ياسلام على الست ذكية
زوجة مثالية وعاقلة وكاملة وجوزها مش عارف يعمل ايه ولا ايه من فرحته بيها
تعالوا شوفوا عملت ايه النهاردة
اهى دخلت تصحى جوزها يوم اجازته من الصبح بدرى
اصحى يا عبد الصمد اصحى
يا عبد الصمد اصحى يا عبده
يوه ايه يا ذكية بتصحينى ليه دلوقتى
الساعة عدت سبعة ياراجل
يا شيخة حرام عليكى انهاردة اجازة سيبينى انام وارتاح من شقى الأسبوع
شقى ايه وكلام فاضى ايه يعنى هو انت بتروح الشغل تشيل حديد
انت بتروح تقعد على مكتبك زى الباشا
يعنى هو انا بقعد على المكتب العب
طيب يلا اصحى عشان تودينى لأمى
هى امك لحقت توحشك ما كانت عندنا اول امبارح
قصدك ايه هو انت عايز تحرمنى من امى ولا ايه
لا يا ستى ربنا يخليكى لامك
طيب قوم البس
يا ستى هنزور امك فى وقت زى ده معقول
لا اصل انت مش عارف اصل امى عازمة خالتى محاسن وولادها واجواز ولادها وولادهم على الغدا
واحنا مالنا يا ستى
يا سلام امال مين اللى هيساعدها فى الطبيخ
يعنى هى امك مالقتش حد غيرك يساعدها فى الطبيخ
باين امك بتكره خالتك اوى
قصدك ايه يا عبد الصمد هو انا ما بعرفش اطبخ ولا ايه
لا ياستى بتعرفى انا اللى مابعرفش اكل
طيب انا هاخد الفرختين وكيلو اللحمة اللى فى الفريزر
نعم يختى ليه ان شاء الله
اصل انا وعدت امى انى هشارك معاها فى العزومة
وانتى قبل ما تتسحبى من لسانك وتوعديها مش تاخدى رئى
يا خويا مالك بتزعق ليه ع الصبح هو انا هاخد مزرعة فراخ وعجل من الفريزر
ما كانوش كيلو لحمة وفرختين عمى
انتى ناسية يا ست ان ماعندناش غيرهم لأخر الشهر
وماله الناس لبعضيها ياخويا
طيب هنكمل باقى الشهر بإيه
يوه يا عبد الصمد هو العدس والفول خلصو من السوق
طيب كملى انتى العشر ايام بالعدس والفول وانا كل يوم هخرج من الشغل اروح اتغدا عند امى حبيبتى اللى عرفت قيمتها بعد ما اتجوزتك
تعالوا شوفوا عملت ايه النهاردة
اهى دخلت تصحى جوزها يوم اجازته من الصبح بدرى
اصحى يا عبد الصمد اصحى
يا عبد الصمد اصحى يا عبده……ابقظى زوجك بهمسات فى اذنيه رقيقة
يوه ايه يا ذكية بتصحينى ليه دلوقتى
الساعة عدت سبعة ياراجل
يا شيخة حرام عليكى انهاردة اجازة سيبينى انام وارتاح من شقى الأسبوع
شقى ايه وكلام فاضى ايه يعنى هو انت بتروح الشغل تشيل حديد
انت بتروح تقعد على مكتبك زى الباشا……قدرى تعب زوجك لانك لو فكرتى لحظة ستجديه يعمل طوال الشهر ويكد ويتعب لكى ينفق على غيره (زوجته واولاده )
يعنى هو انا بقعد على المكتب العب
طيب يلا اصحى عشان تودينى لأمى……يوم اجازة زوجك يكون يوم اجازة لكى من كل من حوللك واجعليه يوم مميز لكى ولزوجك
هى امك لحقت توحشك ما كانت عندنا اول امبارح
قصدك ايه هو انت عايز تحرمنى من امى ولا ايه……. لا تظنى ظن السوء فى كل ما يقوله زوجك لكى وفكرى بحسن نيه
لا يا ستى ربنا يخليكى لامك…….. ويخليكى ليا يا امى
طيب قوم البس
يا ستى هنزور امك فى وقت زى ده معقول
لا اصل انت مش عارف اصل امى عازمة خالتى محاسن وولادها واجواز ولادها وولادهم على الغدا
واحنا مالنا يا ستى
يا سلام امال مين اللى هيساعدها فى الطبيخ
يعنى هى امك مالقتش حد غيرك يساعدها فى الطبيخ…. اتفقى مع زوجك ولا تتضعيه امام الامر الواقع حتى لا يحدث ما لا تحبيه
باين امك بتكره خالتك اوى
قصدك ايه يا عبد الصمد هو انا ما بعرفش اطبخ ولا ايه
لا ياستى بتعرفى انا اللى مابعرفش اكل
طيب انا هاخد الفرختين وكيلو اللحمة اللى فى الفريزر…… استخدمى اسلوب فى الطلب اكثر تهذيبا وبنبره رقيقه حتى لا يستطيع زوجك الرفض
نعم يختى ليه ان شاء الله…. الزوج الكريم لا يسال زوجته لم اخذتى هذا
اصل انا وعدت امى انى هشارك معاها فى العزومة……. لا تعدى احدا بشىء ليس فى يدك
وانتى قبل ما تتسحبى من لسانك وتوعديها مش تاخدى رئى
يا خويا مالك بتزعق ليه ع الصبح هو انا هاخد مزرعة فراخ وعجل من الفريزر…… لا تستخدمى اسلوب السخرية من قله انفاق زوجك او دخله المحدود وتذكرى انه هناك غيرك لا يجلس فى بيت مثللك ولا ياكل مثل ما تاكلين
ما كانوش كيلو لحمة وفرختين عمى
انتى ناسية يا ست ان ماعندناش غيرهم لأخر الشهر
وماله الناس لبعضيها ياخويا
طيب هنكمل باقى الشهر بإيه
يوه يا عبد الصمد هو العدس والفول خلصو من السوق
طيب كملى انتى العشر ايام بالعدس والفول وانا كل يوم هخرج من الشغل اروح اتغدا عند امى حبيبتى اللى عرفت قيمتها بعد ما اتجوزتك
جوزها جه من شغله وهى بتكلم صاحبتها
تعالوا نشوف ايه اللى حصل
ـ ها وبعدين يا نوال كملى يا حبيبتى
ـ ويعدين يا ذكية قولتلها أنت جايباه منين
ـ ذكيه
يا ذكية
ـ طيب استنى يا نوال عبد الصمد جه
ـ ايه يا عبد الصمد انت جيت؟
ـ انت شايفه ايه
ـ طيب معلش نوال بتحكيلى موضوع مهم قوى
ـ ياهانم قوليلها جوزى جه واقفلى معاها
ـ حاضر حاضر … وبعدين يا نوال كملى ايه اللى حصل
ـ تصدقى الخبيثة مارضيتش تقولى
ـ لأ دى خبيثة قوى قوى وانت سكتى يا نوال
ـ لأ أنا قولتلها هعرف بطريقتى
ـ يا ذكية … يا هانم
ـ استنى يا نوال أنا مش عارفه الراجل ده عصبى قوى ليه كده مع إنى غلبانة زى ما انت شايفه
ـ طيب روحى يا ذكيه شوفيه عايز ايه
ـ هيكون عايز ايه يعنى يا نوال يختى اكيد عايز ياكل
ـ طيب روحى اكليه
ـ لأ أصل أنا ما لحقتش اطبخ
ـ ليه يا ذكية يا اختى
ـ ما هو اصل انت كلامك يا نوال ما ينشبعش منه الكلام خدنى معاكى ونسيت أطبخ
ـ الله يخليكى يا حبيبتى ربنا يعلم انتى غالية عندى قد ايه يا ذكية
ـ يا ذكية ……. يا ست حرام عليكى جعااااااااااااااااااااااااااااااااان
ـ طيب… يا نوال هقوم اشوفله حتة جبنة على خيارتين فى الثلاجة والله زعلانه علشان ما كملناش الموضوع المهم
ـ خلاص يا ذكية أكليه وكلمينى
ـ ماشى يا نوال
ـ مع السلامة يا ذكية
ـ الله يسلمك يا نوال
ـ ايه يا عبد الصمد ايه مالكش حق عمال تنادى يا ذكية يا ذكية الست اتحرجت منك
ـ هى دى لو عندها دم وعرفت ان جوزك جه هتفضل ترغى برضه
ـ لأ لأ لأ يا عبد الصمد ما تغلطشى فى صحبتى
ـ فين الغدا يا هانم
ـ اصل يا أخويا …. أصل أنا …
ـ أصلك ايه يا ستى ما طبختيش طبعاً
ـ معلش يا عبد الصمد سامحنى المره دى
ـ لأ بجد زودتيها …. إدينى التليفون
ـ ليه هتكلم نوال
ـ انت عايزه تجننينى هكلم ابوكى يا هانم
ـ وعايز ايه من ابويا
ـ هشهده على ظلم بنته لى