السلام عليكن واش راكم كامل بالكبيرة بالصغيرة؟نتمنى تكونوا كامل ملاح
ماانطولش عليكم صحبتي مسكينة راهي في حالة من العيد نتمنى انصيبوا حل وانعاونوها بيه بارك الله فيكن نحكيلكم القصة كيما حكاتلي لازيادة ولانقصان
عندها عامين من الي زوجت والحمد لله راجلها ايخاف ربي ومتدين والحمد لله المهم من قبل كانت عجوزتها اظل تشكر فيها مي السنة في هذا الصيف تبدلت عليها ماعرفتش علاه عندها 7حماتات كامل ميشي متزوجين الا واحدة مزوجة او جات راهي قاعدة عندهم بحكم الخدمة المهم المشكل ابدا من ليلة العيد من قبل عجوزتها قاتلها جيبي وليدك انا انديرلوا الحنة ليلة العيد المغبونة رفدت التيليفون تعيط لعجوزتها اذا تديلها الصغير اديلوا الحنة قاتلها لالا راني تعبانة او ماانديروش الحنة
انخلعت المسكينة ابكات او كي جا راجلها القاها تبكي قلها واش بيك قاتلوا ماعلاباليش يماك علاه ماحبتش اديرلوا الحنة لوليدي ماقال والوا الراجل اسكت
غدا من ذاك حبيتي من التعب مانضتش بكري كي فطنت القات صلاة العيد اقيمت او راح الي راح
راحت بالزربة دوشت كي جا راجلها القاها كملت قلها انروحوا لدارنا ولا مازال قاتلوا اسنا البس للود او نمشط شعري نلبس نستقهواو وانروحوا ماجات تكمل كانت 10:15 حتى يماها ماعيطتش اتعيدلها
المهم هي جات خارجة وتعيط حماتها الي هي خت راجلها اتقلها علاه طولتوا ماجيتوش ردت هذا وين كملت او راناجايين المهم وصلوا للدار هي دخلت عند يماه او هودخل كانوا عندهم ضياف ماحبش ايفوت عند النسا احشم كي دخلت عندهم القاتهم كامل امحنيين ومشبحين يديهم بهاذيك الحنة الي تلمع ومزوقة المهم سكتت ماقالت والوا ابقاو حماتاتها وعلاش ماجبتيش الصغير اديلوا بما الحنة قتلهم عيطتلها او قاتلي راني عيانة او ماانديروش قعدوا فطروا من بعد العصر راحت المسكينة لدار او تنوض الحرب موراها علاش ماجاش بكري علاش ماجاش او سلم علينا؟يماهم تنطق وتقول باينة غاضوا الحال على مرتوا ولات تبكي غلطت ترفد تليفون باش اتعيط الخوها طاحت في كنتها انخلعت الكنة عمبالها كاشما صرا نهار العيد مع المغرب ابدات اتقلها واشبيكي يما قاتلها والوا او كوبات عاودتلها قاتلها مكان والوا اغلطت فيك كنت رايحة انعيط لخويا طحت فيك انت شوفوا ربي سبحانه كي حب يكشفاتعيط لحماتها قاتلها واش بيها يما قاتلهازعفت كي درات بلي زعفتي علجال الحنة ترفد روحها المسكينة اتعيط اراجلها ارواح اديني يما راه زعفانة علي او جيبيلي معاك حاجة باش انرضيها بيها راحت لدار عجوزتها تلقاها مع بنتها المزوجة كي حسوا بيها تنطق عجوزتها قاتلها روحي قوليلها ماراهيش هنا توقف لخرا في الباب واتقلها ماراهيش اهنا اتقولها صحبتي اسمعتها تهدر او هاهيك راهي قاعدة دخلت عليها المسكينة بنيتها قاتلها يما علاه راكي زعفانة علي اترد مارانيش زعفانة عليك انا مانزعفش على البراني هاذي الصدمة الاولى ليها قاتلها راني زعفانة على وليدي علاه ماجاش ليا بعد الصلاة مباشرة قاتلها لالا جا للدار حب انجوا كامل في راحبا القاني ماكملتش استناني او كي كملت جينا مباشرة قاتلها انت ووليدك ماتهمونيش ايهمني وليدي ايجيني انت وينما جابك ايجيبك هاذي الصدمة الثانية ثم دخلت عليها من الي زوج وليدي تبدل او اجبد روحوا من العايلة تنطق حماتها من الهيه شوفي للعاقبة او لوخرا انا كي شفتوا عرفت بلي دارولوا غسيل مخ المهم دخلوا على المسكينة بالهدرة انخلعت ونهار العيد ماداروا حرمة الهذا اليوم ماوالوامن بعد قاتلها شوفي اليوم وليد راهو يلعب في حجرك او غدوا تشوفي المهم علولها القلب انهار العيد والمسكينة بعيدة على دارهم او وحدها كي تروح لدار اعجوزتها ايخلوها وحدها قاعدة ايضلوا ايمنشروا ماهو عاجبهم حتى واحد
المهم اتخت حبيبتي قرار وهو الذهاب مرة في الاسبوع لبيت عجوزتها او ماطولش عندهم او وافقها زوجها على خاطرش راهوا عارف كلش كون جات من النسا لخرين والله ماتعتب بابهم ذوك راهم ايقولولها علاه راكي طولي جيبينا الطفل انشوفوه هوما ماايجوهاش حتى تعرضهم او تعب روحها باه ايجوا هي قاتلهم الي يتوحشوا ايجي ايشوفوا هوما لالامايحبوش حابين تروح ليهم يلعبوا مع الطفل او هي ماعلابالهمش بيها
دوك هي راهي تتسائل هل هذا الحل صائب اي انها تذهب مرة في الاسبوع خايفة اذا يغضب عليها شيخها وعجوزتها انا قلتها عملتي مليحة ماقطعتيش اوعزيتي روحك واش رايكم ؟والي عندها حل اخر تقول بارك الله فيكن انها في حيرة من امرها
انا راي احسن ادا بقات تمشي ليهم مرة في الاسبوع هاك مليح قد ما بعدت احسن تتجنب لسانهم المر ويخير من تسمع كلام جارح وما تقدر ترد
قولي ليها تهلاي في درك وراجلك
وما تعملي لعجوزتك غير الواجب و ربي راه يعلم الي في لقلوب
اللهم وفق اختنا في مسابقة التوضيف اللهم سهل عليها الامر فلا سهلا الا ماجعلته سهلا
ربي يصلح احوالكم واحوال جميع المسلمين يارب
انا موافقتها الراي انها تزورهم مرة كل اسبوع حل مليح وماتكترش معاهم الهدرة يعني دوكا بيناتهم طاحا لقدر يعني تخلي علاقتها بيهم رسمية فقط اذا حبو يشوفو الطفل تبعتو مع باباه ولا تديه هي وماتدخلش في زوجها يحب يروح فأي وقت يروح يعني تفصل مابين حياتها فدارها مع زوجها وحياتها مع اهل زوجها وتصبر وتدعي ربي يفرج عليها ولازم ديما تحاول تكون خيرمنهم حتى لو غلطو معاها تفوت وتدعي ربي المهم مايجيش العيب منها وربي يصبرها ويفرج عليها ويحسن حالها ان شاء الله لكم تحياتي وودي ودعائي الطيب لكم وللأخت ربي يفرج عليها ويسعدها مع زوجها وابنها يارب
اختي انا من راي دير لجوزتها عشاء وتعرضها وتفتح معاها الموصوع بالعقل….وتصبر وتدعي ربي يرجع الماء لمجراه….
وهذا الحنة…هي سبب المشكل…قوليها متعمرشي راسك وعامليهم عادي وخليهم يقولوا واش يحبوا
ربي يصلح الأحوال،/حتى أنا رأي من رأي الأخوات (وعن تجربة) تعرض عجوزتها تفتح معها الموضوع لإذا تفهمت اللهم بارك إذا لا ماتقطعهمش تبقى تزورهم مرة على مرة وتتعامل معاهم عادي كأن شيء لم يحدث يعني بقلب صافي أما زوجها وإبنها لابغاو يروحو يوميا معليش
وقوليلها إحتسبي الله وكثري الدعاء
والله لما الله يعلم صدق نيتك يعاونك…..