دجاجة محمرة كبحال تاع العراسات 2024.

حبيباتي اليوم وجدت ليكم دجاج محمروالله شاهد علي بهاد الكلام اللي غادي نقوليكم بأنه كيجي مذاق ديال الأعراس بلا منطول عليكم ندوزو المقاديروالطريقة،كنشدو دجاجة كنغسلوها مزيان بالملح والحامض والطحين ونشلوها،ومنبعد كندهنوها بالملح وأطراف الحامض من براومن الداخل وكنخليوهامرقدة فيه هن ساعة حتى لساعتين،من بعدكنشلوها ونخلوها تسقطرونمشويو نوجدو هاد الشرمولة،م صغيرة سكنجبير،نصف م إبزار،نصف م عطرية مروزية،م سمن،ملح،ثوم مطحون،الربيع مكرض، البابة ديال الحامض مصير،زعفران شعرة، أنامكانش متوفر عندي، كنكبوعلى هادالخليط شويةالماء مــاشي الزيت وكندهنو بيه الدجاجة مزيان من برا والداخل وكرقدوها فيه ليلة كاملة،غاتسمحولي حيت مصورتش هاد المراحل كنت شوية مشغولة،المهم في الغد ليه،كنديرو في الطنجرة شوية زيت العود، م كبيرة زبدة، شوية السمن وكنقليو فيه الدجاجة مزيان ومنبعد كنزيدوالبصل محكوك أنا اكتفيت بوحدة كبيرة وانتوما على حسب اللي بغيتو، والعطرية اللي بقات لينا من الدجاج نزيدولها شوية الماء ونكبوها على البصلة ونخليو الكل يتقلى مزيان ونبعد نضيفوحزمة ديال القزبر ونرويوه بكاس صغير ماء دافئ أكرر كاس صغير باش تجينا متقلية وخاترة والعافية تكون مهيلة، ومن بعد غادي تشمو واحد الريحة غيتخيليكم ابحال راكم في شي عرس هههه،ومنين طيب نحمروها ونقدموها بالصحة والراحة،وذوقو المذاق وردو علي الخبار،ملاحظة متكتروش من الملح حيت رقدناها في الملح من قبل وحتى الحامض والسمن مالحين،نخليكم مع الصور