ام لا اريد رايكن اخياتي انا قبل زواجي في بيت ابي كنت انا كلش خاصة في المطبخ بشهادة الجميع مكلتي بنينة بزاف ومتنوعة انا لنتوالى كلش اللمات الضياف العرس المهم نهار لتزوجت عجوزتي ربي يهديها متخليني نمس والو منحلفش على الشهرين الاولين سيرتو الطياب نهار لندخل المطبخ تنوض الحرب وتخرجني وتقلي انا لنطيب بنتها هي لتغسل الماعن والتسياق وكلش في البيت وهي تطيب وتعجن وانا وراجل يواخوه كيفكيف واي راجل كيما هوما هذه مدة زواجي كامل خمس سنوا ت منمسش الماء هدرو معاها بناتها عافرها راجلي واحد مافهم علاه دير هكذا ولكن بناتها كيجو لدار يديرو واش حبو ماتهدر والو يطيبو يسيقو يغسلو انا من قضيان بيتي مانفوتش وتقول هي راهاضايقة روحي منقدرش نقعد وراجلي يقلي اصبري حتان يفرج علينا ربي بسكنة وحدنا بصح هو يتماطل ويعقب فيا وانا منحبش المناقرة لمسكتني اولادي كنروح نخدم معنديش وين نخليهم وهي الحق ربي تحبهم ومستحفظة بيهم المهم ماندورش بالقضيان انتاع الدار وخلاص صدقوني خايفة ننسى وتوليلي هيبة في الطياب والضياف وليت انا العجوزة وهي الكنة ومنحكيلكمش كجو كاش اضياف ولا انسابها تولي اتنط ك الطفلة اصغيرة وانا نحس بالتبهديل راني نخمم نبطل الخدمة ونكري ولا هذا الذل وخاصة قيمتتي قدام راجلي افيدوني
صحيح الكمراة ما تحس بانثتها غير كتسقم دارها وتحرص على نظافتها ةتفكر في الديكور وتغييره والمطبخ كيفاش دير غدا و العشاء انت بلاك ربي بعجوزتك اصبري وك يرزقك الله ببيت حتى كراية اخدمي فيه واش تحبي
ما فهمتش علاه عجوزتك دير هكا
احنا عنا العجوزة تحرث على الكنة بالخدمة من المطبخ ما تخرجش ههههههه
وانت عجوزتك ما ندري كيفماه تفكر الله يهديها ويفرج عليك بسكن خاص
بمعنى ماتقنعها غير خدمتها واللا خدمة بناتها بإعتبار أنها هي اللي معلمتهم
أختي صبري مايخرجش منك العيب ها انتي تقولي تبغي ولادك و تحسن عليهم
كثري الدعاء ربي يفرج عليكم بدويرة و تتهناي
ربي يفرج عليك
كارثة هذه العجوز
انا يومى هكا
مع كناينها مادابيها ما يمسو والو و لاهم خدمات لا والو
و لكن الان لما كبرت وما عادتش تقدر عادوا هوما كلش
ربما عجوزتك شافقة عليك
تقول هي تخدم و تعاون في ولدي
خلي ما نزيدش عليها
او ايضا تحب خدمتها
انا ايضا تعرفي ما نحب حتى واحد يمس خدمتي او برمتي الله غالب هذا طبع
ما تقلقيش روحك
و عقبي كلش نورمال
دوام الحال من المحال
ربي يهنيك حبيبة
ربما تكون غيرة
باه تبين لولدها بلي هي كلش
و لا يهمك
كي تحبي طيبي ادخلي و طيبي
ماشي راح تخرجك بالسيف فهمتيني
و صارحيها قولها وعلاه تعملي هكا
و اذا تطلب الامر دخلي والديك و فرات
ربي يسهلك حبيبتي
حاسة بيك أختي ربي يصبرك و يصبرك بصح قوليلي واش راحا ديري تهاوشي و تربحي العيب و الله غير يولي كلشي في وجهك انتي
ماننصحك بوالو على خاطر انا الولى مالقيت ماندير خاصة كي يجو الضياف و الله غير نتبهدل بصح واش راحا ندير مادام الدار مش دارك ربي يسهل
ربي يفرج عليك اختي بسكنة و تتهناي و تروحي لدارك و ديري فيها واش بغيتي و نظفيها كيما تحبي انتي هات ماتجيكش لدارك و تزيد تصرف عليك برك ربي يفرج
نصيحة لكي حبيببتي. هي المواجهة ولكن. قولي لوالديك جيو في زيارة لكي طبعا أنت أحكي لامك على المشكل
وقدامهم اذا قامت هي للاحضار القهوة مثلا لا تتركيها. وضعيها أمام الامر الواقع أحكي لوالديك
والله المستعان