السلام عليكم و رحمة الله تعالى و بركاته
يا خواتاتي العزاز و الله راني في مرحلة صعيبة ياسر و راهي مضيقتلي من كل الجوايه
انا عندي موضوع و حبيت تعطوني رايكم
انا بنت عندي 23 سنة كملت قرايتي نعرف واحد عندي مدة وانا معاه نحبوو يحبني و صراحتا هو معايا مليح و محترم و ولد عايلة بصح المشكل ما عندناش الزهر كل ما يقرب باه يجي يخطبني تصير مشكل من عندهم و لا من عندنا اخر مرة كان جاي ماما مرضت و ما نجمتش و مبعد كي قررنا يجي قالو باباه ما نخطبلكش حتى يتزوج خوك الكبير عندو 40 سنة و راهو لدرك مزالنا نستناو فيه يخطب المهم انا دارهم يعرفوني و يحبوني الحمد لله و موافقين عليا
المشكل وين انو طالت الحالة بزاف و اخر مرة كنت نحكي معاه في الدار و جاء خويا قالي مع من راكي تحكي قتلو مع صحبتي انا صارحتا خفت و حسيت بلي فاق بيا نحكي معه قتلو او خويا فاق بيا و ما تزيدش تعيط حتى نعيطلك انا خفت لا يصرالي مشاكل المهم هو تفهم و ما عيطليش
و الحمد لله خويا ما فقش و لا ما حبش يهدر انا من هدا النهار ما زدش حكيت معاه خفت و هو راهو في بالو بلي خويا فاق بيا انا قلت دوك يخاف عليا و يحاول يهدر مع دارهم و يجي يخطب و لا حاجة هاك بصح كي حكيتمعاه لبارح لقيت الشخص عادي قالي ياخي خوك ما درلك والو برك و ما قال والو يعني 5 ايام ما حكيتش معاه ما خافش و ما قلش خواها درلها كشما حاجة خلي انا نكون راجل و فحل و نروح نخطبها و نحل المشاكل و الي زاد عليا اني كي حكيت معاه و قتلو وينك قالي راني في عرس صاحبي انا كوبيت تم
عمبالي بلي كثرت عليكم بصح و الله راني حايرة اختي الكبيرة نصحتني قاتلي خليه ما تزيديش تحكي معاه و ادا كان نويك صح يجي لدار قلتلها ما ينجمش حتى يخطب خوه الكبير قاتلي انت تقدري ظروفو و هو قدر ظروفك و ادا فاق خوك بيك صح شكون راح يخسر انتي هو او لباس عليا
يا اخواتي اعطوني رايكم ربي يعيشكم راني حايرة 
حبيبتي انا نصحك اناك تستخير ي بما انو ماليك على بالهم بيه استخيري وان شاء الله اللي فيه الخير ربي يجيبو و ما تقلقيش روحك لو كان كتبو ليك ربي حتى واحد ما راح يديه عليك ولو ما كتبو ربي ما راحش تديه وفوضي امرك لربي ما يكون غير الخير ان شاء الله
شكرا اختي الغالية على النصيحة ربي يعيشك
السلام عليكم ورحمة الله وبركاته
انصحك ان تقطعي علاقتك به نهائيا واذا ناوي الخير يتقدملك بشكل رسمي
شكرا اختي ام ألاء على النصيحة و جزاكي الله خير
عزيزتي….هذا يعتبر اختبار وفشل فيه هذا الشاب…. تخلى عنك في وقت حاجتك له وانت تدركين ذلك…هل يكرر الامر لا سمح الله مرة اخرى في موقف اخر…انت تستطيعين الاجابة على هذا السؤال. عليك محاولة السيطرة على عواطفك وترك الكرة في ملعبه….لا تتصلي به ابدا ودعيه هو من يتصل بك. واذا استطعت لا تردي عليه بعض الوقت ولا تخافي لو كان يحبك فلن تخسريه بل سيفعل المستحيل كي لا يخسرك واذا لم يفعل فلا تندمي عليه ابدا لانه حينها تكوني اكتشفت امره…..اذا اصر على الاتصال بك وهذا في حالة ما اذا كان مهتم سيحاول معرفة سبب تغيرك.عندها صارحيه بالفكرة التي راودتك حتى يفسر ما فعله .واذا لم يفعل عليك باخراجه من حياتك نهائيا….اذا كان لا يستطبع الزواج قبل اخيه فليثبت حسن نيته حتى بالخطبة…وعليه ان يقنع اهله ان مصيره بجب ان لا يرتبط بمصير اخيه…ماذا اذا لم يتزوج….هل سيحكم على الاصغر منه بان يبقى كذلك…اذا تحتم الامر فليتحدث مع اخيه في الامر حتى يخبر والديه انه لا يعارض زواج اخوه الصغر قبله
الله يبارك فيك اختي لطيفة امان الله ريحتيني بهدرتك حاسيتي بلي راكي فهمتيني و قلت الي راني نخمم فيه
بصح المشكل اني مفهماتو ما يعيطليش حتى نبيبيلو و هو كون ما نبيبلوش ما يعيطش
جربي فترة يا اختي ما تببيلوش….حاولي تتحكمي في روحك على قد ما تقدري…..اكيد راح يقلق كون ما يبان عليك حتى خبر….الوضع الطبيعي انو يحاول يعرف واش صرا حتى غيبتي.وراح يلقى طريقة باه يكلمك هو ولا اخته ولا حتى امه ….اذا طولت الحالة زيادة على اللزوم وما حيرهاش وما افتقدكش تقدري تببيلو وكي يعيطلك لوميه وقوليلو انها هذه الوضعية ما تساعدكش….اذا ناوي لحلال يقدم والا تحبسو الاتصالات حتى يحل المشاكل تاعو….وكي يريقل امورو ويجي يخطب مرحبا بيه والا شوفي حياتك …..ما كان لاه تبقو تتكلمو في التلفون لا تزيدي تتعلقي بيه اكثر ويربطك معاه ..كل ما كانت فترة العلاقة بينكما طويلة كلما كان الانسحاب منها صعب ومؤلم.
لا حول و لا قوة الا بالله شوفي اختي الرجل مواقف يعني ماشي هدرة برك تخيلي معاي باللي صح خوك شافك تهدري معاه هدي هي ردة فعل تاعو يروح و مايعاودش يعيطلك يا اختي الصح اللي يخاف عليك يجي يجري و بالاك ربي ماحبلكش الغبينة و دارلك الاسباب باش مايجيش يخطبك و عسى ان تكرهوا شيئا و هو خير لكم فكري مليح قبل ماديري اي خطوة معاه و ربي يوفقك
