قراتان البسباس من مطبخي 2024.

السلام عليكم
قراتان البسباس من مطبخي
بصلة متوسطة ،2 سنينات ثوم 2 حبات بسباس ، 2 حبات زرودية ، 2 حبات بطاطا
قطع دجاج ،ملح فلفل حكل توابل ن ماء للتمريق ، وزيت للقللي
التحضير
نرحو لبصل والثوم ونرابو الزرودية ونقطعو الدجاج دي مورصو صغار

ونقلوهم في شوي زيت
وكي يذبال نقطعو البسباس شرائح بالطول ونزيدوهم

ونحلطو عليهم الملح والتوابل

نقصو النار ونخلوهم يتقلو شوي

بعدها نمرقو بالماء

نخلوهم يطيبو على نار هادية حتى تتشرب لاصوص وتبقي غير شوي

من نوجدو لاصوص بيشامال
( 2 مغارف نشا مغرف كبيرة زبدة نذوبوهم ونزيدوهم نص لتر حليب ونحركو على النار حتى تخثار)
من بعد نزيدوها شوي من لاصوص تاعنا

و6 قطع فرماج

نردوها على النار ونبقو نحركو حتى نشوفوها رجعت خاثرة
وكي تبرد نفقسو عليها زوج حبات بيض ونخلطوها

نقصو البطاطا مكعبات صغار ونقلوها
ونحطوها في بيركس

نزيدو عليه البسباس بعد ماقطرناه من لاصوص

وفوقوه ذاك الدجاج مفتت

ومن بعد البشامال لمخلطة بالبيض

ونخلوه طيب
حتى يتحمر مليح
ويكون بهذا الشكل

ان شاء الله تعجبكم الوصفة
ماتنسونيش من دعوة خير اخواتي

يعطيك الصحة باين اشهي

السلام عليكم ورحمة الله وبركاته
بارك الله فيك أختي على هاذ الوصفة الرائعة …ممممممممممم أنا نموت على البسباس
و بينة جي بنينة
ربي يعطيك صحتك ويهنيك

السلام عليكم ورحمة الله وبركاته **يعطيك الصحة باين بنين شكرا لك

وصفة رائعة وباينة بلي بنينة ..يعطيك الصحة يا مون.رايحة نجربها اليوم للعشا..

ربي يخليك لينا يا مون باينة هايلة

راني درتها لعشا يا مون وجات هايلة حتى راجلي عجباتوا.بارك الله فيك وتسلم ايديك.:smile15 :

نسيت باش نقولك بلي مانعرفش نحط التصاور .لوكان حطيتها في ركن الاطباق المجربة .بصح حقيقة جات هايلة .كنت حايرة واش ندير للعشا وانتى سلكتيني يا مون خاصة مع راجلي ميحبش ياكل لمراقي .فشـكــ وبارك الله فيك ـــرا لك … لك مني أجمل تحية .

بارك الله فيك أختي على هاذ الوصفة