تجربتي مع الحيوانت التي ربيتها ….الخوف ، الاشتياق ، الغضب ، الامل
رح نبدأ بقطتي العزيزة سميناها عزة لاننا كنا نعزها بزااف
هذه هي عزة الحلوة لما كانت صغيرة ..كانت سهرانة و تلعب بالخيط الوردي
الخوف :
قمت بتربيتها منذ كانت صغيرة جداااا ولهذا كان العالم الخارجي خطراا شديد عليها ..عندما ترا نفسها في المراة..عندما ترى ناس جدد عليها ..عند سماعها صوت السيارات…ببصاطة كانت تخاف من كل شيء ولهذا تركناها في البيت ..وكان وقتها كله في البيت وكلما زاد تعلقنا بها و حبنا لها
الإشتياق :
كانت قطتي الغالية من اول يوم دخلناها للبيت لطييفة و محبووبة لدرجة مانقدر نصبر عليها ..عندما كنت ندرس نروح ساعات و نجي تعبانة ولما نلقاها وانا طاعة بالدرج والله ننسى كل شيء هي كانت ذكية ههه اي واحد يرن الجرس تكون هي اول وحدة تنزل تقرعج في الساشيات كاش لحم ولا ياهورت هههه
كانت رائعة بكل معنا الكلمة
الغضب :
معروف انو القطط شديدة الملاحضة وتخاف من ايييي صوت ..والله كنت حريسة جدااا معها مانحاولش نزعفها خصوصا بالليل لما الوحدة فينا تخرج للساحة ولا الحديقة بالتخبية على ولادها ولا على احد افراد العائلة نخرجو وحنا نمشوفي الضلمة حتى تجي رجلنا على سلها هههههه اكيد او شيء تسمعو صوت عاليب وحركات بهلاوانية في السماء و تدور ليك بتخبيشة ههههه خشش خش والهرب يسلك ماتعرف اذا عفست على قط ولا سبع ههههههه وتدخل في حيط ولا في باب 
وماننصحكمش تلعبو مع القطط وهي متحبش غير خلوها على رايها والا توريلكم الويييييييييل 
النظافة
معروف انو القطط من انضف الحيوانات على الاطلاق ..حتى انو تنضف حالها باللحق ..واذا حاولتو تنضفوها رح تصير ملحمة عضمى و ننصحكم ماتدوشيلهاش وحدك لانو اكيد رح تغلبك ههه واذا خبشتكم ما تهدرو معايا مانهدر معاك راني نصحتكم
لانو القطط متحبش الماء مرة كنت ندوش لعزة و هي تهرب وانا نجري و انا كنت متت من الضحك شكلها تبدل بعد ما تشمخت رجعت مثل الجاجة المنتوفة واكيد الرسول صل الله عليه وسلم ان القطط طاهرة وليست نجسة و سماهم بالطوافين والطوافات في البيوت ..ولما كان يتوضأ كان يتركها تشرب منه و يكمل وضوئه باعتبارها طاهرة ..واكدة بعد البحوث العليمة بعد اجراء بعض التحاليل للقطط انها طاهرة مطهرة مافيها اي جراثيم وكلام الرسول صل الله عليه وسلم لا يحتاج دليل ولا ينطق من الهوا ..واكيد لاحضتم كفوف القطط نضييفة جدا و القطط تحرس على نضافتهم باللعق و اكيد شفتو الام تلعق اجسام اطفالها منذ الصغر
..واكيد شكون ما يعرفش الصحابي الجيليل ابو هريرة هل تعرفون سر التسمية هكذا لانو كان يعطف على القطط ويقتنيها وهو قدوة لنا ومضرب مثل في تربيتها و محبتها حتى نسي الناس اسمه و اختلفو فيه 
المرض :
اذا مرض قطك فلاداعي لاخذه للبيطري انا لاحضت في القطط التي قمت بتربيتها يعني اولاد عزة انها تعرضت لبعض الامراض منها بثور في الرقبة و في اسفل الايد وبعدها اصيبت بجروح بالغ والان قطي مصاب بها مسكيين كان يجري من الالم ..ومايترك حد يقرب عليه ..وكان في بعض الجروح مثل مرة تكسر كاس و عزة عفست عليه و رجلها تعمر دم و صارت تمشي عرجاء قلت خلاص مسكينة راحت فيها وخليناها ما مسيناهاش حتى بعد اسبوع صارت تمشي عادي ولا تكون في خبوش من اثار الشجار بين القطط لي يدخل للدار مايخرجش سالم ههههه
اللعب :
هنا اسمحولي ههه القطط تحب العب كثيييييييير خاصة لما تكون صغيرة مرة اختي كانت تدرس وجات قطتي و طلعت فوق الطاولت اخذت سيالة وهربت بها اختي تجري و هي تجري ههه وتلعب بيها من رجل لرجل هه وهي تحب تلعب بالكرات و الخيوط يعني لازم الاشياء المتحركة تجبد انتباها و خصوصا الصراصير ههههه سمعت بلي وحدة هنا عندها صرصور هههه تبعثو لقطي يلتها بيه اععع امزح
قطتي تحب تشوفني و انا نصلح ولا نسيق 
كل مانحرك البالي تحرك راسها معاه حتى رجعت هذي لعبتنا انا نجري بالنشاف وهي تجري مورايا هههه 
الأكل :
للاكل قصة و قصص ، فالقط شره جدا للاكل و لا يشبع و مخطئ من يظن انه يشبع يحب الاكل ثم الاكل هههه
ويقولو اذا جاع القط ومالقاش واش ياكل راح يدور عليك وياكلك من عينيك هاهاها "…انا قطتي جابت بيبياة ههه
هبلوووني لي يشوفوه راح للكوزينة يجرو موراه ويستناو عند الفريجيدار ويبقاو مياو ميااااااو عليكي ان تتصرفي بسرعة اعطيه ياكل واذا ماكلاش اعرفي راه عطشان وانتي راعيه يعني في وقت الصيف اكيد اعطييهولو بارد شوي وفي الشتاء اعطيه ماء عادي
النوم :
يمكنني ان اطلق على القط لقب سيد النوم ……..فهو ينام كثيرا حينما يكبر في السن ……..ينام طيلة الوقت تقريبا…لا تقلق فهذا عادي فهذه هي طبيعته ههه سوغتو اذا الماكلة تجيه لعند فمو القطة تمشي و تتمختر و تحب التقلاش …وفي الشتاء ترقد قدام المدفئة و في الصيف الله الله لازم شونبرا فيها كليماتيزور و نضلو انا وياها نتضاربو على البلاصة ههه تتكسل و متخلينيش مانبا نتحرك غير نتحرك تقولي مياااو يعني اذا عجباتك بلاصتك ارقدي واذا تتركي كي الدودة غير بدلي بلاصتك هههه
وانا نهبللها ههه حتى تهرب مني
وقصتي الثاني مع أرق و ألطف و أجمل حيوان رأيته في حياتي كلها
وهو الهمستر و من لا يعرفه
ولي مايعرفوش نقولو شوف سبايستون تعرف هههههه
معروف انو من انضف الحيوانات و معروف بانو حساااااااس جداااا و لا ينقل اي عدوة للانسان لانو باختصار شديد جهاز المناعة عندو ضعيف جدااا و يموت قبل ما يأذي البشر لهذا اعرفو بانو اولادكم ولا اهلكم الكبار في السن مارح يمرضو ولا يصرالهم شيء هم في اماااااان
اول مرة شفته كنت في براقي ولقينا محل لبيع الحيوانات و كنت مع اختي و دخلنا المحل الا باشيء تتحرك داخل اكواريوم انتاع الحوت ههه حرنا ماهي الا بالبائع يجي لعدنا وقاللنا هي صغار الهمستر كانت داخل النجارة رااقدة اختي دخلت ايدها و الهمستر ناض و عضها و انا و البائع ضحكنا عليها ههه وسقساها اذا كليتي حاجة حلوة قاتله كليت زلابية ههه قاللها هوما يحبو حاجة حلوة وزدنا هبلنا عليهم شرينا 2 ذكر و انثى دارهملنا دخل كرتونة وكي جينا للدار جبنا كرتونة اكير ونجارة و شريناهم بالتخبية على ابي ههه قاللنا مندخلش فيران لدار و بالزيادة بالدراهم وبعد مدة يمكن 3 او 4 ايام رجعنا شرينا قفص وفيه دولاب و سلالم و انفاق ههه والله كانو في حديقة الالعاب 
ولهذا ننصحكم بعد ما تكملو الاكل اغسكو يديكم و روحو العبو معاهم باغسكو اذا رحتو ومغسلتوش رح يخطئ الهمستا ضنا انو يديكم اكل مثل ماصرا مع اختي يشوفهم زلابية هههههه
ومعروف انو الهامستر يحب الهدوء واذا حاولت الاقتراب اقتربي بهدوء و خلي الهمستر يتعرف عليك من خلال الرائحة لانو معوف انو له حاسة شم قوية جدا منذ اللصغر …ومرات حاولي تقتربي ببطئ للقفص ورح تلاحضي انو هرب منك لانو خواف و في نفس الوقت فضولي بزاف يحب التقرعيج يموت عليه هههه وانت لازم تكوني حلية اقتربي من القفص و نادي باسمو ورح تشوفي بانو جاي يشمشم من بعيد ههه وخليه يشم و يكتشف وهو يحب يحس بالامان همال ما تحرميهش حتى مايحرمكش من العابه الجنونية يهببببببل
اما الاكل
مع مرور الوقت خلي الهمستر يجي ياكل من ايديك هذا احلىىىىىى شيء كان الهمستر ديالي يخبي البذور في البيت البلاستيكي و كل ما نحطلو شوي ماكلة نروح و نرجع ما نلقاها هه نزيد نمدلو نزيد نلقاها مكانش حتى رجعت نتخبالو و نشوف واش يدير لقيتو طول الوقت يحشيهالي هههههه لقيتها داير مخزن في البيت ديالو
واذا حبيتو تهبلو من الضحك اشرو الكرة الخاصة به وديريه داخلها وخليه تموت من الضحك ههههههه يدور معاك في الدار و تستعمل ايضا لما تكوني تنقي في الكاجة ديالو
وللهمستر جيوب في فمه تهبببببببل مرات نبقى نخزر فيه نجيب الزريعة ولا فيتامينات و نمدهالو يديها من يدي و يبدايطبع فيها في فمو يرجع مثل المكراش المهم يدخل ههههه 
يموت على الماكة وهو احلى حاااجة واكيد رح نرجع نشريهم في اقرب وقت و نصورهملكم و هوما يخبو في الماكة و هوما يلعبو ونصوركم المخزن ديالهم ههههه
الهامستر حيوان ضعيف و حساس جدا فعليك الحضر من الاكل لي تعطيهولو و اعطيعم بالتوازن وماتكثريش من الخضر بزاف نوعيهم مكسررات و زريعة و كوكاو وفيتامينات والفاكهة ايضا و متحطيش القفص دديالهم قدام التيارات الهوائية كا النافذة لانو رح يمرضوووووو
بزكام شديييييييييدو الفاكهة بسبب اسهالا قاتلا للهامستر ، و دائما يجب ان نضع القفص في مكان حرارته معتدلة و عليكم بالحرس جيدااااااااااااااا لانو انا ندماااانة 
تسببتو في مقتلهم بدون قصد 
كانو طول الوقت مخزونين في الدار في فصل الشتاء و كي شفتها صحات و الجو مغيم فقط طلعتهم للسطح باش يشمو شوي هواء كي رجعت ليهم لقيت واحد ميت والثاني مرييض جداااا وبعد ايام مات حزنت عليهم جداااااااااا
نصييحة الهامستر حيوان ضعيف و سمعت بلي هذا الدواء مليح ليهم دواء روفامسين
لاحضت انو حيوان الحمستر غريبة نوعا ما لانو تقضي جل النهار في النوم و تنشط بين 8 الى 9 مساءا …تلعب و تجري و تاكل ……ما عندي مانقلكم و الله العظيم يغيروحتى رجعو قططي يغيرو منهم ههه رجعت نعس فيهم يضحكوني لما الهمستر تدخل داخل العجلة و تدورها ليه ليه ههه
والقطط مخلوووووووعة غير تخزر بالعين رجعت نحطهم فوق الخزانة و يلحقوهم يهبلووني مي والله ينحو على ضيقت الخاطر
هذه قصتي مع الهمستر 
والان قصة جديدة مع دودي هههه نقصد دودة الحرير
مرة لاحضت وجود دودة الحرير في شجيرة الفيجل و حطيتها مع اخوتها في علبة بلاستيكية و غلقت عليها واكيد فتح فتحات للتهوئة وكان لونها اخضر و فيها بقع صفراء
وكانت طووول الوقت تاكل هههه نحطلها عرف من الفيجل نلقى غير الساق و حشاكم كويرات انتاع الفضلات هههه نهار كامل و هي ليه ليه
ومتحبش كي نمسها خلالالاص تخرج قرون من راسها و تميل للاسفل رجعت نطل عليها غير من بعيد
حتى نلقاها شرنقة
و في بدية تكون الشرنقة لونها غامض و مع الوقت قبل خروجها تشوفي لونها تصير الطبقة ضعييفة و شفافة تساعد على خروجها وكي شفتها هذاك رجعت نستناها طول الوقت حتى نشوف بالوحدة تفتح و تخرج ولالالالالالالا زم ما تمسوهمش
وكانت المفاجئة انا لونهم يهببببببببببل اصفو و اسمر حراشية كيما انا ههههههههه
عندها الحق كي تزوخ شابة و رشيقة ههه زين وطاي هههههه
وخالتي كي قالولها بلي راني مربية دود قالت اعععععع وبعدما سمعت رجعو فراشات ولا عندها فضول هههه قلتلها في الاول تقولي اععععع وضرك حابة تشوفيهم وقلتلها اووووه هذا اكتشاف جديد في العائلة ولازم تخلصي هههه
وقصتي الان مع البيروكي ديالي و سميته ريمي
مرة كنا قاعدين في الصالون حتى ابي جاء من الحراش وجايب كاجا فيها بيروكي اانا طااااااااااارت من الفرحة …وسميته ريمي على الانمي الي كان معروفة هذاك الوقت …واكله معروف مثل اكل الهمستر يعني بذور دوار الشمس ومكسرات و فاكهة و الذرة … واكيد لازم كاس ماء في جبنت و نظن ترفو بلي البيروكي يستعمل رجله في حمل البثور يجبها بمنهاره اذا كانت كبيرة يخدم رجليه يشد بيهم و يقطع بمنشار مثل الفول السوداني ..واذا كانت صغيرة مثل الزريعة عادي ياكلها بفمه يعرف يفتحها خير منا ههههه….وهو مايحتاجش تدوشولو ومرات في ايام الحر نرشو فوقه الماء و ندوه يحوس معانا و نخرجو ه للبالكون ولا الحدائق …اول مرة حكى فيها كاانت المفااااااااااااااجئة كنا صغاار يمكن 9/10 سنوات وكنا راقدييييين وابي كان سهران عند صحابو معروض ومجاش بكري و مع الصباح بلاك7 ريمي بدا يعيط بصوت اخي وابي ظن اختي راهي تعيط و يقوللها ياسارة خليني نرقد وريمي يزيد يعيط يقول قيييييييق ايوب وا يوب ههه يعني ايوب و ين راه ايوب وابي يرجع يعط ياسارة ريحي والبيرو يزيد قييييييق وا يوب وابي هدد اختي بزاااف وحنا كنا في سباااااااات في الشومبرا دجيالنا و ريمي كان في الكولوار بالنص الشنابر وابي خلالالالاص مقدرش ناض لاختي وضربها بسلاح ماما ههه البليغة شطحها
هههه وبعد ماضربها كان راجع لشومبرا ديالو يمي خزر في ابي وقالو وا يوب وابي قالو هذا انا لي راك تهدر و حنا نضنا نجرووووووووووو ورحنا ليه ونسينا كامل قصة الضرب ههه ورجع البيروكي ديالنا مشاكس في الحومة مرة ابي ضربني قدامو والله قالي قييييووووووووووووووو انا قاضتي عمررررري ابي رجع يضحك عليا هههههه وانا زعفت ضربت القفص برجلي و هربت ههه ومرة في طهارة خويا يعني موراها باشهر حطيناه في البالكون وفاميلت امي خرجو للبالكون يقرعجو وريمي كان ثم وماشافوهش و رجع يعيط ايوب ايووووووب وهوما شكوون وين راك ايوب مكاشو ههههههه كي قلنالهم بلي البيروكي هو لي كان يهدر معاهم هبلوووو من الضحك ههههه وكان يحب اللعب اكيد لازمو قفص كبير و عناية خاصة يحب لي يلعب معاه وهو مشاكس مرة شافني يحب يجلب انتباهي وانا كون نخدم و مزروووووووبة يرجع يعيطلي باسمي نور نوررر قيييق قااااااق و يطلع فوووق القفص و يروح للنص ويبدا كي تشوفوه تقولو شادي ماشي بيروكي ههههه يطلع يشد بمنقاره و رجليه يطلع للفوق ولنص القفص و يشد بمنقاره و طلق جسمو يترنح و يعجبو الحال و يعاود يدي لطرف القف ويرح فوق الحطبة وجي لعندك يقولك مسيلي راسي وانا نمسهولو ويغافلني بغضة خفيف ياااااا الله ما احلى تلك الايام
كان يناديلنا بااااكمل اسمائنا من الاب الى اصغر واحد حتى انومرة طارلنا من القفص و لقاوه فوق عمود كهربائي يناديلنا باسمائنا و صيدوه وجابوه وابي كافأمهم لانو رجعولنا البيبي ديالنا ههه
ولما جبناه كان عمره 3 اشهر وكان لونه قري و مع مرور الوقت صار ذيله احور
ومع مرور الوقت حبيناه ورجع فرد منا الا يوم يجي اللحضة المشؤووومة كنت غيرما جيت من المسيد يمكن كان عمري 12 او 13 وجيت عيااااانة وطلعت نفطر وانا قاعدة مع خاااوتي حتى نسمعو ريمي عيط عيطة قووووووووووووووية وعااااااااالية هبطنا كامل نجرو ولقيناه جثة هااااامدة والدم في كل مكاااااان
صدقوني نحكيلكم والدمة رح تطيح من عيني توحشتو بزااااااف كان هو محلي الدا ر مات بسسب العود الخشبي كان يلعب بيه و دخلتلو وحدة بالغلط في فمو و قتلاتو
والان قصتي مع الارانب ههه
اسمهم ميشا و ميشو ..الامرة عندها اسمين ميشو و نافا ههه
الارانب ياكلو بزاااااف اذا عاندتوهم ماتفراوش ههههههه نهار كامل وهوما ياكلو
ضرك نحكيلكم عليهم .. 
تربى الكثير من الأرانب لاستعمالها حيوانات أليفة في المنازل،وصار محبوب جدا وكثر استهلاكه ايضا ويعتبر مشروع تربية الارانب مربحااا جداااا لسرعته في التكاثر و النمو
يعتبر لحم الارانب من اغني اللحوم بالبروتين وبسهول هضمها و قلت احتوائها على الشحم ..وانخفاض نسبة الكليسترول فيها .
اكل الارنب
االارنب يتغذا على النباتات ..خضار و…. اعشاب…. قمح
وفي فصل الشتاء لا يشرب ماء كثيراا
قصتي مع الارانب …انا كنت حطيت ارانبي في البالكون داخل صندوق وغلقت عليهم ..وفي الصباح اختي خرجت للبالكون وخلات الباب مفتوح ..دخلت الارنوبة و قعدت عند راسي و انا راني نسمع خش خش خش هه ضنيته خويا راه يلعب قعدت نغطي في روحي و نقوله ريح خليني نرقد ..وكي كثر فتحت عينيا نلقى الارنوبة مدخلة راسها داخل الساك و تجبد في الشيكولا و تاكل ههههه كلاتلي نص العلبة …همال نزيدو الشيكولا في قائمة المؤكولات هههه
هذي هي قصتي و تجربتي وماندمت على حتى واااااااااااحد و نتمى تلقى اعجابكم وماشي المهم الفوز بالمشاركة المهم خليتوني نتفكر ايام الطفولة بحلاوتها و هبالنا مافي احلى منها
تقبلو تحياتي 
موفقة حبيبتي فردوس
والله منذ الصغر وانا نربي في الحيوانت مزاال القائمة طوييلة ههه حوت وحلزون البحر و ضفادع هههههه الضفادع كانت لدرس العلوم يعني بحث عن الشراغيف يجي النهار و نحكيهالكم والله باصيت معاهم ههه
نورتي يا غالية
واش درت ..رحت للساحة و لقيت بتييا فيها نص تراب و النص الثاني تعمر ماء من الشتاء حطيتهم داخل و نسيييييتهم كامل ..حتى مر الوقت ودخلونا للدار ودارنا تعمر لي يطلع يلقة في طريقو 4 جراين ههه واشنو هاذا ..شكون دخلهم ..معلابالهومش بلي انا انا درت كلي ماكاين واالو وهوما قعدو يطلعو ويهبطو كيفاش دخلو للدار وامبعد فاقو بلي انا هه وطلبو مني نصيدهم و نرميهم مقدرتش غير نشوفها نهرب وليت نشد البالي في يدي و نصلحهم لبر ا ههه واختي مسكينة باصات معايا ابي قاللها عاونيها و رفدت وحدة كبييييييييرة في كرطونة وطول الطريق وهي تصودي و اختي تصوطي معاهم ههه خافتهم 
اكشن هههههه بصراحة أنا عاجزة تماما"
بماذا اكتب لمواضيعكِ
الشيقة والتي لا استطيع ان امر عليها مرور الكرام
لروعتها وجمالها هكذا كان موضوعكِ
