ميني إكلآر
حلوة خفيفة تستمتعو بيها مع التاي او العصير
المقادير
للعجينة
80 غ زبدة ،كاس ماء، ملعقة كبيرة سكر، مبشور ليمون ، 125 غ فرينة ، 3 حبات بيض
ومغلف كرام باتيسيار+ 3 ملاعق كبيرة سكر
التحضير
في كاسرول نعملو الزبدة الماء زاست القارس والسكر
نخلوهم على النار حتى يذوبو
نزيدو عليه الفرينة مرة وحدة
ونخلطوها بملعقة خشب مليح وبالخف حتى تتلم وتولى عجينة
نحوها من النار ونخلوها تبرد شوي، ونكسرو عليها بيضة
نخلطو بالخف ونشوفو لعجينة تحلت من بعضاها
نبقو نخلطو فيها حتى تتلم مليح
ونزيدو البيضة الثانية ونفس الطريقة وكي تتلم نزيدو الثالثة
حتى تولي لعجينة تاعنا متلاصقة وخفيفة شوي
نوجدو سينية الفور وندهنوها بالزيت
نعملو لعجينة في لابوش آدوي ونشكلو بيهم ميني اكلآر
ندخلوهم للفور ونخلوهم يطيبو ويدو لون محمر ونخلوهم بجيه يبردو
نوجدو لاكرام باتيسار تاعنا
نديرو نصف ليتر حليب ( يكون خاثر شوي ) ونزيدو 3 مغارف كبار سكر
نزيدو مغلف كرام باتسيآر
ونحطوهم فوق النار ونخلطو
حتى تخثار الكريمة تاعنا
نفتحو ليزكلآر في الوسط
نحشوهم بالكريمة
للتزيين
2 علب شوكولا ومكسرات حسب الرغبة
( استخدمت جوز ، لوز، بيستاش، نوازات )
نذبو الشوكولا في حمام مائي ونزيدوها 5 ملاعق ماء مغلي
تبرد شوي ونحطو شوي منها فوق كل حبة
ونزينو كيما نحبو
ان شاء الله تعجبكم الحلوى
ولاتنسوني من صالح دعائكم
شهيتيني و الله
تسلم الايادي اختي
تعجبني مواضيك و اكتر بساطتك وطريقة عرضك
مزيدا من التميز
ونا تاني من اشد المعجبات بوصفاتك الروعة
وفي بالي الكاستال ان شاء الله نجربو في اقرب فرصة
شكراا لمرورك اختي
