واش راكم اخواتاتي
اليوم حبيت نفيدكن ب2 حوايج دايما نعملهم ولقيتهم ينفعوني بزاف في الكوزينة
الحاجة 1 هو لما تطيبي شي نهار الكسكس ويبقى ليك منو خاصتا ادا كان موش مشمخ بالمرقة
وحبيتي تستعمليه او تاكليه نهار أخر دايما نروحو نفوروه باه يسخن وناكلوه
لكن انا عندي حل أخر هو انك تجيبي مقلى انتاع تيفال وتحطيه فيها وكأنك تجمريه اي تقلبيه مليح بالمغرف حتى يسخن وتتحصلي على كسكس او طعام سخون خير من الي تفوريه ويتعمر بخار ويشمخ جربي وعلى ضمانتي
تقدري اختي نفس الطريقة تسخني بيها الروز لما يبقى ليك من غير تخلاط خاصتا انتاع السلاطة المهم يكون ناشف من غير زيادات انتاع الخل وما شابه وادا كنت عملتيه كطعام او ما شابه سخنيه بنفس الطريقة وماتندميش
والتدبيرة اخرى دايما في تسخين البقايا اتاع الاكل الي ما نقدروش نسخنوها فوق النار خاصاتا الاكل الناشف نشعل الفرن العادي او الكهربائي ولما يسخن مليح نحط فيه الاكل انتاعنا في ماعون يحمل النار ونخليه يسخن على مهل وكأنك مطيباتو غير دورك.
نتمنى ان هاد التدابير تستفادو منها وتخبرني اي وحدة جربت ونجحت .
سوف احعمل بالنصائ
بالنسبة للطعام مجربتها …..هذا وين درتو مسفوف ….ههه
شفت عزوجتي دايما تسخن في التيفال لي فريت كي يبقو يرجعو جدد
وزيد الكسكسي كي يكون بالزيت زيتون يسخن يهبل
وزيدي انا قريت فكرة على تسخان الخبز اللي جبدتيه من الكونجيلاتور
قالو سخني الكوكوت تاعك فوق النار و بعد طفي النار و حطي خبزك و اغلقي عليه دقائق
كي شغل سخنتيه في الفور هههههههههه
شكرا حبوبة …نموت على تدابير الدار
خميرة القاطو ماتخطانيش..في خبز الرخساس يولي كي القاطو و زيد في البيتزا اممممممم تجي هشيشة تهبل
لتعطير البيت رووووووعة قريتو في منتدى اخر و جربتو و هااااايلة الطريقة ..يعطيها الصحة مولات الفكرة
تجيبي طاوة صغيرة او ابريق ماتسحقيهش تعمري فيه للنص ماء تحطيه يسخن فوق النار و تضيفيلو 2 قطرات من العطور هاذيك الصغيرة الزيتية
و تخليه على نار هااااااااااادئة …يقعد هاذاك البخار يسيب الريحة تجنن و تحبي هزيه بخري بيه الدار ريحتو تهبل
بصح عسيه بالاك ينشف
وغدوا اغسلي الطاوة و عاودي اممممممممممممم رائحة الدار تولي تجنن
انا ندير فيه عطر زيتي تاع الدار شريتو من عند اللي يعمرو العطور الشرقية قرعة صغيرة ب 15 الف ريحتها تهبل
