السلام عليكم ورحمة الله تاعلى و بركاته
صراحة هذا الموضوع جا في بالي من كثرة الحوادث اللي تصرت معايا في رمضان 
………..نتوما تاني علابالي 
ايا متحشموش و حكولنا على يومياتكم في المطبخ مع الطبخ 
نبدى انا الاولى نفتح الباب
النهار الاول بعدا كنت نخدم في المايونيز و معبيتش بروحي حتى لقيت روحي دايتها للساني ندوق فيها 
و نهار اخر درت الشوربة فريك و الجلبانة و كي غسلت الفريك و جيت نرميها مع المرقة تاعها رميتها مع الجلبانة
و رواحو طلو عليا تخبلولي كامل الخيطان………..افففففففففف كارثة متفكرونيش
ايا حنوناتي متشوقة نعرع مغامراتكم باش تونسوني شوية……هههههههه
شوفي انا خطرة كنت رايحة نطيب الشربة و غسلت الخضرة كامل اللي نحطهم في الشربة و زدت غسلت معاهم البصلة اللي نحمس بها الطاجين تاع اللوبيا و كي تحمستلي الشربة ضفتلها الماء و درت كامل الخضر و معاها البصلة تاع الطاجين و من بعد كي جيت نرابيها باش نحمس بها ما صبتهاش قعدت نحوس عليها قلت واقيل رميتها و ما فقتش و من بعد دخلني الشك بلي درتها في الشربة رحت للشربة صبتها تم هههههههه
دوخاتك حبة بصل
باش ندير الشربة
حطيت صابون ازيس تاع لماعن
ومافقتش غيركي حليت عليه النار وليت نشم في ريحة الصابون
مع ريحة البصلة وراس الحانوت
هههههههههههههههههه
و انا ما نحبش نشرب الماء في رمضان مع لفطور يعني نستنى على الأقل نص ساعة و نشرب الماء ديفوا ننسى بلي ما شربتش و نرقد هكذاك و الصبح نوض ريقي ناشف ههههههه
شكرا ام يوسف على الموضوع كيما يقولوا إذا عمّت خفّت ههههه
مزية ماشي غير انا تتلفلي ف رمضان
كاين بزاف حوايج
مي للي صراتلي اليوم نتفكرها
جبدت طماطم باه ندير شربه و باه ندير قراتان باذنجان
المهم رحيتها مع بعض كامل على اساس مبعد نقسمها
و رحت نقلي باذنجان
كي رجعت نحوس على طماطم تاعو مالقيت والو
حوست حوست مبعد رحت فتحت على طنجره تاع شربه لقيتها حمررررررررررررررررررررررراااا
رحت طول عند اختي قالتلي اووووووه والله انا حطيتها و حايره علاه هذي طماطم بزاف كامله
نسات و تلفتلها بللي نحتاجوها هههه
وش نقولكم على شربه الحامضه هههه
ديتي سوفونير من الكوزينة………..هههههههه
ربي يستر برك هذا واش نقولوا