السلام عليكم ورحمة الله تعالى وبركاته يا اغلى ناس عندي
حبيت اليوم نوريلكم كيفاش نخدم الورق تاع البوراك او الديول…..حاجة سهلة خلاص تطلب شرطين مهمين
1)لازم تكون عندك مقلة مليحة ما طيبت فيها والو تخليها غير لعمل الديول…انا شريت وحدة سبيسيال كراب و خدمتلي الورق او الديول روعة ا
2)لازم تعجني العجينة الي هي ساهلة…سميد ارطب+شوية ملح+الماء البارد وتلميها ثم تبداي تعجنيها مليح ثم حطيها في الفيلم اليمونتار و لا ساشي نظيفة و تحطيها في الثلاجة ليلة كاملة….باش ترتاح مليح و تحكم العلك مليح و تجيك ساهلة في الخدمة
من غدوى ان شاء الله تجبديها و تبداي تعجني بالشوية و تزيدي الماء و تعجني مليح مليح و تزيدي تزيدي الماء حتان تترخف خلاص و تولي جارية بصح كيما تهزيها بيدك تلقايها معلكة اي فيها العلك…ماش تسيح كالماء و الا ما تنجحلكش في الخدمة
كيما في الصورة.
ثم تحطي المقلة تاعك تسخن فوق طابونة خير من لكويزنيار….لازم النار تكون متوزعة على الجوايه الكل…..و نار هادئة خلاص
كيما تسخن المقلة نهزو شوية عجينة بيدنا ونحكم المقلة باليد الاخرى ونحط العجينة و بسرعة ندور المقلة و نمشي يدي بسرعة و نملا كل الفراغات لازم تكوني سريعة باش متجيكش خشينة…و شوفو الصور و اسفة ان ماظهرتش مليحة لاني كنت وحدي نخدم و نصور في نفس الوقت
نخلوها 2 دقايق فوق النار و نحوها من الحواشي بالشوية باش ما تتقطعش و نحطوها نصف دقيقة على الجهة الاخرى و نحيوها و نحطوها فوق ساغفيات طبة نظيفة و هكا حتان نكملو كل كمية العجينة و نحطوهم الكل فوق بعظاهم.
كيما نكملو خلاص نهزوهم و نفرقوهم على بعضاهم و نقسموهم كانهم ياسر باش ما يلصقوش في بعضاهم و نستعملو الي نسحقوهم و الباقي في ساشي نظيفة في الكونجيلاتور ووقت ما تسحقي اجبدي تلقايهم كول عليك خدمتيهم جدد
و اترككم مع الصور
yaatik saha
راني حابة نجربو موالفة ندير نتاع الفرينة والفرشاة هوناجح لكن كينجي نحشيه تبدى الورقة تتكسر مع اني نغطيه كي نكون نخدم
بصح طريقة حفزتني باش نجرب ديول نتاعك بارك الله فيك
يعطيك الصحة ام عبد الماجد
نظافة واتقان