الوسم: السندويتشات

بما انني جديدة بينكن ولم تكن لدي الفرصة للاطلاع على كامل المواضيع قبل مشاركتي في المسابقة
اتمنى منكم ان تتقبلوني بصدر رحب
اول مشاركة لي ان شاء الله في المسابقة رايحة تكون عبارة عن طبق مشهور جدا في الشرق الاوسق وخاصة اليمن والسعودية
هذا الطبق هو:
المطبق
في الحقيقة هوما يديروه بالسلق والبيض لكنني اجريت عليه بعض التعديلات لان المطلوب هو خضر وفواكه الموسم

المقادير:
بما اننا في موسم البصل الاحمر

راح نستعملو في حشوة هاد الطبق
نبدا بالحشوة لانها هي لي راح تاخذ وقت في الطياب
المقادير:
من 3 الى 4 حبات بصل احمر حسب كمية المطبق للي ناوية تخدميه
من 3 حتى 4 قرون فلفل اخضر حلو وحار

2 سنات ثوم مفروم
ملح
زيت زيتون
زيت نباتي
خل ابيض
الطريقة تقشري البصل وتغسليه وتقطعيه جوانح رقيقة
تقطعي الفلفل دوائر رقيقة ايضا حطيهم في كاسرونة وحطي عليهم
زوج مغارف زيت نباتي وزوج مغارف زيت زيتون ومغرفة خل ابيض يمدلو بنة خيالية وملح وفلفل اسود اذا حبيتي انا مدرتلوش

غطيهم وخليهم يقلاو شويا بدون اي اضافات فقط على نار هادئة وحركيهم ساعة على ساعة
لما تذبل البصل والفلفل زيديلهم الثوم ومغرفة صغيرة هريسة واذا تحبي الحار ممكن تزيدي مغرفة كبيرة هنا الحشو تاعنا راح ياخذ لون

وعاودي غطيها وخليها تطيب فقط عسيها باش متتحرقش
لاحظي بعد ما طابت مفيهاش خلاص الماء

نخللي الحشو تاعنا يبرد ونجيو للعجينة
للعجينة:

– كيلا سميد رطب
– 2 كيلات فرينة
– ملح حسب الذوق
غربليهم مع بعض
وزيديلهم حبة بيض واخلطي جيدا
واعجني بالماء حتى تتحصلي على خليط خفيف كيما تاع الكريب

من بعد نجيو للطياب ممكن تطيبيها على مقلاة تيفال وممكن تطيبيها بالطريقة التقليدية كيما انا فوق الطاجين فقط سخنيه مليح

ونوجدو ساشي قدامنا باش غير تطيب نحطوها داخلها هكذا ميقيسهاش الهواء وتنشف من بعد تصعبلنا الخدمة بيها

نبدا نطيب في العجين عادي كيما الكريب او الغرايف ولا البغرير
نرفد بالمغرف ونفرغ في الطاجين ونحاول نوسع دائرة العجين على حساب حجم الحبة اللي رانا حابينو فقط ملاحظة ميلزمش تكون خشينة حاولي تديريخا رقيقة قد ما تقدري
ةخليها فقط تبياض وتنشف ثم نحيها على هادي لي قتلك لازم مقلاة متلسقش رايح يكون افضل واسرع

وهكذا كل ما نطيبو حبة نديروها لداخل الصاشي حتى نكملو كل العجين
من بعد نجو للحشو:
نحكمو العجينة نحطو الوجه اللي كان في القلاة من الاسفل واللي من الفوق نحطو فوقو الحشو تاعنا ونحطو فوقو مغرفة طون بالزيت مصفي مليح انا زدتلو شويا ملح لانني شريت تاع الباطا لكبيرة وكي تذوقتو لقيتو مسوس شويا

من بعد نطبقوها كيما المحاجب علة شكل مربع

وهكذا حتى نكملو كل الكمية

من بعد نبداو نطيبو
هنا من الاحسن تطيبوها في مقلاة تيقال او ممكن تحطوها مباشرة في الشواية تتحصلو على خطوط جميلة جدا لكن انا درت بالطريقة التقليدية لانو مش كل الناس متوفرة عندهم الشواية
فقط كل ما نحط حبة تاع المطبق تاعنا نضغط عليها فقط شويا بيدي باش متنحلش معايا من بعد وهكذا حتى نكملو

وهاهي الكيفية تاع المطبق جاهزة نتمنى تعجبكم يا حلوات


والى الملتقى في المشاركات الاحقة باذن الله
فقط التزيين انا درت هريسة مداوية:
مغرفة كبيرة هرية وفص توم مرحي وزوج مغاف زيت زيتون غير ما تغلي طفي النار وزيني بيها

احنا نديروه لكن نحطو 3 طبقات و بين كل طبقة نحطو الحشو

ثم نقطعوه