هذا رمضان على الابواب
ولازم كل واحدة تعمل كم من طبق
وتنوع كل ليلة
طبعا من منطلق الثقة المتبادلة في نجاح الطبق
واش تقولو لو نعملو فيها قعدات نحكو فيها على الطياب تاعنا
طبعا مناطقنا ثرية بالذ الاطباق
هذي حلويات
هذي تحليات وعصائر
هذي سلاطات
هذي طواجين وشربات
باختصار اذا تبادلنا الخبرات مانلقاو مشكل مع التفكير
وتتنوع الموائد من ايدي الشاطرات حواء الجزائر
هيا انا عازمتكم على قعدة اخوية فيها قهوة من عندي والحلوى عليكم هههههه
اتمنى التتفاعل والتقييم والافادة والاستفادة
والله من وراء القصد
اختكم ام ادريس
ولا ماعجبتكم الفكرة حتى الان لا ردولا تفاعل
صراحة انا عاجبتني بزاف
لان مسالة التفكير في طياب رمضان تطرحها كل النساء
فقلت احنا نبسطوها بيناتنا ونتبادلو التجارب هنا
مازال عندي الامل في حواء الجزائر
تحية طيبة
وأنا أيضا عاجبتني الفكرة وخاصة اجتماع الأخوات الحبيبات أتمنى لكن قعدة مريحة إن شاء الله وكل رمضان وأنتن الى الله عزوجل أقرب.
اضن ان الفكرة عجبتنا احنا اثنين فقط
اين بقية الاخوات
المهم اني سابدا باسم الله
شربة فريك
في قدر تضعي قطع اللحم +البصل مقطع+سنينات ثوم مبشور+ البقدونس مقطع +الملح+الزيت +التوابل+الطماطم المصبرة +حبة طماطم مرحية او مبشورة+كمشة حمص منقوع وتقلي على نار خفيفة ثم تمرقي بنص كاس ماءوتتركيها تتغلى حتى تتداخل المكونات
ثم اضيفي من 2ل ـ3ل ماء ولما يتغلى الكل + الفريك المنقى والمغسول
خففي النار واتركيها حتى ينضج اللحم وتثقال المرقة طفي النار ورشي عليها قليل من التوابل وحكي كذلك بين كفيك النعناع اليابس او قطعي البقدونس وغطي القدر
ملاحظة البعض يحطو بطاطا و قرعة حتى تقل
وبالصحة والهنا والبنة الهايلة
راح نسبق الجميع ونقولك على أول يوم لامضان عندنا
للفال يقولو لازم يكون اليوم الأول فيه الحلو باش يفوت كامل الشهر حلو
أنا مائدتي لأول يوم يكون فيه الحليب والتمر والحريرة
البوراك
وأيضا من عادات عائلة زوجي أنهم يديرو شطيطحة دوارة والملفوف كل يوم أنا تعلمتها وبقيت نديرها
لورداف يومي لازم تكون على الطابلة لأنها خفيفة وغنية بالخصر
الفلفلة أيضا اللي تسموه في الشرق الحميس
طاجين حلو أنا اليوم الأول نجمع قيه البرقوق والزبيب والمشماش الجافين
وأيضا طاجين الجلبان والفواكه
هدي عادتي كل سنة في أول رمضان
لكن هل ممكن توضحيلي عكيفاش تعملي طاجين الجلبان و الفواكه
أنا كنت نقصد طاجين الجلبان وحده
والفاكه وحدها
الجملة جات لاصقة ههههه
بصح في رمضان ولأنو راه الحمان يعني السخانة نبغي ندير سلطة الفواكه تجي خفيفة بعد أكلة دسمة
أنا بروحي قلت ما شي معقول الجلبان مع الفاكهة
المهم ربي يحفظك ان شاء الله
مشكورة
مع هذا السخانة تنفع غير القراتان في الفطور
وهذي تاع الرز
طيبي الروز وحدووتبليه
طيبي الحم المفرووم مع البصل والتوابل والبقدونس وحدو عادي
ثم في صحن الفرن المدهون بالزبدة تحطي طبقة روز وطبقة لحم وفوقو الروز
وتسقيه بشوية صوص وفوقو فرماج
دخليه الفرن مدة ربع الى 20 د غير ينشف
وبالصحة والهنا
اللي عندها انواع كراتان تفيدنا بها
على خاطر المشكلة دايما في الطبق الثاني
واللي عندها استفسار تطرحو على اخواتها دون تردد
حتى تعم الفائدة
أنا فيما يخص مائدة رمضان
الطبق الأول هو الحريرة و لا استغناء عنها و لا ممكن نبدلها بأي نوع من أنواع الشربات الأخرى (لا يجوز هههههه )
الطاجين الحلو
في اليوم الأول نطيب طاجين حلو باش الشهر يمر حلو هذه عادة و أيضا في ليلة النصف
و يكون إما طاجين البرقوق/ طاجين السفرجل/ طاجين الفواكه الجافة(مشمش،أناناس ، شريحة) أو طاجين الزبيب المعسل
المقبلات و المعجنات
عندي نهار بنهار نطيب البوراك أو الفلفل الحلو أو معقودة هي أطباق لازمة في مائدة رمضان بصح ما نعملهاش كل يوم أنوع كل يوم طبق
السلطات
ضرورية و لا استغناء عنها و كل يوم نوع
– سلطة الأرز بالخضر و المايونيز
– سلطة الباربا
– سلطة الجزر المشرمل
– سلطة متنوعة
الطواجين .
– طاجين الجلبانة
– طاجين البرانية
– طاجين الزيتون
– طاجين الفطر بصلصة البيضاء
أو نستبدل الطاجين بطبق في الفرن
– أي نوع من القراتان
– يسطيلة
– سمك في الفرن
-خضار محشية بالكفتة
– الدجاج المحمر في الفرن
و في بعض المرات تكون إضافات
– دجاج كنتاكي
– السمك مقلي
– كروكيت
و القائمة طويلة
و مرة على مرة نجرب وصفة تكون جديدة من كتاب أو حصة تلفزيونية أو من النت
و في الأخير كاين الديسير
نحب نعمل الفلان- محلبي – مهلبية- الديول بالكريمة – القطايف- بسبوسة أو الصامصة ……..
و في الأخير نتمنى لكم رمضان كريم
و كيما يقولوا أولاد بلادي صح رمضانكم