كيما قريتو في العنوان عرسي بعد شهر تماما في 24 ديسمبر ان شاء الله لعقوبة لكل الي مازالو ويهني ربي المتزوجات .
أردت ان أشارككم تحضيراتي
وكذلك أتمنى منكن تنبهي لأي شئ نسيته وتقديم النصائح لي حول كيفية تقسيم الأربع أسابيع المتبقية
أولا ادعو لوالدتي بالشفاء هي بالمستشفى منذ أربعة أيام وهذا مازاد الضغط علي
وأنا البنت الكبرى وأختي ماسكة فقط تحضير الغداء والعشاء والكسرة طبعا
بمعنى كل شئ راح نحضره وحدي
وهذا ملخص للأعمال التي أنجزتها
غلفت جزء من الجهاز وباقي لي جزء تاني
طبقت لي ساغفيات تاع القهوة والأكل ومازال ناقصيني العدد مشريتوش للآن
الخياطة مازالي بعض الأمور مثل المخاد نحشيهم تاع لي كوفغولي ولي دغا وبقالي كاراكو وبلوزة مخلصوش ، ونعدل حوايج أخرين العرض والطول وماشابه
الدار لازم نغسلها كامل لان مالين راجلي يجو يباتو في دارنا قبل العرس بيوم( الدار فيها الطابق السفلي صالون وشامبغ و هال وكوزينة واكرمكم الله حمام ، والطابق الثاني فيه الدروج والهال و 03 غرف وحمام ودوش والدرج الي يطلعو لاتيغاس) غسلت البارح الصالون ولاشومبغ الي لتحت
كاين اللوح تاع الدروج الي على الجنب لازمه نعاودله الفارني لانه قدام هو ولحديد والبيبان تاع الدار خاصة لي في الطابق التحت
باقي لي الحوش فيه حوايج قدم مكسرين ولازمه خدمة كبيرة وتنظيف والحديقة تاني كارثة
كاين تاني لماعن الي مخبيين
وبلا مننساو القاطو لازم نخليله وقت
وفي الاسبوع الثالث اكم عارفين الحفافة تدي معضم الوقت
هذا متفكرت ضرك
نستنى تنبهوني للي نسيته
ضرك ان شاء الله نروح نغسل الهال والدروج الي لتحت واذا كفاني الوقت نزيد الهال الي لفوق هكذا فكرت ومن بعد ان شاء الله كي نخلص نجي نخبركم
على أمل نلقى أفكار تساعدوني بيها ..سلامي للجميع 
حبيت نقولك ما ترهقيش روحك بزاااااااف
خلي بنات عماتك وخالاتك وخوالك لايجو يعونوك شوي باه تخلصي بكري ويبقالك الوقت باه تريحي
ربي يسعدك
و ان شاء الله ربي يتمملك بالخير و السعادة انا ثاني تزوجت في ديسمبر بصح انا قبلك بنهار انا في 23
ربي يعينك حنونة و تكملي كل التحضيرات و كيما قالولك الأخوات جيبي كاش حباباتك يعاونوك
ومبروك مقدما
بصح حنونة انا نتفق مع البقية
متقدريش تعملي كل هذا النتواياج وحدك
ابغثي لصحباتك ولا لبنات العائلة ولا للجيران يعاونوك
تتعبي وحت وجهك يتعب
بالمناسبة متنسايش تحط مسكات على وجهك من درك
باه يكون منور نهار العرس باذن الله
والله راكي مكثرة بزااف على روحك يعني احنا عندنا الشهر الاخير للعروسة ماتحرك والو يعني غير حوايج خفاف تسقم جهازها وماشابه ,,, من الاحسن تجيبي صحاباتك والا بنات من العايلة كيما قالولك لبناات يعااونوك شوياا
المهم كل شيئ بالبركة وان شاء الله تتوفقي وتكملي كل شيئ
صعيب الوحدة ما يكونش عندها الجازي و المعونة بصح حاولي 15 يوم المتبقية تريحي و تديري الماسكات و تاكلي مليح و ترقدي مليح، يعني 15 يوم الأوائل كملي واش بقالك و 15 الأخرى ريحي قدر المستطاع، علابالي ماشي ساهل بصح حاولي، إن شاء الله ربي يتمم على خير و كاش ما نتفكر راني نضيفو ممبعد..
لكن حنونة واش هادا انتي عروسة بزاف تعب عليك
ماعندكم بنات خالتك بنات عمتك والو جيرانكم
يعني على الاقل ينقو معاك الحوش والحديقة وحدك مستحيل تقدري تروحي لزوك مهلوكة خلاص؟؟؟؟؟؟؟؟؟؟
حاولي جيبي حد حنونة ربي يهنيك يارب
يعني لازم نديرهم انا
شكرا دلوعة على ردط وربي يسعدك ولعقوبة ليك اذا مازالك وربي يهنيك اذا سبقتيني
شكرا لك غاليتي على المشاركة
