انها معداتي التي لا تفارقني..تعودت عليها ترى اين الذهاب اليوم
اليوم عندي حملة تنظيف بيت غير كي خلصوه صحابو ا بيت شيك شيك بزاف
ربي يزيدهم ويبارك مارانيش نحسد فيهم لكن نشوف الانسان اللي كي يخدم يقدر يخلي هاذ الشيء كاملمن الاوساخ ..اليوم جبت خالتي حدة ونجاة ولويزة والنوري ..
سمحولي نسيت انكم ماتعرفوهمش..هاذو بعض من الخدامة يعني اللي يخدمو مليحانا في بيوت كيما هكذا او اماكن كبيرة نستعمل مواد غير موادكم ..الفيلا فيها البانتورة ولازملها حاجة فعالة
البيدون لكبير للارضية نديرو معاه كمية ماء معتبرة ونصبوه في الارض ونخليوه 
هذوك الصغار نتاع الاماكن اللي ممكن تكون طارت عليها البانتورة كيما الفيونس الكروات الخشب الى اخره على فكرة المواد اللي راكم تشوفو فيها شخصية يعني نتاعي ماخوذة من الكاطالوك مباشرة ولاني نحبكم وريتهالكم
ومباعد يجي دور المشينة قولو الله يبارك
هذه مونوبروس خاصة بعملية ازالة كل شيء من الكرلاج والدال دوسول نديرولها الماء في القرعة اللي راكم تشوفو فيها واحيانا كي يكون لبرودوي ماشي مليح نزيدولها الملح وما نقولكمش كيفاه يخرج..على العموم هي عندها شحال من بروصة تغسل بيها
نسيت نقولكم هذه خدمة النوري لانو هذوك الخدمات ما يعرفولهاش قصدي على الماشينة .خلينا النوري في الارضيات .لازم من فوق الى تحت .الفيلا ماهيش من هاذوك العالين فيها غير 02 اطاجات ومخدومين كيما التصاورراكم كل يوم تنشرولي فيهم في المنتدى …الله يبارك ياك قلتلكم مارانيش نحسد
-خالتي لويزة تغسل الكاروات بصح ماشي كيما مالفين نغسلوهم لانو صاحب الفيلا قالنا ما تديروليش الماء مسكين خاف على البانتورة.حبنا نخدمو بالهواء .لمزية عندي الحل قولو الله يبارك
هذا مونش تلي سكوبيك وغدوة انشاء الله نقولكم واش درنا بيه تحياتي
راني نسنى فيك تكملينا باقي المعدات ووسائل التنظيف لعندك
ونسنى بشوق باه نشوف نتيجة الفيلا النهائية
نتمنى تكوني صورتيها
السلام عليكم حبيباتي في حلقاتي نتاع التنظيف خلينا البارح خالتي لويزة تنظف في الكاروات ..الراجل معمر الدنيا بالكاروات .وهي راني نشوف فيها احست انو الخدمة بزاف بصح الله غالب
وما نديرولهمش الماء ..حاجة ماهي صعيبة عليا ..بربي نخلصهم بلا حتى قطرة نتاع ماء ..حابين تعرفو كيفاه؟؟؟
الراكلات اللي شفتوها نتاع تغسل وتمسح وتنحي الغبار وتخرج الكاروات خير من الماء وهاهو الحس نتا الماشينة..بدات لويزة بدات ضرك ما نقدروش نهدرو معاها حتان تخلص ..جاء دور الحمامات الله يبارك ثلاثة في الداخل وزوج برة.. بالفايونس كامل ولصقت فيهم البانتورة ..والغبار والسيمة والرمل والله مشكل .
بصح ماشي علي راني هنابروس لافير 
تغسل تنظف تمسح الفايونس- بلا حتى حاجة حتى شيء غير لبرودوي والماء..بصح هذه انا برك اللي نعرف نستعملها يعني جاء دوري في الخدمةتغسل بهديك لبروسة في الاسفل للارضية وزوج يركبو في التيوات اللي راكم تشوفو فيهم..باش نوصل حتى للفوق عندنا مونش طويل..
الخدامات الباقيين رايحين ..للكوزينة والدروج باه نخرجو كامل مع بعض الى الساحة ..
اشتغلت الورشة كل واحد راه في خدمتو ما تسمع غير الماشينات او الماء اللي راه تغسل بيه خالتي حدة في الدروج..والباروداج ..ماحسيناش بالوقت حتى لحقت 12 .البخيل ما جابلناش نتغداو نخرج وحدي نروح نجيبلهم الغداء …رحت شريت شويه جاج وفريت ودجاج وخبز وليموناد ورجعت …حبستهم ياكلو مساكن انا راني صايمة على خاطر اليوم هو الاثنين..رايحة نكمل خدمتي وهما ياكلو ويكملو.
راهم كملو ورجعو انا حابة نخلص الكثير اليوم باش غدوة نسيقو برك بالماء ويعطيلنا دراهمنا
خرجنا كامل للساحة علابالكم كامل ليبرودوي اللي درناهم لازم يباتو وغدوة باش يتغسلو هكذا نظمنو ما يبقى والو
المهم خرجنا كل الوسخ للساحة وطلبنا كاميو يديهم وزدنا درنا للساحة لانو فيها الكرلاج وخليناها تبات
هزيت الماشينات وكل شيء لانو غدوة باقي غير التسياق غدوة نجيو نسيقو…الحمد لله وغدا يوم جديد
سلامي لخالتي لويزة
خدمتكم متعبة ربي يعينكم
خدمتكم صعيبة