عندي سؤال محيرني على بنتي يا ريت تجاوبوني 2024.

السلام عليكم
بنتي ريتاج عندها 17 شهر و حتى الآن ما تهدر حتى كلمة تقول غير دادادا نانانانا و تضحك و تعيط هل هذا نورمال لانه تجربتي الاولى و مازالت ما نعرفش مليح على التطوات تاع البيبي غير عبر النت

تعيشوا اللي عندها اولاد تفيدني و جزاكم ربي كل خير

عادي راهي كيما بنت اخي
حالة عادية
من بعد تهدر و ما توليش تسكت عليك

ما تخافيش اختي

ربي يحفظك اختي ربي يطمن قلبك على سرعة الجواب… انا نوعا ما خوافة شوية خاصة على الامور اللي تخص بنتي ههه

صباح الانوار اختي ليل و شجون … اللهم آمين يا رب تعيشي حبيبتي
اما فيما يخص الهدرة و الله غير نهدر معاها و نلعب معاها طول الوقت انا و باباها صح عايشين وحدنا حتى لافامي بعاد علينا هما في البلاد و احنا في فرنسا مي بصح نخرجها و نديها لاكراش تلعب مع الاولاد بصح مازالت ماتعلمتش الهدرة والو … ربي يستر و ييسر الامور .. اللهم آمين … جزاك ربي كل خير حبيبتي …اسعدك الله

بحكم تجربتي وتاخر النطق عند اطفالي حبيبتي المشكل كله هو المحيط الي عايشة فيه
يعني فقط انتي ووالدها راح يكون تاخر انا ابني تاخر كتير ومن بعد اخته لما لقات طفل بالبيت ويهدر هي هدرت احسن منه بكتير ولكن اختي ان شاء الله عادي وربي يطمنك عليها وماتوسوسيش روحك اختي

يعطيك الصحة اختي hananour ربي يعيشك طلعتيلي شوي المورال بالاك نهبط للبلاد نقعد 3 شهر ان شاء الله تولي تنطق شوي مع أخواتي و خويا و عممامها يا رب … صح موسوسة بزاف واش ندير الغربة تخلي الوسواس يجي بالسيف .. ربي يستر … شكر الله لك حبيبتي

ماتخافيش حنونه هدي عند الولاد كامل وفعلا كيما قالو الاخوات هدا التاخر جاء من قله الكلام او قله الناس معاها .ادا كنت تقدري تاخديها لاكراش تشوف الولاد وتعتعايش معاهم وخلال شهر على الاقل تلاحظي التغيير .انا عندي بنتي عندها عامين و5 شهر والله تالمو خوها خلقو ربي مايهدرش اكتر منها بعام ولات كيفو تهدر بالاشارات وتمتم مع انها كي نقولها قولي اي حاجه تقولها .الولاد ترفد من الولاد نصيحتي تدخليهاا لكراش مليحه وربي يفرحك بيها يارب

حبيبتي دنيا شكر الله لك على النصيحة … ربي يحفظ اولادك و يجعلهم من حفظة القرآن الكريم
يعني انا راني ندي فيها لاكراش مرتين في الاسبوع بصح نروح معاها انا و نقعد معاها هذي لاكراش سبيسيال للاولاد معاهم امهاتهم … بصح والو .. بالاك بإذن الله العام الجاي ندخلها لاكراش وحدها صح صح و الله ماهاونتها نحبها نموت عليها ريتاج كن نصيب طول الوقت معايا ربي يحفظها و يحميها من كل سوء و اولاد المسلمين

السلام عليكم اختى
انا عندى وليد خويا كان فى عمرى عامين ونصف ومنطق حتى حرف بصح كى قفل 3سنوات اهدر مباشرة

ربى يخليهالك وتفرحى بيها