لاحظت اننا فالوصفات نسينا دوك العيالات اللي خدامات او اللي ما عندهم وقت للخلطات
كاينة مسكينة اللي غير جالسة فالدار و لكن وقتها عامر بالضياف او اللي عندها شي ولد ضغير و ما تقدر تفارقه او تفكر فنفسها
عاد زيد كاين اللي ما عندها فلوس باش كل مرة تشري دانون مسوس او العسل الحر او منتوجات التجميل الغاليةاو زيد او زيد………….
لهاد السبب فكرت اليوم نقول لكل امراة انها ممكن تكون زوينة بطريقة ساهلة و بلا ماتخد ليها الوقت او تهليك ليها الجيب
كنظن بلا شك عزيزتي المراة كتديري شلاظة كل نهار فما فيها باس و انت كتقطعي مطيشة خودي القشور ديالها اللي غادي ترميهم و حكي بيهم وجهك فمعروف انه مطيشة كتجمع المسام
او الى كنت غادا تديري عصير الليمون خصوصا فهاد الصيف فما عليك غير تاخدي داك الشي اللي كيبقى فالعصارة و تحكي بيه البشرة ديالك لانها غادا تصفي البشرة و ترطبها و تبيضها
و الى حكيتي الجزرحطي شوية من الماء دياله فوق وجهك بقطعة قطن لانه فيه فيتامين ا اللي تينقي من حب الشباب و تيخلي البشرة وردية
الى كنت كتقطعي المعدنوس خدي شويا من الما دياله فهو عبارة عن لوسيون للبشرة الحساسة و المتعبة
اما الى كنت باغا تغسلي الدجاج او السمك بالحامض فمن الاحسن تغتنمي الفرصة و تديري الملحة فوق قشور الحامض و حكي الركبة و المرفقين لبياض ناصع
الى كنت كتغلي الزعتر لشي واحد فالبيت ضاراه كرشه و شاط ليك ماء الزعتر رشيه على شعرك او زيديه فقرعة الشامبو الخاصة بيك او تمضمضي بيه فهو احسن مطهر للفم و تيجمع اللثة
و ماتنسايش الان و احنا فموسم الفريز انك ملي تكوني باغيا تطحنيه مع عصير البرتقال خدي شي فريزة و حكيها على وجهك و اسنانك راه تتبيض الاسنان و مفيدة للبشرة
اما الى راجلك جاب ليك الضياف و قالك بغينا المشويات فتفكري قبل ما تشعلي الفاخر تحكي واحد الشويا على اسنانك و تخليه مرقد فيهم حتى تسالي و غسليه
اما الخيار و انت كتوجديه الغدا تفكري دهني بالمبشور دياله فوجهك و العنق لازالة البقع السوداء
الى كنت كتغربلي الدقيق باش تعجني خودي النخالة و خلطيها مع الحليب الساخن و حطيها فوق بشرتك لانه هاد القناع تيبيضها و تيخليها ناعمة
اما الى تشهيتي تصاوبي طبق باداز اللي كيشبه الك*** غير هو تيكون بالذرة خودي ملعقة كبيرة دقيق ذرة مع بياض بيضة خليه فوجهك 20د لازالة النقط السوداء
اما الى جاء وقت الخوخ فمتنسايش و انت كتوجدي طبق الديسير او عصير الخوخ تدهني وجهك بشي خوخة طايبة بزاف فالخوخ يعطر البشرة و يعطيها طراوة واضحة
والى عييتي من الشقا فالكوزينة و تمارة ديال الصباح و بغيتي توجدي شي كويس منعنع ديال اتاي ديري فبالك غادا تحطي واحد الكاس خاوي و ديري فيه النعناع و صبي عليه ماء مغلي و ملي يبرد دهني بيه البشرة لانه يزيل المواد الذهنية و ينشط و يسد المسام المتسعة
الى كنتي كتسلقي البطاطا تفكري تاخدي شي وحدة و تهرسيها بشي فرشيطة و تخلطي معها عصير طماطم و ديري فوجهك ملي يجف انزعيه باطراف الاصابع بحركات دائرية ثو اغسلي فهاد الخليط يزيل خلايا الجلد الميتة
كنظن مايجي يوجد الغدا غادا تكوني كلك مطلية بمجموعة من الفواكه و الخضر
وقبل ما يجي مول الدار ضربيها بواحد التدويشة خفيفة و لبسي شي مولاتي كسيوة غزالة و شي مكياج خفيف و كنظن ماغاداش تحتاجيه لانك بهاد الوصفات غادا تكوني غزالة و ضربتي عصفورين بحجر واحد
غادا تلقاي بشرتك تنقات و بياضت و تنعمات و توردات
ايوا نتمنى هاذ الموضوع يعجبكم
ومتنساونيش من الدعوات الزوينة ديالكم
يالله خليت ليكم الراحة والهناء
منقووووووووووول للفائدة
جزاكي الله كل خييييييييييييييير