حواء يا حواء كيفاش تكوني بعد ما كملتو العشاء و غسلتي الماعن و طفيتي ضوء الكوزينة ثم ….
طنن طنن طنن ضيف !!!!!!!
موقف تحطيت فيه.. زوج اختي جا للبيت بعد العاشرة ليلا 
اجري يا وزني ذهب للكوزينة و امسحي على الحيط شوي يخرجلك المارد السحري قوليلو نحوس على عشا … يا ريت
المهم يا ريت تعطونا افكار.. حيل.. خدع ههه لضيوف الفجأة اللي يجوكم على غداء او عشاء
تسقسوني وش درت ؟؟
و مع ضيق الوقت كنت نصور ههه الحمد لله ما شافنيش
بديت بالبطاطا قطعتها و درتها تتقلى
درت كبدة مشرملة
قطعتها على السريع مكعبات في مقلاة مع م ك زيت
و درت في مقلاة اخرى حبات طماطم مقشرة و مقطعة مع ثوم و ملعقة زيت
بعد ما طابت رميت عليها كسبر مقطع درت غير شوي لانو الضيف ما يحبش اللون الاخضر في الاكل للاسف تجي بنينة بالكسبر
كي طابت الكبدة خلطتهم مع بعض و خليتهم على النار 5 دقائق
درت بيض مقلي مطبق
في مقلاة كبييييرة زيت زيتون حوالي 3 م ك يسخن
خفقت 2 بيض مع ملح و فلفل اسود و وزعتها على المقلاة
كي طابت من جهة قلبتها
حطيت في نصفها شوي فلفل حار و طماطم كنت قليتهم شوي على النار اللي تحب تزيد فرماج مقطع او مبشور يجي بنين
و طبقتها
في اقل من نص ساعة كان العشا وجد – خلطها تصفى-
في انتظار تجاربكم حول المفاجئات … 
شاطرة ماشاء الله
أنا مرة على مرة ندير محاجب و نخبيهم فالكونجيلاتور
غير يجي كاش واحد نسخن و نحط مع قرعة جي او قازوز و هي فرات
اما اذا كان وقت الفطور أو العشاء هذيك الحصلة
تلقايني غير مع القليان، الشكشوكة
و صاحب الحلول الدائمة الكونجيلاتور
جبدبي و سخني
تشكرات
انا مزال ما طحتش في موقف كيما هاك ، مي خلاص راكي نبهتيني و راح نوجد روحي من درك،هههههههههههه
ماشاء الله جا عشااا 4444 يسلم يدييك
صراحة متحطيتش قبل في موقف مثل هدا
اغلب الاحيان كى يجوا نكونو نتعشاو يقعدوا معانا
بصح نحشم نروح نزييد نطيب معاها حاجة اخرى سريعة
صح صح لازم الوحدة دير حسابها و يحيا المجمد
حبيبتي كي يكون الظيف راجل ساااااااااااااااهل يقعد مع زوجي الوخذة كي تكون مرى وانا كنت مرة درت موضوع على هذه الفكرة ونقلك انا واش خممت قتلهم ما يسلكها غير البطاطة
لابيري بلخف ق
شريها وقطعيها رقيق وهي فوق النر تغلي في كوكوت وجدي شوية جاج رميه في كوكوت اخرى مع الماء والزيت وملح وبلعي الكوكوت وروحي جمعي 10 د وولي خطفي رجلك لشلاظة 
فم فم خدميها وزوقيها وفم فم طحني لابيري
وحلي على الجاج يكون وجد 
وديري تومات في مرقة الجاج تغلي شوية بيد ما توجدي لاتابل وخلاص كلشئ وجد في 20 د