صلَوا على الحبيب المصطفى
يا الغاليات,
و يا أميرة الساحل و نور الهدى و eman haddi
قرَب عرس اختي بقي له شهر و اسبوع إن شاء الله
و حنا موالفين في كل المناسبات نكوموندو القاطو و مقروط اللوز و الدزيريات من العاصمة نجيبوهم
إلا البقلاوة فهي ارث عائلي يتداولوه الكبارات عندنا ماما و خالاتي..
و السبب انو نحبو حاجة شابة و ايضا باش يجينا واجد و ما نعياوش قبل العرس
هاذ المرَة حشمت على عرضي و وريت شطارتي في العيد حبيت يقيموا حلوياتي حتى اصنع منها نوع او نوعين للعرس ان شاء الله
و شكرولي كااااامل التشاراك في البنة و الهشاشة
القاطو المتفق عليه اللي يتقسَم نهار التصديرة هو
تشاراك بالطلية
كفتة بحشوة البندق
مقروط اللوز المسكر
و دزيريات او بقلاوة
اما فطور العروسة فهو الاصناف السابقة و زيادة قاطو شوكولا و الفواكه بعجينة اللوز
و هنا طالبة منكن مساعدتي وش نخير من الاصناف نقدر نعملو و ما يديش الوقت حتى نتمكن منو
انا حبيت التشاراك لاني بديت فيه لكن خاصني الشكل و التزيين و هذا اختصاص اميرة الساحل
و الكفتة شفت نتاع ايمان هادي كانت رائعة نتاع العيد لكن الحشو اريدها بالبندق و النوتيلا و اذا سهلة او لا
اممم
و اذا كاين افكار اخرى لحلويات اعراس 2024 يا ريت تقولولي عليها ممكن نغير و نعملها
و ايضا اللي تعرف طريقة جديدة للمادلين خفيفة باش نديرها للعيال نهارات العرس فطور الصباح
نتمنى يحظى الموضوع باهتمامكن رايحة نولي اهمية لآراءكن
و السلام عليكم
ان شاءالله ذوات الخبرة يفيدوك
اختي اولا الف مبروك لاختك
و فيما يخص الحلوى اذا شفتي انو التشاراك مزال الشكل تاعو صعيب و ما يجيش مليح بدلي ديري مثلا العرايش و راك علابالك نفس العجينة يتبدل غير الشكل و في خصوص وصفة المادلان ننصحك بهذي
المقادير:
3 بيضات،كاس سكر، كاس ناقص شوية زيت،نصف كاس حليب، كاس سميد رقيق،كاس و نصف فرينة مغربلة ،2 باكيات خميرة،فاني،زاست نتاع القارص،رقائق اللوز،معجون
الطريقة:
نخلط البيض جيدا مع السكروالفاني جيدا ثم نضيف الزيت ونخلط ثم الحليب وبعدها نضيف السميد والفرينة والخميرة
نحضر قوالب المادلان ونضع داخلها الاكياس الورقية ونعمرهم حتى للنصف ونحط فوقهم كمية من رقائق اللوز
ندخلهم للفرن يكون مسخن مسبقا على درجة حرارة 180حتى يطيب وياخذ لون ذهبي وهذا شكلهم بعد النضج
https://
نسخن المعجون وندهنهم من فوق ونقدمهم
https://
هنا عن قرب امممممممم
https://
و اذا خممت في حاجة اخرى راني نقولك نعست نروح نرقد
تصبحوا بخير
ربي يبارك لاختك ويسعده ان شاء الله
اختي نور الهدى بارك الله فيك على وصفة المادلان روعة راني نسختها عندي
سلام حبيبتي وزني ذهب كل شي بالبركة و الهناء على اختك ان شاء الله ربي يهنيها و يسعدها في حياتها الزوجية
بالنسبة للحلوى اللي راكي حابة تعمليها انا ننصحك تعملي الحلوى السهلة و يجو كامل الحبات متساويين
بالنسبة للتشاراك اذا حبيتي تعمليه شوفي اولا شحال من عدد راكي رايحة تعمليه و من الاحسن قسمي الكمية على 2 او 3 اي كل يوم تعملي كمية هكدا باش ماتتعبيش و يجو الحبات متساويين و من الاحسن اوزني كل حبة انا موالفة نعملها 30غ لكل حبة هكدا باش تضمني بلي يجو على حبة
بالنسبة للتزيين بمان العرس راه خاص باختك اعملي للطلية اللون الوردي او الذهبي او بنفسجي الفاتح او البرتقالي و لك الاختيار
و بالنسبة للتزيين نقدر نساعدك بهذه الصور
2 بيضات – علبة ياغورت عادي مديريش فرويتي – كيلي بعلبة الياغورت 1 زيت – 1 سكر -3 فرينة- خميرة..
ديري ملعقة اكل و نصف من الخليط في كل وحدة و تتنفخ و تعمرلك ليكيسات
للتزين:
ذوبي الشكولا في بان ماغي و ديري بها خطوط طوليا و من بعد عرضيا حتى تتحصلي على مربعات صغيرة يعني ديري خطوط بالطول و اقطعيم باخطوط اخرى بالعرض
… و اذا تحبي ديري كرام شونتي و لا اي كرام من الفوق بلابوش ادوي ديري غير حاجة خفيفة من الفوق و تكون في الوسط برك و حطي فوقها الفارمسال الملون ……
هذه الوصفة على ضمانتي جربي منها و رديلي ساهلة و اقتصادية
و اي استفسار انا في الخدمة
كلشي بالباركة و عقبا للقباقيين
ماشاء الله و الله القاطو روعة وطريقة التزيين أروع ربي يحفظكم و الأفكار نييرة
