جيتكم اليوم بـ 3 تطبيقات من العجينة المورقة طريقة 2 اللي كنت عرضت طريقة تحضيرها وخطوات عمل الملفاي
لكن اليوم عاودت حضرتها و عملت منها
1- ملفاي بكريمة الحامض
2- تارتولات بنوعين من الكريمة
3- و للمالح عملت الكوكا
اتركم مع المقادير و طريقة التحضير المرفوقة بالصور
وان شاء الله تنال اعجابكم
و اليكم الرابط الاصلي لطريقة تحضير العجينة المورقة
طريقة 2 لعمل العجينة المورقة + ملفاي بالخطوات المصورة
1/ ملفاي بكريمة الحامض
مقادير الكريمة:
– 150ملل=150غ عصير قارص مصفى
– 1م.ك نشاء
– مبشور حبة قارص
– 3 بيض
– 15غ زبدة طرية
– في اناء نخدم السكر مع البيض من بعد نزيد النشاءو المبشورو نخلط مليح ثم نضيف عصير القارص و نخلط بعد ذلك نفرغ الخليط في كسرونة و نواصل الخلط على نار هادئة دون توقف حتى نتحصل على كريمة ثقيلة نضيفلها الزبدة في الاخير و نفرغها في صحن و نغطيها بورق بلاستيكي باش ماتشكلش لينا قشرة
العجينة نكون طيبناها كيما راهي موضحة في الرابط الاصلي و تزين و الصور توضح
و هذا شكله النهائي
2/ تارتولات بنوعين من الكريمة
1- تارتولات بالكريمة البيضاء
المقادير:
– 1م.ك مملوؤة جيدا نشاء
– لفاني
– 4م.ك سكر عادي
– 30غ زبدة طرية
– نضع كل المقادير في كسرونة و نخليها على نار هادئة حتى يثقل الخليط نتحصل على كريمة بيضاء ولذيذة نخليها تبرد ندي قوالب التارتولات نضع عليها العجينة و نثقبها بشوكة ثم نبسط عليها ورق الالمنيوم بلا مانستعمل الحبوب الجافة و نطيبها في فرن ساخن عادي و راهي رايحة طيب بلا ماتطلع بعد ذلك نضع قطعة شوكولا في كل حبة تارتولات و نعاود نرجعها للفرن يكون طافي حتى تذوب نطليها عليها ثم نفرغ عليها كمية من الكريمة بعدما بردت و نزينها بالفواكه حسب الذوق استعملت فاكهة الموز و الخوخ و الكيوي و كلمسة اخيرة نطليها بكمية بلاجولي بعدما ذوبناه على حمام مائي نخليها تبرد و تقدم
وهذا شكلها النهائي
2- تارتولات بكريمة الشوكولا:
– تارتولات بكريمة الشوكولا هي نفس الطريقة الاولى في التحضير لكن الاختلاف في الكريمة و كريمة الشوكولا تلقاوها في هذا الرابط
فقط استعملت نصف الكمية
اليكم الرابط :
كرام ديسار شوكولا مثل دانون من مطبخي
و هذا شكلها النهائي بعد التزيين
ملاحظة: بالنسبة للكريمة نقدر نشريها جاهزة بدل تحضيرها في البيت مرات نستعمل دانون شوكولا او كرام كراميل
3/ كوكا :
– للحشو لك الاختيار انا استعملت صلصة الطماطم بالتونة و زينتها بالزيتون الاخضر
– تعملي مستطيل من العجينة و تقطعي مربعات ثم توضعي الحشو في الوسط و تطوي العجينة من الزاوية الى الزاوية حتى تتحصلي على شكل مثلث تضغطي عليها مليح مع الجوانب بواسطة شوكة و تدهنيها بصفار بيضة و تخبز في فرن ساخن على 180 درجة مدة 20د و هذه الصور بعدما طابت
نتمنى تكون عجبتكم الافكار و التطبيقات شهر رمضان على الابواب 
جربوها و استمتعو بذوقها
تحياتي لكن جميعا
يعطيك الف صحة و عافية
لك مني احلى تقييم
منها واش حبيتي بين الحلو و الموالح
وطريقتك راهي تتكلم على نفسها والصورة احسن دليل
وطريقة شرحك بسيطة ومفهومة كثير نتمنى الاخوات يجربوها ان شاء الله
بصحتكم
جزاكن الله كل خير سيداتي الكريمات