كي راكم لبنات
كنت من قبل سالتكم وقلتلكم واش نديراكلات لصحاب زوجي واستفدت كثيرا من خبراتكم ربي يجازيكم
والحمد لله جاز ذاك النهار والحمد لله بعدما قمت انا وامي بتحضيرات العرضة ربي يخليهاالي والحمد لله جازت روعة
وحابة نستسمح منكم لاني موديفييت في الفوتوات ومحيت منهم لاني كنت مزروبة شوية ومقلقة على بيها كان خصني شوية نظام وكاين اللي صورتهم بالبورتابل وكاين بالتابلات علابيهامخرجوش كامل ملاح
تحضيرات كانت مسبقة بصح نحكيلكم على نهار الضيف
اولا
درتلهم قهوة وقاطو
وهذه القاطو كامل من تحضيري قدام الضيفة
وهوما يتقهواو وجدتلهم الغدا و درتلهم الشربة فريك مع قراتان بطاطا بالدجاج ولي بولات مع الشومبينيون والشفلور المقلي و السلاطات ولحم الحلو ولاننا نحبو الحرور درتلهم لحرور
وهاهم الصور
وراني صورتهم بالبورتابل ولوكان شفتوني تضحكو عليا قاعد نوجد ونصور وكي ننسا نجري من وراه ونقولو احبس احبس عنبالوكاشما خاص وانا حابة نصور برك ياخي يبدا يعيط عليا
وماما تضحك عليا وتقولو ماديريش عليها راهم جيل نتاع الفيس بوك والمنتدياات
ومبعدة كانت المفاجئة اللي حضرناها انا وزوجي لصحابوهي
_
_
_
_
_
_
_
_
_
المسفوف بالعسل والزبدة ونص خروف في الفرن
ما نكذبش عليكم انا ماوجدتوش شراه راجلي وطيبو عند مولا المشوي وانا زوقتو برك وعاودت سخنتو وهده الفكرة شافها راجلي عند صحابو قالي عادو يديروها يمالا هو تاني حاب يفاجئهم
المسفوف درتو كيما هاك وخلطت العسل مع الزبدة باش يسقو بيه بصح الفوتو مش نتاعي للامانة
وهذه نقولوا في الجلفة المصور او المشوي وكل واحد ومقدو كاين اللي يدير رجلة ولا الكتف وكاين اللي يدير نص خروف وكاين اللي يديرو كامل ويوجدو مولا المشوي عندنا نشرولو اللحم هو اللي يوجد ويتبلوويشويه جابولي ريحتو تهبل بصح مالوغوزمون ماعطالوش لا غوسات نتاع المشوي
قلت لزوجي نقدمو المسفوف الاول قالي لا هذه هي الاتيكيت الشربة ولواحقها الاول ثم المشفوف والمصور اي المشوي ثانيا ماعلاباليش علاه
وفي الاخير درلهم لاتاي والمكسرات والفواكه
والحمد لله صحاب زوجي عجبيتهم العرضة والضيفة وخرجو يدعولي انا وزوجي
وربي يحفضلي امي وخوتاتي اللي عاونوني
وربي يدوملي زوجي
صل الله وسلم على محمد
الله يعطيكم الصحة وبصحتكم
وبصحت الضياف
بصحتكم وبصحة ضيافك.
الله يبارك ماشاء الله عليك كلش هايل. بصحتكم وربي يحفظلك الوالدة
يعطيك الصحة
سفرة دايمة ان شاء الله سبحانه و تعالى
يعطيكم الصحة