الحمد لله على لمتنا الزينة
مع دخول فصل الشتاء علينا تبدا شوارعنا مع العشية تفحفح بريحة " الكسرة بالدوا "ريحة تميز بيتونا الاغواطية و من ميزتها الزينة انو تلم العايلات و الاصحاب و اللي ينوي يديرها يدير حساب زايد و زايد و زايد و قد ما يزيد ما يبقى منها والو..
هي من عائلة المحاجب و المختومة لكن تخص مدينتنا عن غيرنا و طريقتها غير و كل واحد يزيد و ينقص فيها على حسابو لكن الاصلية رايحة نعطيكم وصفتها
اعذروني الصور مقتبسة لانو من يومين عملتها و ما صورتها و الجاية ان شاء الله نحطها لكم
نبداو بالمسمن:
كالعادة .. دقيق و حفنة فرينة و ملح و ماء للعجن .. ادلكي مليييح و شكليها كويرات غطيها بالبلاستيك و خليها ترتاح
الحشو:
رطل جزر
كيلو بصل اخضر طويل
رطل بصل احمر
سنينات ثوم
4 م ك طماطم مصبرة
1/2 ربطة كسبر مقطع رقيق
3 م ك شحم خروف مجفف مبشور ( لا ينصح لاصحاب الكوليسترول)
3 م ك مبشور سفرجل
حفنة تمر يغلى 5 دقائق ينزع منه النوى و الماء المغلى و يفرك بالاصابع
راس الحانوت ( بسباس حبة حلاوة و كسبر)
فلفل أحمر
هريسة
زيت ملح
نبدا بالجزر نقيه و قطعيه و فوريه في الكسكاس لما يطيب ارحيه في robot
البصل افرميه بنوعيه و ضعيه في قدر مع الثوم و شوي زيت و قليه حتى يذبال اضيفي الملح و اغلقي عليه 20 د حتى يطيب على نار هادئة
لما يطيب اضيفي الجزر المرحي الطماطم المصبرة الهريسة الشحم مبشور السفجل الكسبر الفلفل الاحمر راس الحانوت و التمر المفروك خلطي و خليه 10 د على نار متوسطة حتى يطيب و ينشف من ماءه
خليه يبرد
حلي العجين بالزيت دوائر كباار و طبقيها كيما المسمن على 2 ثم ضعي الحشو في الطبقة السميكة حتى ما يثقب العجينة
و كملي طبقي المسمن و مباشرة الى الطاوة على النار
كاين اللي يضيفوا اللحم المرحي انا ما نحبه فيها و الهريسة حسب الذوق كلما تكون حارة افضل و طبعا سخونة تنسي برد الشتا
بالصحة و العافية و يا بنات الاغواط ارواحوا قيموني و ضيفوا تعليقاتكم
بصراحة كنت أراقب من بعيد تطورات المنتدى وكنت انتظر الجديد في أحواله وتعديلاته حتى يستقر ونعود جميعا للمشاركة
لكن أعترف لك…ريحة الكسرة بالدوا تاعك جابتني ههههههههه يعطيك الصحة
سبق لي و أن ذقتها من يد أغواطية على أرض الأغواط (تحواسة للباراج) وكانت جد لذيذة فعلا
بارك الله فيك جارتي العزيزة وتسلم أيدك
تسلم إيدك دكتورة
هكذا الحرائر و إلآ خلي….
باينة بنييييييييينة اممممممممممم يعطيك الصحة