عجبتني هده الوصفة ياسر للسيدة الفاضله ام اماني وناوية ان شاء الله نديرها قي العيد
نقلتها للاستفادة لانها رائعة جدا
اليوم جبتلكم وصفة لحلوى التشاراك لكن مختلفة على الوصفة
لي متعاودين عليها
ولي فيها 3 كيلات فرينة بكيلة سمن هذا الوصفة نحضرها بعجينة
تسمى العجينة السحرية وهي اكثر من راااااائعة الحلوى تذوب
في الفم صراحة احسن وصفة جربتها على الاطلاق
المقادير:
كيلة سمن ذايب وبارد
كيلة زيت
كيلة حليب سائل
فرينة
نخلط السمن مع الزيت والحليب ونضيف الفرينة تدريجيا حتى نتحصل على عجينة
متماسكة مالا زمش تكون طرية يعني تكون حاكمة روحها لانها مبسسة مليح واذا
كانت طرية كي نحطها تطيب ما تحافظش على شكلها
نشكل كويرات انا عملتهم بحجم 28غ ولي تحب حجم صغير تعمل اقل
نغطيها ونخليها ترتاح
من جهة نحضر الحشو
انا عملت نوعين من الحشو
الحشو الاول: الحشو لي متعاودين عليه
3 كيلات لوز مرحي،كيلة ناقصة شوية سكر،قرفة،زوج م ك زبدة ذايبة
ونلم بماء الزهر مالازمش نكثر لازم يبقى الحشو متناثر
الحشو الثاني:
كيلة ونصف كاوكاو محمص ومرحي،كيلة جلجلانية محمصة،كيلةحلوة الترك،معجون
نلم به الخليط
ناخذ كويرة من العجينة نبسطها بالطول ونحط كمية من الحشو
نلف الحلوى وفي نفس الوقت نحاول نخرج الهواء منها
ونعطيها شكل التشاراك
ندخل الحلوى تطيب ونخليها تبرد تماما
في هذا الوقت نحضر الشربات:
كيلة سكر+3 كيلات ماء نحطهم على النار ونحسب 15 د بعدها نضيفلهم شوية
عصير ليمون ونطفي
بعدما تبرد الشاربات نغطس فيها الحلوى ونحطها تقطر في كسكاس
ناخذ كيس فيه سكر رطب نحط فيه حبة التشاراك ونغلق ونحرك نحط الحلوى فوق
مشبك حتى تبس ونعاود نحطها في السكر الرطب كيما المرة الاولى وعند التقديم
نرش فوقها سكر رطب بالصفاية وهذا شكلها
نتمنى تعجبكم الوصفة وتجربوها لانها فعلا تذووووووب في الفم وبنينة بزاف سواء
بحشوة اللوز او الكاوكاو
في امان الله
ادا عجبتكم الوصفة دعوة خير لصاحبة المجهود
الله يعطيك الصحة
عندي استفسار كي ندير تشاراك بعد ايام ييبس لي هذاك السكر الرطب لي من فوق ويولي يتفتت ماهو السبب ؟؟ وماهو الحل ؟؟
جزاك الله خيرا