هذا نداء مستعجل لفائدة كوزينتي المسكينة و خاص لحبيبة الله يبارك و يعطيك كل ما تتمناي حبيبتي حبيت برك سؤال على بال la cuisiniere تاعي شراها راجلي قبل ما ندخل لدار بصح مشي كيما كنت حبتها ماعليش كي يفرج ربي نجددها برك هاذي اللي راهي عندي لونها قهوي و رايح للكحولة و متتنقاش كل ما نجي نحكها نحس بيها تتقشر الور راني ندير غير الالمينيوم … اذا كان عندك حل او منظف ما يقلعش اللون منها او طريقة بالخلطات ما حبيتش نجرب حتى نسقسيك و زيد الحيط تاعي بالبنتورة مشي بالفايونس يجيني تقيل تنقيته كل يوم لانو بيت لزوجي تاع الخدمة فقط ما نجمش نبدل فيها …سمحيلي اذا طولت بصح راني قاصدتك ما تردينيش انا وخيتك ….ربي يخليك لينا حبيبتي و يعطيك ما تتمناي
واش راكي توحشتك بزاااااااف
راكي غيبتي عليا شوية
بصح مانزعفش منك علابالي
كل واحدة و ظروفها و أشغالها
ربي يعينك و يوفقك
و يسخرلك في كل ما تتمناي لحبيبة
الله يعطيك الخير جهان
ضحكتيني على البرد اللي رانا فيه
أنا خرجت اليوم قعدت نتقرقب
فيما يخص الكوزينة نتاعك
ربي يفرج عليك سبحانه
هو الرزاق صاحب خزائن الرحمة
و الرزق
أدعو الله العظيم رب العرش العظيم
أن يفتح لك كل أبواب رزقه
من أي باب شئت تغرفين
اللهم آآمييين
حبيبتي
ماعليش كوزينتك راها خير و بركة
مقارنة معا بزاف بنات وحدخرين
ربي يحفظك و يسترك مالعين حبيبتي
لونها رااااائع
نمووووت على هاد اللون
و هو اللي تمنيته و درته بفضل الله
في كوزينة داري الجديدة
نحمد ربي و نشكره
إذا شفتي المنظفات القوية اللي تتباع
الخاصة بالاسطح راهي تقشرلك البيبان
جربي فقط المنظف المخفف
يعني
جربي ديري غطاء صابون الاواني
و غطاء
جيل جافيل الرغوي قوي على الدهون و لطيف على الاسطح
أنا راني مجرباته و ريحته رائعة
و زيدي عليه غطاء خل أبيض
هو منظف و معقم طبيعي
و مطهر و قاضي للدهون
بدون آثار سلبية على الاسطح
ديريهم في علبة بخاخ
و كملي الباقي بالماء
و رجيه عند كل استعمال
و ممكن تستعمليه يوميا
لكل الاسطح
الحيطان و البوتاجي
و الكويزينيير
و القجورة
ووووو واش حبيتي
بخي و امسحي بقماشة ولا اسفنجة اللي تستعمليها باش
تمسحي البوتاجي
و إذا حبيتي تحكي
حكي بأجاكس نتاع الماعين
ولا الاسفنجة حكي بالجيهة الخشنة الخضراء
ما تحكيش بالحديد هو اللي يجرح الخشب و البنتورة
ولا هاداك اللي مصنوع مالسلك
ما تحكيش بيه
حتى الحيطان
جربي تاني جيف البخاخ الاصفر
أنا جربته على باب الكوزينة و حكيته بفرشاة
بلطف
ما خسرليش البنتورة الحمد و الشكر لله
و خرج يبرق
هوا و الحيطان
بخيته و خليته دقيقة برك
و حكيت
هادا للتنظيفات الشهرية
و إذا حبيتي مرة فالاسبوع
لأنو قوي جدا مالازمش تكثري منه
نتمنى نكون أفدتك حبيبتي
و ربي يجيب التسهيل
لكل ما فيه خيره و رضاه
اللهم آآآمييين
ربي يحفظك جهان حبيبتي
و يخليك ليا
تفكري دايما أنني في الخدمة
في أي شي تحتاجيه
و الشي اللي مانعرفهش
نبحثلك عليه
حتى واحد ما يعرف كلشي
المهم
تستفادي و تلقي راحتك بإذن الله
راني عدلت المشاركة
كانوا بعض الصور ما يبانوش
غيرتهم