اليوم عملت بسطيلات صغار لرمضان ان شاء الله .الله يبلغنا ولكن ما طيبتهومش عملتهم فالكونجيلاتور حتى نحتاجهم ونجبدهم ندخلهم الفرن من بعد ندهنهم بشوية ناباج ونرش عليهم رقائق اللوز.
المهم الطرقة كالتالي= خديت دجاجة 2 كلغ قطعتها وعملت معاها البصلة مشلضة تكون كثيرة لانها غاتطيب فيها بدون ماء ونضيف الربيع والتوم والسكنجبير والبزار والملح الخرقوم والزعفران شعرة وشوية سمن حار مغربي والقرفة ونعنلوها تطيب على نار مهيلة من بعد ما يطيب الدجاج نزولوه ونخليو المرقة تعقاد ونضيفو ليها البيض انا عملت 5 بيضات ونحرك حتى يطيب البيض وتعقد المرقة ونطفيو عليها نعملوها فشبكة ونخليوها تستقطر جيدا.فهاد الاثناء نفتت الدجاج الى قطع ونكونو قلينا اللوز اللي قشرناه من قبل ونطحنوه ونضيف له السكر القليل فقط وشوية قرفة ورشة ماء الزهر ثم نبداو نمونطيو ناخد ورقة بسطيلة نعملو طبقة من اللوز ثم طبقة من الدجاج ثم طبقة من البصل مع البيض وندهن بالزبدة مخلطة مع الزيت ونجمعوها.نخليكم مع الصور وسمحولي ماصورتش المراحل كاملين.
نسيت ما قلتش ليكم تشكلوها كيما حبيتو .ان شاء الله لما نطيبها فرمضان ونعمل ليها الناباج ورقائق اللوز نسورها ونزلها ليكم.قبلو علي ههههههههههه
هايلين هايلين
يعطيك الصحة يالفحلة
وشحال تعجبني البسطيلة
الطبخ المغربي في قمة الروعة
يعطيك الصحة ….
يعني تكنجليها حتى لرمضان إن شاء الله
و من ثم تكملي طيبيها ؟؟؟
ربي يخليك الحبيبة انت اللي روعة.لو انك قريبة لي نطيبها ونجيبها لعندك حتى للدار
ايه الحبيبة هكدا كنقص علي العداب وكنربح الوقت فرمضان وحتى ادا جاو عندي الضياف على غفلة كنكون موجدة راسي ماشي كندوخ ومانعرف اش ندير ههههههههههههههه.وبالزيادة منين كتخرجيها من الكونجيلاتور كتطيبيها كتجي بحال الى عاد صايبتيها
صح يجو بناااااااااااااااان راني موالفة نديرها و نشكلها كي البوراك تاعنا مي خطرات مانديرش فيها اللوز و السكر يعني تكون مالحة برك
الله يعطيك الصحة راكي توجدي من ضرك
ايه نوجد من دابا حيت اخواتي راح يجو من الخارج يفوتو معانا رمضان ان شاء الله ايوا يالله نوجدو شوية باش نديوها فديننا وصلاتنا وعباداتنا ونجلسو معاهم شوية راه الوقت دغيا كيفوت.المرة الجاية ان شاء الله نحط ليكم بسطيلة الحوت بما انو كتعجبك المملحات.شكرا على تنويرك موضوعي
الله يخليك ..هذه خصايلنا نحنا أبناء المغرب العربي
لازم نذوقوا حبابنا و جيراننا
ربي يدوم عليك نعمته
ربي يخليك الحبيبة ويزيدك من نعيمه .الحمد لله ابناء المغرب العربي كاع كيف كيف كبما نقولو الدار الكبيرة والاكل يحلى بالاحباب والصحبة الطيبة.الله يبارك ليك الحبيبة وعواشر مبروكة كيما نقولو
