راني حايرة واش ندير 2024.

السلام عليكم
يا الحنونات ما كانش الي يسلكني من غيركم راني حايرة منين نبدا اولا انا عندي وحدة من العائلة مقيمة في فرنسا عيطتلي وقاتلي بلي راها جاية لعندي من ديك النها ر وانا نخمم واش هي الماكولات الي نقدر نوجدملها هي وولدها خاصت عندا السكر و100مرض الحاجة لحلوة ماتكلهاش سواء فالطياب ولا الحلويات يحبو لي سوب بزاف ولي بات مدابيكم تعطيوني الاقتراحات نتاوعكم وتسلكوني من هاد المصيبة هي جاية تحوس وانا نتفقس سمحولي الا قلقتكم نورمالمو نكتب فالحيرانة

هههههه قتلتيني بالضحك والله مانعرف وش ياكلو مرضى السكر
الواحد مع الصحاح حار وش يطيب كل يوم خلي يا عندها 100 مرض
هههه وقيلا تقتلك وتروح لفرنسا ,نضحك معاك حنونة ان شاء الله يعاونوك البنات

بصحتها اختي والله شيء يصحك
ماعليش تديها حسانات واكرام الضيف لازم
ادن وجدي المكتوب واليدين
ماتخرجيش على المالوف غير بالخضر تاع الموسم ومادام يحبوا لي سوب هدا شيء جميل مايطابوش بزاف العجائن
كل مرة شيء
قرنون دولمة
الله يبارك رانا في وقت لفليوا بطاطا حارة بالفيلو
والكابوية اعمليها سوب غير بسنة ثوم ولكرام فراش سهلة في نصف ساعة وجدتي لسوب
المحاجب
المعقودة راتي مع البصل الرقبي
وطبعا اعملي الكسكس بالحضر او مسفوف بالفول والجلبانة
الرشتة
المهم اختي ماتخميش والله غير تجوز حالة وهما كي يجو يحبوا يخرجوا يحوسوا ادن ماريحنش يقعدوا في الدار

[SIZE="4"]صح عندك حق اختي ام الحلوات نسيت
السلايط هدا تاع البسباس بزاف مليحة نديرها بزاف كي تعمليها مع االمعندوس والبيض المغلي
وسنينة ثوم الله عليها
الحميص راهو كاين الفلفل وطماطم مشوية مع زيت الزيتون ادرسيهم
والكرم الاحمر كدلك بزاف مليح خاصة انها مريضة المسكينة كثري السلطات لانها سهلة ومفيدة لحالتها
والقرنوت عندي وصفة بزاف كاملة الصورة تزيد في الشرح
تغلي قرنون ويعدها تحليها على شكل وردة بشوية تتفتح كي الزهرة وانزاي هداك الشعر اللي فيها
بعدها احشيها في الداخل بسلطة المارسيدوان
يعني كل شيء عندك رزودية البطاطا الجلبانة الماييز والوان كثيرة مع الروز مغلي
وتزيدي المايوناز وتحشي القرنون وتزيدي البيض المغلي والزيتون

سابحث عن الصورة انها سلطة كاملة وبريزونتابل كثير
سلطة صحية و متنوعة

سلطة اخرى 2
نبشر كل الخضر
*3حبات جزر مبشورة
*1 كبيرة البتراف او الشمندر *نستطيع عمل لكرم احمر نعمل في اناء فيه الخل والملح *ليلة كاملة
* الخيار حبة كبيرة
* وبصلة صغيرة مقطعة رقيقة نسطيع عمل فرماج مبشور
* كاس روز مسلوق او مفورن
صوص
زيت الزيتون + ملح + قطرات قارص سنة ثوم مبشورة نخلطهم

سلام اختي
اصحاب السكر لازملهم الخضر وحاجة قليلة مالعجائن موما الي يطلعو السكر
عندي حساء بسيط ولديد الي كلاه عندي عجبو وسقسا علا لاغوسات
زوج حبات بورو تقليهوم ملييييح+زودج حبات بطاطا مقطعين مكعبات تقلي +فطر من الاحسن طازج او علب تقليه ايضا
تمرقي ماشي بزاف باش اجيك بنينة وتغلقي غليها وتخليها اطيب
ارحيها +كريمة طازجة وتقدري تستغناي عليها +فلفل وقليلا من جوزة الطيب
تتقدري تحمري دجاج مع خضر سوتي
ربي معاك حنونة وحوسي فالمنتدى راهو كنز وكاين وصفات في القمة

ربي يخليكم يا الحنونات على الاقتراحات ديالكم جزاكم الله خير